Idatha, umniningwana nelwazi
Isingeniso.
Idatha, umniningwana nelwazi zizinto ezingafaniko lezo ezitjengisa izinga elithe lobuhlakani kanye nethuthuko yomqabango. Nanyana, kukhona abazisebenzisa njengezinto ezifanako nje, kodwana ekhabo lazo azifani. Esigabeni esilandelako sizokuhlathulula idatha, imininingwana nelwazi begodu siveze nomehluko wazo.
Idatha.
Idatha mitlolo leyo ebuthelelweko nanyana imitlolo leyo engaka engaka fundwa begodu engaka ungwa yazwisiswa. Ngamanye magama imitlolo leyo ongakayifundi begodu ungazi bonyana ikhuluma ngani ngokuneneleleko ibizwa bona yidatha.
Isibonelo, lokha nawubuthelelwa imitlolo uyibeke nawonye ukuthi kusasa uzoyiqala, uyifundele ukuyizwisisa begodu uyirhumutjhe, leyo mitlolo yidatha.
Imininingwana
Umniningwana yidatha esele ifundiwe, yazwisiswa begodu yarhunyuthwa. Ngamanye amagama imitlolo leyo ehlungiweko begodu yazwisisa bonyana ikhuluma ngani begodu inqophe kuphi, leyo mitlolo nanyana idatha ibizwa ngokuthi mininingwana.
Isibonelo, lokha nawuthatha imitlolo yakho oyibutheleleko uyifunda begodu uyizwisisa bonyana ikhuluma ngezamaphilo nemitjhoga, imitlolo leyo ibizwa bonyana mininingwana.
Ilwazi
Ilwazi mniningwana leyo osele uyisebenzisile begodu wazi imiphumela yakhona emihle nemimbi. Ngamanye amagama, lokha nawuthatha imininingwana uyisebenzise ukwenza into ethize bese uyaphumelela nanyana uyabhalelwa ukufinyelela umnqopho wakho, imininingwana leyo ibizwa bonyana lilwazi. Isibonelo, nawuthatha imininingwana yokubhaga amatjhatjhatjha bese ilandela imilayo yawo ukwenza amatjhatjhatjha. Ekugcineni, ugcine uwenzile amatjhatjhatjha nanyana akuhlulile, imininingwana leyo ibizwa bonyana lilwazi ngombana uyisebenzisile begodu uyazi bonyana imiphumela yayo iba njani.
Isiphetho
Idatha ikhombisa izinga lokuthoma lobuhlakani bese kuthi umniningwana wona ukhombise izinga eliphakathi lobuhlakani. Kanti-ke, ilwazi lona likhombisa ilwazi eliphezulu lobuhlakani. Idatha, umniningwana nelwazi azifani kodwana ziyahlobana njengombana umtlolo ukuze ube mniningwana uthoma ube yidatha begodu ukuze umniningwana ube lilwazi ufuna ukusetjenziswa begodu kwaziwe umphumela wakhona. Kuqakathekileko bonyana siwazisise woke amathemu la.