Ne Talepat ken muchi ne insectoj ipal ne Tepewa Hemiptera kipiat se weyak iten ken wishaput. Iwan yaja, weli kitzupina ne plantaj u takwalmet pal kichijchichina ne iesyu. Ne talepat itukay nusan chinchi melka nemit miak chinchi wan sejse yejemet inte techtzupinat, semaya ne et ush ne mil. Nemit ume talepat ne techchijchichinat tuesyu nujme ne Tal. Tik Kuskatan wan nujme ne Taltutunik (Tropicoj) nemi ne talepat Cimex hemipterus wan tik ne Talsesek nemi ne C. lectularius. Sejseujti, weli muajsit ne ujume, wan melka ne ukich C. hemipterus weli muteleksa wan ne C. lectularius, ne intejteksis tesu punit. Pal muteleksat, ne ukich kitzupina ne iijti ne siwatalepat wan ne itepul, yajini kenha se itzinpala. Ijkiuni ne kishuta pal kishinachtia pero semaya kan nemi ne ujti kalijtik ne iijti. Ne talepat kikwa esti semaya kwak takumi wan weli kitzupina ukse takwalmet ken ne tijlan melka kineki mas ne tuesyu. Su tesu weli kikwa tatka, weli naka yultuk achka se shiwit wan tajku. Su muchi yek, yawi kikwa esti sejse tunal ne semanaj, tesu mujmusta, wan ne chikitik kikupina ne iewayu makwil wipta pal takati. Ne siwatalepat weli kipishua hasta makwil imey pual (500) teksisti tik ne yey ush nawi metzti nemi yultuk. Ne talepat tesu weli techmaka nian se kukulis, melka miak chanejket kipiat yuyumukalis kan kintzupinat; ujukse nian kimatit kintzupinat kwak kuchit. Wan sejse yawit majmawit sujsul wan teya welit kuchit. Ini tesajsay ika welit muchiwat tzunejekat. Kanka witz ne talepat? Inat ne tamatinimet entomologoj ka ikman ne chanejket nemituyat kalijtik ujustut. Ka né nemituyat nusan ne tzinakan ne kipiaya ne italepaw (Cimex pilosellus) ne tzinakatalepat. Yaja pejki kikwa ne chanejket wan kwak panuket mijmiak shiwit muchiwa ne talepat ne witz tuwan kwak tikisket ne ustut [1]
-
Ne ukich kishuta ne siwatalepat pal kishinachtia -
Ne siwatalepat mutamachiwa 5-6 mm wan ne ukich chupiuk chikitik
|
 |
| Clasificacion |
|---|
| Reinoj: Animalia |
| Filoj: Artropoda |
| Clasej: Insecta |
| Orden: Hemiptera |
| Familiaj: Cimicidae |
| Generoj: Cimex |
| Especiej: C. hemipterus F., C. lectularius L .
|
Referencias
edit- ↑ Mullen, Gary R.; Durden, Lance A. (8 May 2009). Medical and Veterinary Entomology (Second ed.). Academic Press. p. 80. ISBN 978-0-12-372500-4.