Wp/prg/Lāima

Lāima - baltiska preiwakīsnas dēiwini. Dāst malnīkamans pa gīmsenin dallin, staddan tikka kāigi trīs Lāimas. Ast Dēiwas Ukapirmas sestrā be tēr Tennan zmūnei mazzi prasijja kāi tāns kitawīdinlai Tenesses līgan, adder deznimai Tenesmu ni izpalla di endrūwintun Lāiman - Lāima ast līgu Tenesmu. Tenesse zentlin ast warīsti. En folklōrei Lāimas zentlin ast Lāimas klakstā.

Dalā

Lāima dāst zmūnimans dallin pa gimsenin. Dalā dāst zmūni giwītwei deiwūtiskai. Ainuntamans kakīnslawingi Lāima ni dāst dallin. Stawīdai zmūnei ast bilītan per bedallas zmūnins. Lāima ast Ragganas sestrā, deznimai tennas pintegaūja drāugai. Lāima pakūnte, kāi zmūnei giwīlai tēr pa swajjan dallin be ni tērpaulai kitēisan dallins. Stwi Raggana ast etnīwingeisin be rādi bedalas zmūnimans, kāigi gaūtun dallin.

En māras kērdan, Lāima enastinna en Lāimans, kawīdas turri warīstin zentlin be ēit pra swītan pīdantei māran. Tīt, en retammans situaciōnins Lāima ast dīgi preiwakīsnas izpilnintajini.

Lāima dāst tēr dallas arāikinsnan, papekāntei ukaempīriniskan swītas līguswaran. En šissei ebīmsnan zmūi mazzi tālis teikātun swajjan dallin - pra swajjan tēikingin dīlin (Swāiktikas be Perkūnas sfēra), pra ūlinsnan be ebwarīsenins (Patrīmpas sfēra) anga pra gaūdriskwan be na kittans zmūnins endīlisnan (Pikkulas sfēra).

Relaciōni sen Saūlin

Lāima ast en sēimjai sen Minīkan be Āustran, Tenā ast Saūlis kīnekini.

Inkarnaciōnei

Lāimas inkarnaciōni ast geguzzi - tenā enastintan en geguzzin en wassaran etnawwina swītas rīkan. Zmūi kirdīnts geguzzin wīrst giwīwuns tīt, en kawīdsei stānin ast tennan kirdīwuns - sēntei šlāit penningans wīrst en šismu mettan būwuns gurīnan, enwārgusis ni wīrst būwuns kailūstan be t.t. En zēiman, kaddan geguzzis ast en kitsmu swītan, tenesses inkarnaciōni ast spurglawanags - sta ast emprīkiska, gallin dajānti inkarnaciōni.

Lāimas garrin ast līpa.

Sinkretismus

En kriksțāniskwai Mārija - Īzus Mūti ast praimmusi ēst pastippan Lāimas sfēran.