Moskau (rusch Москва, Moskwa) es dee Hauptstaut vonne Rusche Feederatioon (Russlaunt). Mett rum 10,4 Miljoone Ennwohna (2006) enne Staut en 14,6 Miljoone (2007) enne Jeajent runtromm es Moskau dee jratste Staut en daut jratste Stautjebiet en Euroopa.
Moskau es daut politische, wirtschauftliche en kulturelle Zentrum von Russlaunt mett Hochschoole en Fachschoole en uck seea vele Tjoatje, Teautasch, Museee, Galeriee en dem 540 Meeta hohen Ostankino-Torm. Moskau es dee zetraule Sted vonne Rusch-Ortodoxe Tjoatj: Dee Patriarch residet em Danilow-Kloosta. Dee jratsta rusch-ortodoxa Tjoatjebu es dee Moskausche Tjristus-Erleesa-Katedraul. Em Stautjebiet von Moskau jefft daut ewa 600 Tjoatje. Vom 16. Joahundat aun word Moskau uck aus Drettet Room betetjent.
Dee Kreml en dee Rooda Plautz em Zentrum von Moskau stone vonne 1990 aun oppe UNESCO-List vom Weltkultua-Oawgoot. Mett acht Wiedereis-Bohnhoffs, dree internationale Loftschepphowes en dree Schepp-Bennahowes es dise Staut dee wichtichsta Transportknoppe en dee jratste Industriestaut von Russlaunt.