Wp/ppl/Takwatzin

Template:HelpNav

**Takwatzin**
Clasificacion
Ne istak takwatzin muajsi nujme, nusan tik Canada
Reinoj : Animalia
Filoj: Chordata
Infraclasej : Marsupialia
Orden : Didelphimorphia
Familiaj : Didelphidae
Generoj : nemit 19, tik Meshijku nemi ne Generoj Tlacuatzin, tik Kustatan nemi ne Didelphis

Ne Takwatzin se kojtanchanej ipal ne infraorden itukay Marsupialia ipal ne familiaj itukay Didelphidae. Kenha ne imiakwan kajkanguroj marsupial tik Australia, ne siwatakwatzin kipia se ikushtal ipak ne ielishku pal kinwika ne itajtakwatzinchin. Ijtik ne ikushtal yaja kipia ne ichijchiwal pal kintakwaltia ne itajtakwatzinchin. Nusan, ne orden itukay Didelphimorphia ika ne siwatakwatzin kipia ume ujujti ijtik ne itili. Ijkiuni, ne ukichtakwatzin nusan kipia ume itzun tik ne itepul pal weli mutelekza wan ne siwatakwatzin.

Kan muajsi

Tik Meshijku nemi se clasej itukay Tlacuatzin canescens^[1] pero tik Kuskatan nemit sejseuk ken ne tiltik takwatzin (Didelphis marsupialis) wan ne istak takwatzin (Didelphis virginiana). Nujme tik ne Americas, ipal Canada asta Argentina, nemit 103 clasej tekenhat tajtakwatzin^[2]; sejse yejemet sujsul chikitik ken ne kimichin wan sejseuk mas wey ken ne mistun. Ne takwatzin kikwa muchi: kineki sujsul ne manguj itakil, awakat, ijinsectoj, nusan ne kupajsul. Ne takwatzin weli kikwa nusan ne kwechwaj kuat, ne kipia sujsul tesajsay benenoj tupal, ika ne takwatzin te miki - ne venenoj tesu tesajsay ipal!^[3] Yaja nusan kimiktia wan kikwa ne tijlan wan ne itejteksis. Ne takwatzin, kan nemi ukse animal ken ne itzkwinti u takat ka weli kikwa, kunij yaja mawiltia miktuk asta nawi oraj (shikita ne fotoj itan) wan muchiwa ijyak ashish itech ne itzupi.

Weli mukwa

Melka uni, ne takwatzin nemi sujsul ajwiak pal tikwat wan miak chanejket nujme tik ne Shiktal wan ne Antillas kitzkiat wan kimanat kenha ne tijlan u tuchti. Tik Trinidad wan Tobagoj ne takwatzin itukay "manicou" wan kitzkiat sujsul pal tikwat, yajika nemi pal sejse leyes pal kitajpiat ne takwatzin. Tik Meshijku ne chanejket kinekit kikwat ne takwatzin ikwitapil pal ma kipiat miak ipilawan.

Ne takwatzin mawiltia miktuk su majmawi
Se takwatzin tik se tet

Referencias

↑ Zarza, H., Ceballos, G. y Steele M.A. (2003) Marmosa canescens en Mammalian Species. 725. American Society of Mamalogists
↑ Gardner, Alfred (16 November 2005). Wilson, Don E., and Reeder, DeeAnn M., eds. ed. Mammal Species of the World (3rd ed.). Baltimore: Johns Hopkins University Press, 2 vols. (2142 pp.). pp. 3–18. ISBN 978-0-8018-8221-0. OCLC 62265494. http://www.bucknell.edu/msw3
↑ http://www.pulsodigital.net/2011/07/la-batalla-de-las-zarigueyas-vs-las.html

[1] Zarza, H., Ceballos, G. y Steele M.A. (2003) Marmosa canescens en Mammalian Species. 725. American Society of Mamalogists

[2] Gardner, Alfred (16 November 2005). Wilson, Don E., and Reeder, DeeAnn M., eds. ed. Mammal Species of the World (3rd ed.). Baltimore: Johns Hopkins University Press, 2 vols. (2142 pp.). pp. 3–18. ISBN 978-0-8018-8221-0. OCLC 62265494. http://www.bucknell.edu/msw3

[3] ttp://www.pulsodigital.net/2011/07/la-batalla-de-las-zarigueyas-vs-las.html

[1]

[2]

[3]