ᨯ᩠ᩅᨦᨲᩅᩢ᩠ᨶ (ᩋᩢ᩠ᨦᨠᩕᩥ᩠ᩈ: Sun) ᨣᩤᨯ᩠ᩅᨦᨲᩣᩅᩢ᩠ᨶ ᨣᩤᨯ᩠ᩅᨦᩋᩣᨴᩥᨲ᩠ᨿ᩼ ᨣᩤᨯ᩠ᩅᨦᩋᩣᨴᩥᨧ᩠ᨧ᩼ ᨾᩯ᩠᩵ᨶᨤᩨᨯᩣ᩠ᩅᩁᩂᨠ᩠ᩈ᩼ᨪᩮᩥ᩠᩵ᨦᩀᩪ᩵ᨴᩦ᩵ᨧᩲᨠᩖᩣ᩠ᨦᨡᩬᨦᩁᨷᩫ᩠ᨷᩈᩩᩁᩥᨿ᪩ ᨯ᩠ᩅᨦᨲᩅᩢ᩠ᨶᨸᩮ᩠ᨶᩉ᩠ᨶ᩠ᩅ᩠᩵ᨿᨽᩖᩣ᩠ᩈᨾᩣᩁᩬ᩶ᩁᨡ᩠ᨶ᩻ᩣ᩠ᨯᩉᩖ᩠ᩅᨦᩃᩢᨠ᩠ᨡᨱᨾᩫ᩠ᨶᨠᩮᩬᩨᨷᨯᩣᨣᩕᩲ᩵ᨧᩢᩈᩫ᩠ᨾᨷ᩠ᩅᩁ᪨ ᨷᨭᩥᨠᩥᩁᩥᨿᩣᨠᩣ᩠ᩁᩉᩖᩬᨾᨶᩥ᩠ᩅᨤᩖ᩠ᨿᩮᨴᩦ᩵ᨠᩯ᩠ᨶᨠᩖᩣ᩠ᨦᨡᩬᨦᨯ᩠ᩅᨦᨲᩅᩢ᩠ᨶᨿ᩠ᨿᩮᩡᩉᩨ᩶ᨯ᩠ᩅᨦᨲᩅᩢ᩠ᨶᨶᩢ᩠᩶ᨶᩁᩬ᩶ᩁᩓᨹᩯ᩵ᩁᩘᩈᩦᨴᩘ᩠ᩃᩣ᩠ᨿᩋᩬᨠᨧᩣ᩠ᨠᨹᩥ᩠ᩅᨡᩬᨦᨯᩣ᩠ᩅᨸᩮ᩠ᨶᨻᩃᩴᨦᩣ᩠ᨶᩀᩢ᩠᩵ᨦᨲ᩵ᩣ᩠ᨦᪧ ᨯᩰᩫ᩠ᨿᨨᨻᩕᩰᩬᩡᩈᩯ᩠ᨦᨴᩦ᩵ᨲᩣᩉᩢ᩠ᨶ ᩁᩘᩈᩦᩋᩥ᩠ᨶᨼᩕᩣᩁᩮ᩠ᨯ ᩓᩁᩘᩈᩦᩋᩢ᩠ᩃᨴᩕᩣᩅᩱᩋᩰᩃᩮ᩠ᨲᨳᩮᩥ᩠ᨦ ᪁᪀% ᨡᩬᨦᨻᩃᩴᨦᩣ᩠ᨶ᪩ ᨯ᩠ᩅᨦᨲᩅᩢ᩠ᨶᨤᩨᩉᩖᩯ᩵ᨦᨡᩬᨦᨻᩃᩴᨦᩣ᩠ᨶᨴᩦ᩵ᩈᩣᩴᨤᩢ᩠ᨬᨴᩦ᩵ᩈᩩᨯᨡᩬᨦᩈᩥ᩠᩵ᨦᨾᩦᨩᩦᩅᩥ᩠ᨲᨴᩘ᩠ᩃᩣ᩠ᨿᨷᩫ᩠ᨶᩃᩰᩫ᩠ᨠ᪩ ᨯ᩠ᩅᨦᨲᩅᩢ᩠ᨶᨿᩢ᩠ᨦᨯᩱ᩶ᩁᩢ᩠ᨷᨠᩣ᩠ᩁᩈᩢᨠ᩠ᨠᩣᩁᨷᩪᨩᩣᨶᩲᩉᩖᩣ᩠ᨿᪧ ᩅᩢᨯ᩠ᨰᨶᨵᩢᨾ᩠ᨾ᩼ ᩓᨠᩣ᩠ᩁᩈᩮᩥᩢ᩠ᨠᩇᩣᨴᩣ᩠ᨦᨯᩣᩁᩣᩆᩣᩈ᩠ᨲᩕ᩼ᨣᩴᩉᩨ᩶ᨤ᩠ᩅᩣ᩠ᨾᩈᩫ᩠ᨶᨧᩲᨶᩢ᩠ᨠᩉᩖᩣ᩠ᨿᨠᩢ᩠ᨷᨯ᩠ᩅᨦᨲᩅᩢ᩠ᨶᨾᩣᨲᩢ᩠᩶ᨦᨲᩯ᩵ᩈ᩠ᨾ᩻ᩱ᩠ᨿᨷ᩠ᩅᩫᩁᩣ᩠ᨱ᪩
| ᨯ᩠ᩅᨦᨲᩅᩢ᩠ᨶ | |
|---|---|
