Wp/ppl/Miktan

Sejse kimatit ka kwak timikit welit tiawit ka Miktan. Inat ka né muajsit miak ká miktiwit.

Ne Wikipediaj Tik Nawat Achtu Iswat pal Wikipediaj Tepalewilis Tajtaiwan Chinamit

Tik miak tajtayulmatilis kimatit ka kwak timikit welit tiawit ka Miktan. Ini, tikitat ken ne miktan ipal ne Budatamatinit, itukay Naraka.

Tik sejse tapualis ipal ne Pipilmet pal ikman, inat ka ajakaj ajsik kan nemit ne mikinimet wan kitak ken nemit wan tay kichiwat. Sejse inat ka se takat kitzajtzak ne ijish wan kwak kitajtapuj, nemia ijtik ne tepet kan yawit ne ikman miktiwit. Inat ka nemi se wey haciendaj wan miak takamet. Yejemet tekitit. Nemi se wey puchut ne kipachua ne tepet. Né kimiktiat se takat wan kimanat wan kimakat chiujchiupi sejse pal kikwat, wan musta yajuni muita senpa wan tekiti ken senpa. Ka ikuni tatuktia ne itekuyu ne tepet, ne tachia tay kichiwat muchi.

Ne Cristianojmet inat ka tik ne Miktan nemi se wey tit kan ne takamet wan siwatket tatat pal senpa.

Nusan sejseuk inat ka nemi se Miktan. Ne Greciajtakamet ipal ikman inat katka ka kwak timikit tiawit tipashaluat sujsul wejka hasta tiajsit se tal kan semaya welit kalakit ne miktiwit.

Ne Cristianojmet kimatit ka ijtik ne Miktan nemi se wey tit kan ne takamet wan siwatket ne tateyekchijtiwit wan te muyulpatatiwit yawit tatat senpa. Inat ka su tejemet timuyulkwitijtiwit wan timuyulpatatiwit, ne Teut yawi techtapupulwia melka tikchijtiwit tay te yek; kwak timikit tiawit nemit tik ne ilwikak. Su te ijkiuni, inat ka tiawit nakat tik ne Miktan. Nusan inat ka ne takamet wan siwatket ne tayulmatit ken ne Metzali pal ikman wan te mukwepat Cristianojmet yasnekit ka Miktan.

Sejse te kimatit ka nemi se Miktan, wan inat ka tesu ijkiuni.

Ne palabraj miktan nusan kineki ina kan nemi sujsul wey at, ken su se kitaliskia ne ijikshi ijpak ne ashal itan ne at, ne itzuntekun te kisaskia. Nusan kineki ina se shaput kan uij ma tikisakan ika sujsul wey.