Sedum clavatum
.jpg)
Sedum clavatum kitukeytijket ne Tajtamatianimet se kwawitchín iwan iiswayu tepuntik kaj witz ka Meshiku. Yaja nemi tik ne ujustut unisan ne tepet itukey Nevado de Toluca.
Ne itachishka ne Sedum clavatum
Ini kwawitchín kipia miak "itzujtzuntekun", sejsé iwan miak ijiswayu kaj yawit kachka ne ijiswayu ne ikuyu ichti. Ne iiswayu yaja chikitik, tepuntik, wan kachka yawal patznaj wan kipia kuistak itewyu. Ne itzinu ini kwawitchín chamawak wan kipia wey at ka ijtik. Ne ishuchiyu yaja istak wan kipia sejsé makwil ishuchiiswayu wan makwil istak wan tultik ichti, yaja kachka se sital. Ne ishuchiyu nemi sejsé ka ijpak se "imajkul" ne kwawitchín kaj kipia miak ijiswayu ukchupi chijchikitikchichín. Ne itzinkutu ne kwawitchín kuchiltik keman yankwik wan istak nemanha. [1]
¿Ken tiwelit tikmutkitiliat ne Sedum clavatum?
Pal tikpiat uksé kwawitchín, tiwelit tiktekit se iswayu yaja, wan nemanha tiktekat ka ijpak ne tal. Ini iswayu yaw-kipia ne itzinkutuchín wan ne iiswayuchín isel, wan se yankwik kwawitchín yaw-nemi. Tiwelit nusan tikutunat se "itzuntekun" ne kwawitchín wan tiktukat ini pal kipia itzinkutu isel. Tiwelit tiktaliat ini kwawitchín kan tachia ne tunal ka peyna. Nemi pal tikajwiliat se tanestuk wan tikchiat majtakti tanestuk u keman ne iiswayu ka tani waktuk pal tikajwiliat senpa. Su tikajkawat ma ne at wetzi ka ijpak yaja mujmusta ka shupan, yaja yaw-palani. [2] [3] Nemi se papalut itukey Callophrys xami kaj tapishua ka ijpak ne iiswayu ne Sedum clavatum wan ka ijpak ne iiswayu ujuksé kwajkwawitchichín iwan tepuntik iiswayu, wan keman kisa ne kwilinchín kikwa ne kwawitchín. [4] [5]
Ijilpika:
- ↑ https://www.llifle.com/Encyclopedia/SUCCULENTS/Family/Crassulaceae/28223/Sedum_clavatum
- ↑ https://succulentcapital.com/sedum-clavatum/
- ↑ https://clubsuculentas.com/crassulaceae/sedum/sedum-clavatum/
- ↑ https://es.wikipedia.org/wiki/Callophrys_xami
- ↑ https://arthropoda-mexicana.blogspot.com/2012/09/callophrys-xami-mariposa-en-planta.html