Isihlathululimagama/isihlathululimezwi.
Isingeniso
Isihlathululimagama, abanye basazi bona sihlathululimezwi, sisetjenziswa esinehlathululo ebudisi khulu. Asinayo ihlathululo eyodwa. Kodwana ngokuya kuka-Bejoint[1] (2002:9) ihlathululo yesihlathululimagama kufanele ifake izinto nanzi ezilandelako:
a) isihlathululimagama silirhelomjeje weendima ezihlukeneko.
b) isihlathululimagama senzelwe ukubonisa.
c) iinhlathululimagama zinamaphahla amabili.
d) Isihlathululimagama siziinqhema ezihlelwe ngokulandelana.
e) isihlathululimagama siyingcenye yamarhelo welimi.
f) Isihlathululimagama siyincwadi yokulayela nokufundisa.
g) Isihlathululimagama sinikela ngelwazi elimayelana namatshwayo welimi.
h) Isihlathululimagama kusisethulo esihleliweko seengcenye eziquntwe ngaphambilini zeenhlathululimagama.
Amaphuzu angehla la, aveza isihlathululimagama ngokuya kwemisebenzi neendingo zaso. Nanyana kunjalo, kuba budisi khulu ukuthola ihlathululo efaka woke amaphuzu abalwe ngehla la.
UGau[2] ngomnyaka ka-2010, wahlathulula isihlathululimagama wathi, sisetjenziswa nanyana sitjabagelo leso esisetjenziselwa ukufunda nokunabisa ilwazi ngokusiqalisisa erhubhululweni. Ihlathululo engehla le, inqophe khulu kubarhubhululi nabafundi labo abafunda ukurhubhulula ngesihlathululimagama kanye nokuzwisisa isihlathululimagama emikhakheni yezefundo nesayenzi.
U-Singh[3] ngomnyaka ka-2010, waba nehlathululo ehlukileko yesihlathululimagama lapho athi, isihlathululimagama yincwadi yeriferensi mayelana namagama nanyana amathemu. Ihlathululo le inqophe, khulukhulu, kuwo woke umuntu osebenzisa isihlathululimagama ngebanga lesitjhijilo nanyana Isidingo anaso. Isidingo nanyana isitjhijilo leso kungenzeka bonyana ngesekulumo ejayelekileko nanyana somkhakha okhethekileko. Ihlathululo kaSingh[3] (2010) esitjela khona kukobana isihlathululimagama sisetjenziswa esinikela ngeensombululo zelimi nethintwana lelimi lelo elisetjenziswako msebenzisi oqothelweko.
Ihlathululo yesine siyinikelwa nguLampung[4] (2016) lapho athi, isihlathululimagama silirhelo lamagama arhenyiswe ngokulandelana kwamaledere lelo elethula ihlathululo begodu linikela nelwazi lokuphimisa iinhlathululo nemvelaphi yawo. Ihlathulullo le inqophe khulu kusayensi yezokutlanywa kweenhlathululimagama leyo ebizwa ngokuthi iLezikhografi. Ukungezelela, ibuye ikhulume ngesakhiwo sangaphakathi nanyana selwazi langaphakathi lesihlathululimagama.
Ihlathululo yokugcina siyinikelwa ngu-Bergenholtz [1](2012) nakathi, isihlathululimagama siyincwadi yamagama ahlelwengelandelwano nelwazi mayelana nokupeleda, iingaba zamabizo namatjhugululo wamagama alethwa lilimi neenhlathululo zamagama nanyana inrhunye lawo ukuya kwelinye ilimi. Nawutjheja ihlathululo le, uzokuyelela bonyana ilinge ukufana isakhiwo nemisebenzi eyenziwa sihlathululimagama. Nawuyifundako uyazi bonyana ulindele miphi imisebenzi begodu ulindele ukuthola ini ngaphakathi kwesihlathululi magama.
Isiphetho
Iinhlathulumagama ezingehla lezi zoke zinqophile, begodu zitjengisa imisebenzi, isakhiwo kanye nomhlobo wencwadi lo obizwa bonyana sihlathululimagama bonyana unjani. Ngalokho, kungakho sivezile ekuthomeni bonyana ihlathululo yesihlathululimagama ibudisi ukuyihlathulula ngehlathululo eyedwa, ngebanga lesakhiwo nemisebenzi yaso.
Umthombolwazi
- ↑ 1.0 1.1 Béjoint, H. (2002). ‘An introduction of modern lexicography’. Beijing: Foreign Teaching and Research Press.
- ↑ Gao, L. (2010). ‘Historical Background of the Translatological Dictionaries’. Journal of Language Teaching and Research. 1(3):285-294.
- ↑ 3.0 3.1 Singh, P. (2010). ‘Dictionary and Its Structure’. In Research Journal of Indian Cultural, Social & Philosophical Stream Mehta, Edited by M. K. Mehta. ANUSILANA 24. Manvi Seva Samiti: 1-6.
- ↑ Lampung, I. R. I. (2016). ‘Dictionary Usage in English Language Learning’. English Education:Journal Tadris Bahaa Inggris. 9(1):186-197.