Wp/nod/ᩈᩯ᩠ᨦ

ᩈᩯ᩠ᨦ,​​ ᩈᩯ᩠ᨦᩈ᩠ᩅ᩻᩵ᩣ᩠ᨦ,​ ᩈᩯ᩠ᨦ​ᨴᩦ᩵​ᨲᩣ​ᩉᩢ᩠ᨶ,​ ᨣᩤ​ ᩁᩘᩈᩦ​ᨴᩦ᩵​ᨲᩣ​ᩉᩢ᩠ᨶ​ ᨾᩯ᩠᩵ᨶ​ᨤᩨ​ᩁᩘᩈᩦ​ᨤᩖᩨ᩵ᩁ​ᨾᩯ᩵​ᩉᩖᩮᨠᩡᨼᩱᨼ᩶ᩣᨴᩦ᩵​ᨠᩯ᩠᩵ᨶ​ᨲᩣ​ᨡᩬᨦ​ᨾᨶᩩᩔ᩼​ᨹᩬᩴ᩵​ᩉᩢ᩠ᨶ​᪩​ ᩈᩯ᩠ᨦ​ᨴᩦ᩵​ᨲᩣ​ᩉᩢ᩠ᨶ​ᨾᩦ​ᨤ᩠ᩅᩣ᩠ᨾ​ᨿᩣ᩠ᩅ​ᨤᩖᩨ᩵ᩁ​ᩀᩪ᩵​ᨶᩲ​ᩉ᩠ᩅ᩶ᨦ ᪄᪀᪀-᪇᪀᪀​ ᨶᩣᨶᩰᨾᩮᨲᩕ​ (nm) ᨪᩮᩥ᩠᩵ᨦ​ᨴᩮᩢ᩵ᩣ​ᨠᩢ᩠ᨷ​ᨤ᩠ᩅᩣ᩠ᨾ​ᨳᩦ᩵​ᩉ᩠ᩅ᩶ᨦ​ ᪇᪅᪀-᪄᪂᪀​ ᨵᩮᩁᩌᩮᩥᩁ᩠ᩈ᩼​ ᩓ​ᩁᩬ᩶ᨦ​ᩅ᩵ᩤ​ᩈᨻᩮᩢ᩠ᨠᨴᩕᩢ᩠ᨾ​ᨴᩦ᩵​ᨲᩣᩉᩢ᩠ᨶ​ (visible spectrum)᪩​ ​ᩉ᩠ᩅ᩶ᨦ​ᩈᩯ᩠ᨦ​ᨴᩦ᩵​ᨲᩣ​ᩉᩢ᩠ᨶ​ᩀᩪ᩵​ᨲᩥ᩠ᨯ​ᨠᩢ᩠ᨷ​ᩁᩘᩈᩦ​ᩋᩥ᩠ᨶᨼᩕᩣᩁᩮ᩠ᨯ​ (ᨤ᩠ᩅᩣ᩠ᨾ​ᨿᩣ᩠ᩅ​ᨤᩖᩨ᩵ᩁ​ᨿᩣ᩠ᩅ​ᩉᩖᩮᩬᩨᩋ​ᩓ​ᨤ᩠ᩅᩣ᩠ᨾ​ᨳᩦ᩵​ᨲ᩵ᩣᩴ​ᩉᩖᩮᩬᩨᩋ​)​ ᨠᩢ᩠ᨷᩁᩘᩈᩦ​ᩋᩢ᩠ᩃᨴᩕᩣᩅᩱᩋᩰᩃᩮ᩠ᨲ​ (ᨤ᩠ᩅᩣ᩠ᨾ​ᨿᩣ᩠ᩅ​ᨤᩖᩨ᩵ᩁᩈᩢ᩠᩶ᨶ​ᩉᩖᩮᩬᩨᩋ​ᩓ​ᨤ᩠ᩅᩣ᩠ᨾ​ᨳᩦ᩵​ᩈᩪᨦ​ᩉᩖᩮᩬᩨᩋ)᪩

ᨠᩯ᩠᩶ᩅ​ᨹᩃᩥ᩠ᨠ​ᨻᩕᩥᨪᩧ᩠ᨾ​​ᨠᩕᨧᩣ᩠ᨿ​ᩃᩣᩴ​ᩈᩯ᩠ᨦ​ᩈᩦ​ᨡᩣ᩠ᩅ​ᩋᩬᨠ​ᨸᩮ᩠ᨶ​ᩈᩯ᩠ᨦ​​ᩈᩦ​ᩁᩩ᩶ᨦ᪩​ ᩃᩣᩴ​ᩈᩯ᩠ᨦ​ᨤ᩠ᩅᩣ᩠ᨾ​ᨿᩣ᩠ᩅ​ᨤᩖᩨ᩵ᩁ​ᩈᩢ᩠᩶ᨶ​​ (ᩈᩦᨯᩯ᩠ᨦ)​ ᩓ​ᨤ᩠ᩅᩣ᩠ᨾ​ᨿᩣ᩠ᩅ​ᨤᩖᩨ᩵ᩁ​ᩈᩢ᩠᩶ᨶ​ (ᩈᩦ​ᨡ᩠ᨿᩅ-ᨶ᩶ᩣᩴᨦᩮᩥ᩠ᨶ)​ ᨯᩱ᩶​ᨿᩯ᩠ᨠ​ᩋᩬᨠ​ᨧᩣ᩠ᨠ​ᨠᩢ᩠ᨶ᪩

