ၥၭဘၪ့ဒဲ ဆၧကိၪ့ဘၪကိၪ့ၥ့ၪ မုဆၫကနံၩယီၩ ၥၭဘၪ့ဖိၪလၧ ခိးဂဲးခိးဘၭ မၩလိၪအၥၭ ဆၧကိၪ့ဘၪကိၪ့ၥ့ၪလဖၪ အီၪဝ့ၫအၪမၬအၥိၭ က နၩ့နၩ့နီၪ လၩ့ဆ့ၭလၩ့ယွၩလၧ ၥံၫမၧၩ့ပၠိၭကျၩႇ ကနၩ့နၩ့နီၪ လၩ့ဆ့ၭလၩ့ယွၩလၧ ဆၧအဲၪဆၧကွၩကျၩႇ ဆၧမုၪဆၧမၧၩ့ ၦထံၪၦခွၫကျၩဆ့ အီၪဝ့ၫအၪမၬနီၪလီၫႉ ဘဲၫဆၧကိၪ့ဘၪကိၪ့ၥ့ၪအီၪမၬ ပဘွၫၦၡၩကဖိးအၥိၭ အ့ၪဆၧကိၪ့ဘၪကိၪ့ၥ့ၪလအီၪဘၪနီၪ လၧၡၩအကျၩ ပမ့ၬပနၫကဘၪဆံၭဝ့ၫနီၪလီၫႉ ဆၧကိၪ့ဘၪကိၪ့ၥ့ၪနီၪ ကၠၧၩ့ဒၪဆၧၥီၪ့လိၪလံၬလဲလီၫ လကၭဘၪဒဲ ပဆၧၥၭမၧၫ့ထီ လၧယၫ ပကမၩအၪ့ဖံၭအၪ့အဂး ပကလ့ၩထၪ့လ့ၩထီၫအဂး လိၪဝ့ၫဒၪဆၧၥ့ၪဆၧဘၪလဖၪဆ့ မွဲပကဘၪၥီၪ့လိၪ ပ ၥၭကိၭမံၩ့နီၪလီၫႉ ဘဲၫဆၧချဲၩ့အီၪထၬဝဲၩ အခံၫ့အီၪဒံၭအထီ ပကဘၪကျ့ၭစၨၭခိးဂဲးခိးဘၭအၥိၭ ပၥၭဘၪ့အထီ ပကဘၪကျ့ၭ စၨၭမၩလိၪဆၧကိၪ့ဘၪကိၪ့ၥ့ၪႇ အ့ၪမွဲပၥၭထီၩ့လၧ ၥၭလွါအခံၫ့နီၪ ပကဘၪလီၩ့ဎွါထဲၩ့ ကျိၪၥံၪစ့ၩၥံၪဆၧလၧၫ့ဆၧဎွၩ အဂးႇ ဒဲ လခဲၫ့ထုၬအ့ၪမွဲပၥၭၡါထၪ့အခံၫ့နီၪဒီၭ မွဲပကဘၪလီၩ့ဎွါထဲၩ့ တရၩနီၪလီၫႉ ပကဲၪၥၭဘၪ့လဖၪ မွဲပကဘၪအီၪက့ၪထၬ ဆၧထိစိၩႇ ပကဘၪအီၪက့ၪထၬ ဖီၫထုၪ့ ဒဲ ဆၧလဖၪယီၩ အ့ၪမွဲ ပလအီၪက့ၪထၬဘၪစွါဘဲၫ ပဆၧၥၭမၧၫ့အထီလၧယၫနီၪ မွဲကလၩ့ၥၭအုၭဒိၪဒိၪဒ့ၭအဂဲး ယၧၩနးအဲၪဖီၫဘွၩ ယမိ ဖ့ၪဘၪ ပၥၭဘၪ့ဖိၪလဖၪဆၧထုၪ့ၥုၪ့ထုၪ့ၥၭ ဘဲၫယီၩအၥိၭနီၪလီၫႉ နးအဲၪဖီၫဘွၩ
