Wp/phr/پوٹھواری

پوٹھواری یا پہاڑی اک ہند-آریائی زبان ہے، جیہڑی راولپنڈی، گوجر خان، تحصیل کلر سیداں، تحصیل کہوٹہ، کوٹلی ستیاں، ضلع مری، جہلم نی تحصیل سوہاوہ، آزاد کشمیر نے ضلع کوٹلی، بھمبر، میرپور، باغ، راولاکوٹ، مظفرآباد تے جموں و کشمیر نے راجوری تہہ پونچھ وچ ماڑے موٹے فرقے نال بولی جاݨی ہے۔

ہور ناں

پوٹھواری کی بھمبر تے راجوری نے علاقیاں وچ پہلیں چبھالی آکھیا جاݨا سی۔ ضلع میرپور نی بنیاد پر کئی لوک اس کی میرپوری وی آکھݨے ہن۔ مری تہہ جموں و کشمیر نے علاقیاں وچ اس کی پہاڑی وی آکھݨے ہن۔ پونچھ نے علاقیاں وچ اس کی پونچھی وی آکھیا جاݨا ہے۔

اختلاف

پوٹھواری نے الگ زبان ہوݨے یا اس نے پنجابی نی اک پڑبولی ہون نے حوالے نال ماہر لسانیات وچ اختلاف ہن۔ کئی ماہر لسانیات نے مطابق ایہہ پنجابی نی ہی اک پڑبولی ہے تے کئیاں نے مطابق ایہہ اک وکھ بولی ہے۔ گریرسن پوٹھواری کی پنجابی نی اک پڑبولی آکھیا ہے۔ اس تھوں علاوہ پنجابی یونورسٹی پٹیالہ وی اس کی پنجابی نا لہجہ آکھیا ہے۔ جموں و کشمیر وچ اس کی اک بکھ بولی نا درج حاصل ہے تہہ اس کی سکولاں وچ وی پڑھایا جاݨا۔