ᨶᩲ​ᨴᩣ᩠ᨦ​ᨼᩥᩈᩥᨠ᩠ᩈ᩼​ ᨣᩤᩴ​ᩅ᩵ᩤ​​​​ «​ ​ᩈᩯ᩠ᨦ​ »​ ᨧᩢ​ᨾᩦ​ᨤ᩠ᩅᩣ᩠ᨾ​ᩉ᩠ᨾᩣ᩠ᨿ​ᨠ᩠ᩅ᩶ᩣ᩠ᨦ​ ᨯᩰᩫ᩠ᨿ​ᨶᩢ᩠ᨷ​ᩁ᩠ᩅ᩵ᨾ​ᨻᩱᨳᩮᩥ᩠ᨦᩁᩘᩈᩦ​ᨤᩖᩨ᩵ᩁ​ᨾᩯ᩵​ᩉᩖᩮᨠᩡ​ᨼᩱᨼ᩶ᩣ​ᨩᩩ​ᨤ᩠ᩅᩣ᩠ᨾ​ᨿᩣ᩠ᩅ​ᨤᩖᩨ᩵ᩁ​ ᨷᩴ​ᨨᨻᩕᩰᩬᩡ​ᩉ᩠ᩅ᩶ᨦ​ᨴᩦ᩵​ᨲᩣ​ᩉᩢ᩠ᨶ​ᨴᩮᩢ᩵ᩣ​ᩋᩢ᩠᩶ᨶ᪩​ ᨶᩲ​ᨤ᩠ᩅᩣ᩠ᨾ​ᩉ᩠ᨾᩣ᩠ᨿ​ᨩᩮᩬᩨ᩶ᩋ​ᨶᩦ᩶​ ᩁᩘᩈᩦ​ᨠᩯ᩠ᨾᨾᩣ​ ᩁᩘᩈᩦ​ᩋᩮᩢᨠ᩠ᩈ᩼​ ᨾᩱᨣᩕᩰᩅᩮ᩠ᨷᨼ᩼​ ᩓ​ᨤᩖᩨ᩵ᩁ​ᩅᩥᨴ᩠ᨿᩩ​ ᨣᩴ​ᨶᩢ᩠ᨷ​ᩅ᩵ᩤ​ᨾᩯ᩠᩵ᨶ​ᩈᩯ᩠ᨦ​ᨴ᩠ᩅ᩠ᨿ᪩​ ᨣᩩᨱᩈᩫᨾ᩠ᨷᩢᨲᩥ᩼​ᨣᩮᩢ᩶ᩣ​ᨡᩬᨦ​ᩈᩯ᩠ᨦ​ᨾᩯ᩠᩵ᨶ​ᨤᩨ​ ᨤ᩠ᩅᩣ᩠ᨾ​ᨡᩮ᩠᩶ᨾ (intensity)​,​ ᨴᩥ᩠ᩈ​ᨴᩣ᩠ᨦ​ᨠᩣ᩠ᩁ​ᨻᩖᩯ᩵​ᨠᩕ​ᨧᩣ᩠ᨿ​ (propagation direction),​ ᩈᨻᩮᩢ᩠ᨠᨴᩕᩢ᩠ᨾ​ᨤ᩠ᩅᩣ᩠ᨾ​ᨳᩦ᩵​ᨣᩤ​ᨤ᩠ᩅᩣ᩠ᨾ​ᨿᩣ᩠ᩅ​ᨤᩖᩨ᩵ᩁ​,​ ᩓ​ ᨽᩰᩃᩣᩁᩱᨪᩮᨫᩢ᩠ᨶ (polarization)᪩​ ᨤ᩠ᩅᩣ᩠ᨾᩅᩮᩥ᩠ᨿᨡᩬᨦ​ᩈᩯ᩠ᨦ​ᨶᩲ​ᩈᩩᨬ᩠ᨬᩣᨠᩣ᩠ᩈ​ᨤᩨ​ ᪂᪉᪉​,᪇᪂᪉​,᪄᪅᪈​ ᨾᩮᨲᩕ​ᨲᩬᩴ᩵​ᩅᩥᨶᩣᨵᩦ​ ᩓ​ᨶᩢ᩠ᨷ​ᨸᩮ᩠ᨶ​ᨣ᩵ᩤ​ᨤᩫ᩠ᨦ​ᨴᩦ᩵​ᨻᩨ᩠᩶ᨶ​ᨮᩣ᩠ᨶ​ᨡᩬᨦ​ᨵᩢᨾ᩠ᨾᨩᩣ᩠ᨲ᪩​ ᩈᩯ᩠ᨦ​ᨴ᩠ᩅ᩶ᨦ​ᨻᩱ​ᨯᩰᩫ᩠ᨿ​ᩋᩣᩆᩱ᩠ᨿ​ᩋᨶᩩᨽᩣ᩠ᨣ​ᨾᩪᩃ᩼​ᨮᩣ᩠ᨶ​ᨴᩦ᩵​ᨷ᩠ᨾᩦ​ᨾ᩠ᩅᩁ​ᩁᩬ᩶ᨦ​ᩅ᩵ᩤ​ ᨼᩰᨴᩬᨶ᩼​ ᨪᩮᩥ᩠᩵ᨦ​ᨸᩮ᩠ᨶ​ᨲ᩠ᩅᩫ​ᨴᩯ᩠ᨶ​ᨡᩬᨦ​ᨤ᩠ᩅᩬᨶᨴᩢ᩠ᨾ​ᨡᩬᨦ​ᩈ᩠ᨶ᩻ᩣ᩠ᨾ​ᨾᩯ᩵​ᩉᩖᩮᨠᩡ​ᨼᩱᨼ᩶ᩣ​ ᩓ​ᨣᩴ​ᨸᩮ᩠ᨶ​ᨯᩱ᩶​ᨴᩧ᩠ᨦ​ᨤᩖᩨ᩵ᩁ​ᩓ​ᩋᨶᩩᨽᩣ᩠ᨣ᪩​ ᨠᩣ᩠ᩁ​ᩈᩮᩥᩢ᩠ᨠᩈᩣ​ᨠ᩠᩵ᨿᩅ​ᨠᩢ᩠ᨷ​ᩈᩯ᩠ᨦ​ᩁᩬ᩶ᨦ​ᩅ᩵ᩤ​ᩅᩥᨩ᩠ᨩᩣ​ᨴᩢᩆ᩠ᨶᩆᩣᩈ᩠ᨲᩕ᩼​ ᨪᩮᩥ᩠᩵ᨦ​ᨸᩮ᩠ᨶᩅᩥᨩ᩠ᨩᩣ​ᨴᩦ᩵​ᩈᩣᩴᨤᩢ᩠ᨬ​ᩋᩢ᩠ᨶ​ᨶᩧ᩠᩵ᨦ​ᨶᩲ​ᨴᩣ᩠ᨦ​ᨼᩥᩈᩥᨠ᩠ᩈ᩼᪩

ᩉᩖᩯ᩵ᨦ​ᨠᩣᩴᨶᩮᩥ᩠ᨭ​ᩈᩯ᩠ᨦ​ᩉᩖᩢᨠ​ᨲᩣ᩠ᨾ​ᨵᩢᨾ᩠ᨾᨩᩣ᩠ᨲ​ᨷᩫ᩠ᨶ​ᩃᩰᩫ᩠ᨠ​ᨤᩨ​ᨯ᩠ᩅᨦ​ᨲᩅᩢ᩠ᨶ᪩​ ᨶᩲ​ᩈ᩠ᨾ᩻ᩱ᩠ᨿ​ᨷ᩵ᩤ​ᨠᩮᩢ᩵ᩣ​ ᩉᩖᩯ᩵ᨦ​ᩉᩨ᩶​ᩈᩯ᩠ᨦ​ᨴᩦ᩵​ᩈᩣᩴᨤᩢ᩠ᨬ​ᨳᩯ᩠ᨾ​ᩀ᩵ᩣ᩠ᨦ​ᨣᩴ​ᨤᩨ​ᨻᩱ​ ᨲᩢ᩠᩶ᨦ​ᨲᩯ᩵​ᨠᩬᨦ​ᨻᩱ​ᨶᩲ​ᩈ᩠ᨾ᩻ᩱ᩠ᨿ​ᨠᩬ᩵ᩁ​ᨧᩫ᩠ᨶ​ᨳᩮᩥ᩠ᨦ​ᨣᩰᩫ᩠ᨾ​ᨻᩱᨶ᩶ᩣᩴ​ᨾᩢ᩠ᨶ​ᨣᩢ᩠ᨯᨶᩲ​ᩈ᩠ᨾ᩻ᩱ᩠ᨿ​ᨷᩢ᩠ᨯ​ᨯ᩠᩵ᨿᩅ᪩​ ᨿᩬ᩶ᩁ​ᨠᩣ᩠ᩁ​ᨻᩢᨯ᩠ᨰᨶᩣ​ᩈᩯ᩠ᨦ​ᨼᩱᨼ᩶ᩣ​ᩓ​ᩁᨷᩫ᩠ᨷ​ᩈᩫ᩠ᨦ​ᨧ᩵ᩣ᩠ᨿ​ᨼᩱᨼ᩶ᩣ​ ᩈᩯ᩠ᨦ​ᨼᩱᨼ᩶ᩣ​ᨣᩴ​ᨯᩱ᩶​ᨡᩮᩢ᩶ᩣ​ᨾᩣ​ᨴᩯ᩠ᨶ​ᨴᩦ᩵​ᩈᩯ᩠ᨦᨣᩰᩫ᩠ᨾᨼᩱ᪩