Ne Mijtutilis pal ne Pajpataninimet
Ne Mijtutilis pal ne Pajpataninimet se lilish, wan nusan se mijtutilis, kan yejemet kitaliat se tumak kwawit waktuk ka ijpak ne intajkutechan, pal kia né makwil tajtakamet tejkut ka itzunpan uni kwawit. Keman ne makwil tajtakamet tejkutiwit ka né, se kipitza ne itaishpitzalis, ijkatuk yaja ka ijpak ne itzunpan ne kwawit, wan ne uknawi muilpijket sejsé iwan sejsé mekat weyak, ini mejmekat kinsentaliat intzijtzinkujku iwan ne itzunpan ne kwawit; ne mejmekat nemit ka ijpak uknawi kwawitchín, kachka se nawi itech, mutekatuk ka itzunpan ne uksé tumak kwawit pal tesu kinhajkawa ne Pajpataninimet ma pa’ wetzikan ka talchi. Ne nawi itech nemi nusan ka né pal tesu muilpiat ne mejmekat. Ne Mijmijtutianimet muilpijketa patanit keman nejmachchín wetzit ka talchi, kwak ne uksé takat kipitza ne itaishpitzalis. Siujsiujti, su tuijikniwan matzutzunat, ne Pajpataninimet kitzkiat ijiikshi; uni sujsul uej pal kichiwat. Sejsika Patanini muyawalua majtakti yey ujti kwak wetzi ka talchi. [1]
¿Kan kichiwat ini Mijtutilis?
Tejtechanchanejket pal miak tejtechan tik Meshiku wan Guatemala kichiwat ini mijtutulis. Kichiwat yaja ne tejtechanchanejket pal Papantla, Veracruz, Meshiku, kaj tajtaketzat Totonakotaketzalis; nusan ne Najnawamet pal Cuetzalan, Puebla, Meshiku; nusan ne tejtechanchanejket pal San Pedro Tarímbaro, Michoacán, Meshiku; nusan ne tejtechanchanejket pal Santo Tomás Chichicastenango, Verapaz, Guatemala, kaj tajtaketzat Kichetaketzalis. [2]
¿Taika pejki ini Mijtutilis?
Keman yejemet wetzit ka talchi kachka keman wetzi ne at, ini at techpalewia pal mulinit ne dajdatka nemit ka ijpak tutalyu; yajika ini mijtutilis kachka se datka techpalewia tikpiat más tumiekawan.[3]
Ini mijtutilis sujsul ikman, yejemet mijtutijtuyata kia né keman Tajtzin Jesucristo teuk walajtuk ka Taltikpak. Ne Tajtamatianimet tesu kimatit taika ne tuijikniwan ijikman kichiwat katka ini mijtutilis.
Ijilpika:
- ↑ https://es.wikipedia.org/wiki/Rito_de_los_voladores
- ↑ https://mexicorutamagica.mx/2022/01/14/voladores-de-san-pedro-tarimbaro-historia-patrimonio-unesco/
- ↑ https://ich.unesco.org/es/RL/la-ceremonia-ritual-de-los-voladores-00175#:~:text=La%20ceremonia%20ritual%20de%20los%20voladores%20es%20una%20danza%20asociada,situado%20al%20este%20de%20M%C3%A9xico.