ဆၧထိစိၩဒဲ ၥၭလိၭဖၭလအီၪဘၪၥၭဘၪ့လဖၪနီၪ ကလ့ၩထၪ့လ့ၩထီၫအဂး ကကၪဝ့ၫလီၫ ဘဲၫၥူၫလ့ၫဖၩ့လၧလဖူၬဖၬဘၪအဒံၭလဖၪနီၪ အဆၧဖၩ့ကစဲၪ့ထၪ့အဂး ကၪဂဲၩဝ့ၫအၥိၭ ၥၭဘၪ့လၧၥၭလိၭဖၭ လအီၪဘၪ ၥၭကျ့ၭစၨၭလအီၪဘၪလဖၪနီၪဆ့ ကလ့ၩထၪ့လ့ၩထီၫအဂး မွဲကကၪဂဲၩဝ့ၫလီၫႉ ဆၧနီၪအကၠီၩ့ ၦကွ့ၭ လံၬဆရၫ အီၫ့ၥ့ၩစံၭဝ့ၫဒၪ ၥၭဘၪ့လၧဆၧကိၪ့ၥ့ၪအီၪဝ့ၫလဖၪနီၪ မၩထၪ့လ့ၩထီၫ အဆၧၥၭမၧၫ့န့ဝ့ၫအၥိၭ မၩထၪ့ထီၫ ၦဂူၪဂၩအဆၧၥၭမၧၫ့ဆ့ န့နီၪလီၫႉ ၥၭဘၪ့လၧထိၪတွၭအ့ၪ ၦဂူၪဂၩအဂးၥ့ၪလဖၪနီၪ ၥၭအဲၪလၩ့ၥၭအီၪၡၩဝ့ၫဂီၩ့ ၦဂူၪဂၩအဆၧၥၭအုၭလဖၪနီၪ ဆ့ အီၪက့ၪထၬဝ့ၫ ဘဲၫအဝ့ၫၥံၪအဆၧၥၭအုၭၥိၭ ၥ့ၪနီၪလီၫႉ ဆၧၡၪ့ဆၧယၬႇ ဆၧကိၪဒိၪကဲၪမုႇ အယၪဘွၩႇ အယၪၥၧၫ့ႇ အမ့ၬဎံၪ လဎံၪလဖၪနီၪ လမွဲဘၪ ၥၭဘၪ့လဂၩ အလူအဎွ့ၩတၭ ၥၭဘၪ့လဂၩ အလူအဎွ့ၩနီၪ မွဲဒၪလၧ ပၩရမံၫအီၪ လအီၪႇ မၩဆၧဖံၭဆၧန့ လန့ နီၪလီၫႉ ဆၧၥၭမၧၫ့ကဖျီၩ့နီၪ ယကဘၪခၪ့ဂၬလၧ ပခိၪနုၬဂီၩ့ ပကဘၪဆၧၫ့ထုၪ့လၧ ပၥၭ နီၪလီၫႉ မုဆၫကနံၩယီၩ ပကဲၪၥၭဘၪ့ဖိၪလဖၪ ပဆၧၥၭမၧၫ့အဂး မွဲပကဘၪကျ့ၭစၨၭအဂ့ၩထုၬနီၪလီၫႉ ပဆၧကိၪ့ၥ့ၪကိၪ့ဘၪနီၪ ပလထုၬ ထၪ့ၥိၩ့ဘၪဂီၩ့ ပလီၩ့ဒုၭနဲၩ့ၥၭန့ၫလၧၦဂူၪဂၩလီၫ ထီးကဲၪထၪ့ဘၪ ဘဲၫနီၪလဂ့ၩအဂး မုကနံၩယီၩ ယအဲၪဒိၭ ဖ့ၪဘၪ ၦၥၭဘၪ့လဖၪ ဆၧထုၪ့ၥုၪ့ထုၪ့ၥၭ ဘဲၫယီၩၥိၭနီၪလီၫႉ နးအဲၪဖီၫဘွၩ