Wp/ppl/Rigoberta Menchú Tum

Rigoberta Menchú Tum

Rigoberta Menchú Tum nesik se tunal chiknawi pal ne metzti se tik ne shiwit se shikipil chiknawi tzunti ume pual kashtul nawi (1959) tik Chimel, itechan San Miguel Uspantán, takutun ipal italyu El Quiché, Guatemala katka. Yaja kipia yey pual makwil shiwit.

Ne wey siwat tapalewiani Maya Quiché.

Yaja siwat tapalewiani wan tasumani Maya Quiché inpal tajtamakishtilis inpal tuijikniwan ijikman.

Ne itunal ichtaka

Ne iteku itukey Vicente Menchú Pérez, tatuktiani kinpalewia ne tajtatukanimet tik ne intechan, wan inan itukey Juana Tum Kotoja, tajpiani kipalewia ne sijsiwatket kipunit ne inshujshulutket katka.

Keman kipia makwil shiwit, Menchú pewa tekiti inwan itejtekuwan tik ne ishachi kajkal inpal tuijikniwan pujpujpudiente tik ne intalyu. Keman siwapil, tekitini tik ne kal keman ume shiwit tik ne wey techan Guatemala.  

Tik ne shiwit se shikipil chiknawi tzunti nawi pual (1980) tajtiapianimet pal ne kalpuli Guatemalachanej kinwikat, kinchaluat wan kinmiktiat ne imanuj Patrocinio wan inan Juana. Kintatiat ne iteku Vicente wan ukse tuijikniwan ijikman kalijtik pal ne España tik uni shiwit nusan katka. Tik ne shiwit se shikipil chiknawi tzunti nawi pual nawi (1984), kimiktiat ne ukse imanuj Victor. Kinmiktiat ne imiekawan keman ne wey tasumalis pal italyu tik Guatemala katka.

Tik ne shiwit se shikipil chiknawi tzunti nawi pual kashtul, Menchú munamiktia Guatemalachanej Ángel Canil tik ne ilwit Maya. Munamiktiat tik ne tiupan Católica nusan tik ne metzti se pal ne se shikipil chiknawi tzunti nawi pual kashtul yey (1998). Kitalpachua ne iukichkunew itukey Tz'unun (“witzitzil” tik tajtaketzalis Maya) tik ne metzti majtakti ume pal uni shiwit nusan. An kipia se itiskalukichkunew itukey Mash Nahual Ja’ (“tunal pal ne at” tik tajtaketzalis Maya).

Tay kichiwa?

Ne kalpuli tik Guatemala kichiwa ne tatuktialis ka kinmiktia miak tuijikniwan ijikman Maya katka. Yajika Menchú muilpia ne itekiw pal kinpalewia chichiuk wan kuiwisnaj tuijikniwan ijikniwan tik ne italyu katka. Tekiti iwan Comite Unidad Campesina tik ne shiwit se shikipil chiknawi tzunti yey pual kashtul nawi (1979).

Tik ne shiwit se shikipil chiknawi tzunti nawi pual se (1981), Menchú chulua ne italyu ka Mexico wan ne uijikniwan Catolicoj kipalewia katka. Kitajtawelia ne kalpuli Guatemalchanej inwan ukse intajtalyu wan kajkalpuli ika kinmiktijket miak tuijikniwan ijikman tik ne Organización de las Naciones Unidas (ONU) katka. Tekiti inwan ukse tuijikniwan ijikman wan kichiwat ne Declaración de los Derechos de los Pueblos Indígenas katka.

Tik ne shiwit se shikipil chiknawi tzunti nawi pual majtakti ume (1992), kimakat ne Premio Nobel de la Paz tik ne Oslo, Noruega katka. Mechú ne achtu tuknew ikman kipia se Premio Nobel katka. Iwan ne itumin, kichiwa ne Fundación Vicente Menchú ka kinpalewia wan kintajpia ne tuijikniwan ijikman tik ne italyu katka.

Menchú wan ukse sijsiwatket ijikman kinchiwat ne Iniciativa de Mujeres Premio Nobel de Paz wan ne Fundación Peace Jam katka. Muilpia iwan ne Asociación Política de Mujeres Mayas katka. Ne Consejo General de la Universidad de Guadalajara (1993), ne wey tamachtiluyan Centroamericana (UCA) ne wey tamachtiluyan ipal Nicaragua (1992), ne wey tamachtiulyan Universidad Nacional ipal Kuskatan (1993), ne wey tamachtiulyan Nacional ipal Costa Rica (1993), ne wey tamachtiuluyan ipal Oklahoma, Estados Unidos (1993), wan ne wey tamachtiluyan de Cochabamba, Bolivia (1993) kimakat ne wey ajamat honoris causa ika ne itekew kitajtani ne tamakishtilis inpal tuijikniwan ijikman katka.

Ne itekew: Ne ajamachti ipal Menchú

Me Llamo Rigoberta Menchú y Así me Nació la Conciencia (1983)

La Nieta de los Mayas (1998)

Ijilpika:

"Rigoberta Menchú, activista de los derechos humanos de Guatemala y ganadora del Premio Nobel de la Paz": https://www.cndh.org.mx/noticia/rigoberta-menchu-activista-de-los-derechos-humanos-de-guatemala-y-ganadora-del-premio-nobel

Menchú Tum, Rigoberta: http://enciclopedia.udg.mx/biografias/menchu-tum-rigoberta

Rigoberta Menchú Tum: https://www.myt.org.mx/tolerancia_url/rigoberta-menchu-tum