Metzti

Ne metzti isel ne metzti pal ne taltikpak. Yaja kiyawaltulia ne taltikpak ka yey tzunti nawi pual nawi shikipil nawi tzunti (384,400) kojkilometroj. Ne metzti kiyawaltulia ne taltikpak ka se pual chiknawi tanestuk.

Ne tal pal ne metzti.

Yaja ne makwil metzti tumak pal ne tusental^[1]. Ne metzti kichiwki keman se talsital, yaja itukey Theia, kichaluj ne taltikpak.

Tik ne metzti kanaj tejtet, tejtepet, ijiishmiktan, wan tit kiseselij^[2]. Ne metzti kimaka yultajtaketzalis ka ne tuijikniwan.

Ken itachishka?

Ne metzti witz wan yawi.

Ne metzti ishtikaya tzitzinaka ika ne tunal ishtikaya. Ne iekawyu pal ne taltikpak kichiwa ka ne metzti witz wan yawi. Keman witz wan yawi ne metzti itukey:

Yankwik metzti
Selek metzti (witz)
Metzti chikawtuk (witz)
Tentuk metzti
Yanekia metzti (yawi)
Chikitia ne metzti (yawi)

Ne metzti tesu tzitzinaka keman panu intzalan pal ne tunal wan ne taltikpak. Yaja itukey kwalu ne tuanl. Nusan ne metzti tesu tzitzinaka keman ne taltikpak panu intzalan pal ne tunal wan ne metzti. Yaja itukey kwalu ne metzti.

Keman ne metzti itachishka achiuk.

Yaja ishtikaya itachiska kuneshnaj, melka kemanian itachishka achiuk, chiltik, u tultik.

Tay kichiwa?

Ne metzti kichiwa ne taltatemilis^[3] wan ne kashawika. Yaja kitilana ne wey puyek at pal ne taltikpak.

Buzz Aldrin tik ne metzti.

Ne tuijikniwan ejkuket ne metzti. Se tunal se pual pal ne metzti chikume tik ne shiwit se shikipil chiknawi tzunti yey pual nawi (1969), Neil Armstrong wan Buzz Aldrin ne achtu tuijikniwan ka nejnemket tik ne metzti. Neil Armstron kilwij - Naja nikmaka ninejnemi chikitik chupisan ipal ne tuknew, wan naja nitzijtzikwini inpal ne tuijikniwan.

Ne kwalu ne tunal tik Texas pal 2024.

Ne metzti nemi kilpia^[4] iwan miak tajtzin wan nanztin pal miak tejtechan. Tik China, ne metzti nemi kilpia^[4] iwan ne nanztin Chang'e, ne tajtzin Tu'er Ye, wan ne tuchti pal ne metzti. Tik Meshiku, ne metzti nemi kilpia^[4] iwan ne Coyolxāuhqui, ne nantzin Metztli wan ne tajtztin Tecciztecatl. Tik Kuskatan tejemet tutajtatanoywan yejemet kilwiat ka keman kwalu ne tunal u kwalu ne metzti wetzi kukulis ka ne taltikpak.