Wp/prg/Ultragērdai

Ultragērdai - gērdiskas bāngas turīntei deznin aūktaisin nikāi 16 kHz, ka ast wīrsaws arāiks stesses zmūnin kirdiminiskwan. Per wīrsawan arāikan stēisan ultragērdai ast laikātan deznis 3 GHz, kaddan bāngas ilgan ast palīgiminan sen etāliskwan sirzdau atōmans en kristalliskai tīnklin. Gērdai turīntei aūktaisin deznin ast bilītan hipergērdai. Prōpaus šai gērdai ni ast kirdīminan zmūnimans, ast kirdiminan kitēimans zwīrins.

Ultragērdai en dabbai

Siksnāskreilai, zuwwei be delpīnai tērpaui echalōkaciōnin kāi lōkalizilai swajjans upperans. Delpīnai tērpaui ultragērdans sen ukaaūktaisin deznin, kasmu dīnkun mazzi īr aupaltun swajjans upperans enkaptans en dubnu. Echalōkaciōni enmazīngina prīskaundiskans delpīnans widātun en nigēidrasmu undan, kaddan nimazīngi tērputun akkins. Siksnāskreilai sen echalōkaciōnin lōkalizi gabtans wūdans. Kirdīntei ultragērdans, ainuntai wudāi ginna si sendīntei skreīlins be krūjantei na zemmin.

Ultragērdai en teknikei

• Ultragērdiska skīstinsna - per stāndartiskans mīliniskwan debbans sūit ast deznei zūrgi 40 kHz. Per submikroskōpiskans mīliniskwans tērpaui di deznins ērgi 150 kHz.
• Ultragērdiska lewitaciōni - tērpautan en ultragērdiskans motōrans, kwēi rotōrs ni kāusina statōran tēr kabinna en akūstiskasmu lāuku.
• Wīlinantes līnijas be dispersiskas wīlinantes līnijas - tērpautan en elaktrōnikei. Elaktriskan signālin ast prateikātan en akūstiskan be etwārtai. Akūstiskan signālin ēit līnais nikāi elaktriskas. Ka tūls, praēisnas kerdā mazzi perlānktwei ezze signālas dezņu (dispersiōni).
• Sāusinsa - tērpaui faktan, kāi en akūstiskasmu laūkan en winnu kīrsa sāusintan substāncin perīodiskai kitawīdina si kāmstis be kaddan kāmstis ast mazzan, aūga purīsna. Šī tekniki tērpaui mazzan energījas nikāi sāusinsna tērpawintei pāustas pumpin.

Ultragērdai en medicīnei

• Ultrasōnografija - medicīnis metōdi kāi widālai ēntrewingins struktūrins en kērmeni. Prateikātajs tenginna ultragērdiskan bāngan be etimma etswāikstintan bāngan.
• Ultragērdiska pjausnā - en chirurgījai tērpaui di ultragērdiskans peīlins. Tenēi ni segēi lōkalins degīnsnans kāigi lāzeriskai pēilai.
• Stabbans spelausnā - tērpawintei delli prateikātajans gaūne di bāngan, kawīda turri debīkan amplitūdin tēr lōkala, kasmu dīnkun mazīngi spellautun stabbans en inkstimans anga en jaknas zakīku.