Wp/ppl/Haunani-Kay Trask

Haunani-Kay Trask

Haunani-Kay Trask nesik se tunal yey pal ne metzti majtakti tik ne shiwit se shikipil chiknawi tzunti ume pual nawi (1949) tik San Francisco, California tik Estados Unidos katka. Yaja Kanaka Maoli, Chinachanej, Caucasiachanej. Kiskaliat tik O’ahu, Hawái katka.

Ne panti ipal Movimiento Hawaiano de la Soberanía

Yaja siwat tamachtiani, takwikani, tapalewiani, tamawawasuani wan tekitini pal ne tamakishtilis inpal tuijikniwan ijikman Hawáichanej wan ipal intalyu katka. Yaja tatuktiani inpal ne Movimiento Hawaiano de la Soberanía wan Ka Lahui Hawaii nusan katka.

Ne itunal ichtaka

Ne iteku itukey Bernard Kaukaohu Trask, tapalewiani, wan inan itukey Haunani (Cooper) Trask, tamachtiani pal ne chikitik tamachtiluyan katka.

Yaja kinpia nawi iikawan katka. Ne iikawan intukey Mililani Bernardette Trask, Kahala-Ann Trask Gibson, Damien Onaona Trask wan Michael.

Trask munamiktia iwan David Stannard.

Tay kichiwki?

Haunani-Kay Trask mumachtia ne casoj Hawáichanej tik ne Universidad de Hawái en Mānoa wan mumachtia ne ciencias politicas tik ne Universidad de Wisconsin-Madison kan kinajshitilia ume wey ajamat katka. Nemanha Trask tatuktiani tik ne Centro de Estudios Hawaianos de la Universidad de Hawái en Manoa, kan yaja ne achtu siwat Kanaka Maoli tamachtiani nusan katka.

Trask kineshtia wan kimawawasua inpanpa tuijikniwan ijistakchichin wan pujpujpudiente wan ne Estados Unidos kikwi ne tal tik Hawái katka. Kineshtia inpanpa miak pajpashaluanimet ika kinhijtakua ne intzijtzinweyaka, ne incajcasoj, wan ne intal katka. Miak sijsiwatket puliwit inpanpa miak pajpashaluanimet ijistakchichin wan pujpujpudiente ejkut ka Hawái.

Ne Reina Lili’uokalani

Tik ne shiwit se shikipil chiknawi tzunti nawi pual majtakti yey (1993), Trask kintuktia kashtul shikipil Kanaka Maoli tuijikniwan kaj nejnemit ka ujti katka. Kitajtanit Estados Unidos kikwepilia ne intal katka. Nejnemit ka ujti nemanha se tzunti shiwit keman Estados Unidos kitzkiat ne Reina Lili’uokalani tik ne shiwit se shikipil chikwey tzunti nawi pual majtakti yey (1893). Tik ne shiwit se shikipil chikwey tzunti nawi pual kashtul yey (1898), ne EEUU kiputzuat Hawái iwan ne italyu. Hawái kalpuli pal EEUU tik ne shiwit se shikipil chiknawi tzunti ume pual kashtul nawi (1959).

Keman nejnemit ka ujti, Trask mutuskapelua wan kinhilwia ka ishpan ne Palacio Iolani tik Honolulu:

“Tejemet tesu tiamericanchanejket. Timikit tihawáichanejket. Te keman tiamericanchanejket.”

Yaja mutekitilia pal ne tamakishtilis inpal tuijikniwan ijikman tik ne Naciones Unidas katka. Tik ne shiwit ume shikipil kashtul nawi (2019), kitakuliat se takulis itukey Premio Angela Y. Davis ika ne itekew pal ne tamakishtilis inpal tuijikniwan ijikman Hawáichanej katka.

Ne itekew: Ne ajamachti ipal Haunani-Kay Trask

Eros and Power: The Promise of Feminist Theory (1981)

From a Native Daughter: Colonialism and Sovereignty in Hawai’i (1993)

Light in the Crevice Never Seen (1994)

Night Is a Sharkskin Drum (2002)

Ku’e: Thirty Years of Land Struggle in Hawai’i (2004)

Ken mikik?

Trask miki tik ne shiwit ume shikipil se pual se (2021) tik Honolulu, Hawái kwak kipia yey pual majtakti se shiwit ipanpa ne cáncer katka.

Ijilpika:

HAUNANI KAY TRASK (1949-2021): https://mujeresbacanas.com/haunani-kay-trask-1949-2021/

Haunani-Kay Trask: https://nuhw.org/haunani-kay-trask/

“Remembering a Hawaiian Hero: Haunani-Kay Trask and Her Fight for the Rights of Native Hawaiians”: https://www.culturalsurvival.org/news/remembering-hawaiian-hero-haunani-kay-trask-and-her-fight-rights-native-hawaiians

Entrevistas con Haunani-Kay Trask: https://www.kaainamomona.org/haunani-kay-trask

“AANHPI Month: Celebrating Scholar and Advocate, Dr. Haunani-Kay Trask”: https://www.aauwhonolulu.org/post/aanhpi-month-celebrating-scholar-and-advocate-dr-haunani-kay-trask

“In memoriam: Haunani-Kay Trask, exemplary Native Hawaiian scholar”: https://www.hawaii.edu/news/2021/07/03/in-memoriam-haunani-kay-trask/

“Haunani-Kay Trask, Champion of Native Rights in Hawaii, Dies at 71”: https://www.nytimes.com/2021/07/09/us/haunani-kay-trask-dead.html