چینی بولی دنیا نیاں سبھاں بولیاں تھوں وکھ ہے۔ اس وچ نہ حروف تہجی، نہ قواعد تے نہ ہی حرفاں نی ونڈ۔ ہر اک حرف چار تھوں نو لہجیاں وچ ادا کیتا جائی سکنا۔ چینی وچ عام گل بات واسطے وی دو تھوں ترے ہزار لفظ ورتے جاݨے ہن۔ چینی لکھن نا طریقہ وی عجیب جیہا ہے۔ اخبار یا معمولی کتاب پڑھن واسطے وی ساڈھے ترے ہزار نشاݨ اچھنے چاہی نے ہن۔ چینی لکھن واسطے ہر حرف ڈنگیاں پھڑنگیاں لیکاں نال رلی تہہ بننا، جنہاں کی سٹروک آکھیا جاݨا ہے۔ بنیادی طور اپر چینی لپی وچ 12 سٹروک ورتے جاݨے ہن۔
درجہ بندی edit
ماہر لسانیات چینی کی چینی تبتی بولیاں نی اک شاخ مننے ہن۔ چینی بولی، تبتی بولی، برمی بولی تے سلسلہ کوہ ہمالیہ وچ بولیاں جان آلیاں دوویاں بولیاں نی بہݨ ہے۔ چینی تبتی بولیاں نا سلسلہ کوہ ہمالیہ تھوں علاوہ جنوب مشرقی ایشیا تھوں وی ٹریا ہے۔
تاریخ edit
چینی نی پہلی لکھت 3000 سال پچھے شانگ ٹبر نے عہد حکومت وچ لبھݨی ہے۔ اس تھوں بعد ایہہ بولی پھلنی پھلنی ریہی تے اس نیاں کئی پڑبولیاں بنی گئیاں۔ چینی حکومت ہمیش اک پڑ بولی اپر زور دیݨی رہی ہے تا کہ ملکے وچ گھٹ و گھٹ اک بولی تے پڑبولی سارے سمجھ سکن۔