 | |
| ᨩᩨ᩵ | ᨯ᩠ᩅᨦᨲᩅᩢ᩠ᨶ, ᨯ᩠ᩅᨦᨲᩣᩅᩢ᩠ᨶ, ᨯ᩠ᩅᨦᩋᩣᨴᩥᨲ᩠ᨿ᩼ |
| ᩈᩢᨬ᩠ᨬᩃᩢᨠ᩠ᨡᨱ᩼ | .svg) |
| ᨡᩬᩴ᩶ᨾᩪᩃ᩼ᩃᩩᨠᨠᩣ᩠ᩁᩈᩢ᩠ᨦᨠᩮ᩠ᨲ | |
| ᩁᨿᩉ᩵ᩣ᩠ᨦᨳ᩠ᩅᩫᩅᩢ᩠ᨯᩃᩩᨠᩃᩰᩫ᩠ᨠ | ᪁ ᩉ᩠ᨶ᩠ᩅ᩠᩵ᨿᨯᩣᩁᩣᩆᩣᩈ᩠ᨲᩕ᩼ ᪁᪄᪉,᪆᪀᪀,᪀᪀᪀ ᨠ.ᨾ. ᪉᪃,᪐᪐᪐,᪐᪐᪐ ᨾᩱᩃ᩼ ᪈ ᨶᩣᨵᩦ ᪁᪉ ᩅᩥᨶᩣᨵᩦ (ᨤ᩠ᩅᩣ᩠ᨾᩅᩮᩥ᩠ᨿᩈᩯ᩠ᨦ) |
| ᨤ᩠ᩅᩣ᩠ᨾᩈᩬ᩵ᨦᨧᩯ᩠᩶ᨦᨷᩕᩣᨠᩫ᩠ᨭ | -26.74 |
| ᨤ᩠ᩅᩣ᩠ᨾᩈᩬ᩵ᨦᨧᩯ᩠᩶ᨦᩈᩣᩴᨷ᩠ᩅᩁ | 4.83 |
| ᩈᨻᩮᩢ᩠ᨠᨴᩕᩢ᩠ᨾ | G2V |
ᨯ᩠ᩅᨦᨲᩅᩢ᩠ᨶᨴ᩠ᨿᩅᩅᩯ᩠ᨯᨧᩲᨠᩖᩣ᩠ᨦᨡᩬᨦᨯᩣᩁᩣᨧᩢᨠ᩠ᨠ᩼ᨴᩦ᩵ᩁᨿᩉ᩵ᩣ᩠ᨦ ᪂᪄,᪀᪀᪀ ᨳᩮᩥ᩠ᨦ ᪂᪈,᪀᪀᪀ ᨸᩦᩈᩯ᩠ᨦ᪩ ᩃᩩᨠᨧᩣ᩠ᨠᩃᩰᩫ᩠ᨠ ᨯ᩠ᩅᨦᨲᩅᩢ᩠ᨶᨾᩦᩁᨿᩉ᩵ᩣ᩠ᨦ ᪁ ᩉ᩠ᨶ᩠ᩅ᩠᩵ᨿᨯᩣᩁᩣᩆᩣᩈ᩠ᨲᩕ᩼ (1.486 × 108 ᨠ.ᨾ.) ᨣᩤᨷᩕᩉ᩠ᨾᩣ᩠ᨱ ᪈ ᨶᩣᨵᩦᩈᩯ᩠ᨦ᪩ ᨯ᩠ᩅᨦᨲᩅᩢ᩠ᨶᨾᩦᩈᩮ᩠᩶ᨶᨹ᩵ᩣᨠᩖᩣ᩠ᨦ ᪁,᪃᪉᪁,᪄᪀᪀ ᨠ.ᨾ. (᪈᪆᪄,᪆᪀᪀ ᨾᩱᩃ᩼)᪨ ᨣᩧ᩠ᨯᨸᩮ᩠ᨶ ᪁᪀᪉ ᨴᩫ᩠ᨷᨡᩬᨦᩃᩰᩫ᩠ᨠ᪩ ᨯ᩠ᩅᨦᨲᩅᩢ᩠ᨶᨾᩦᨾ᩠ᩅᩁ ᪃᪃᪀,᪀᪀᪀ ᨴᩫ᩠ᨷᨡᩬᨦᩃᩰᩫ᩠ᨠ᪨ ᨣᩧ᩠ᨯᨸᩮ᩠ᨶ ᪉᪉.᪈᪆% ᨡᩬᨦᨾ᩠ᩅᩁᨴᩢ᩠ᨦᩉ᩠ᨾᩫ᩠ᨯᨡᩬᨦᩁᨷᩫ᩠ᨷᩈᩩᩁᩥᨿ᪩ ᨾ᩠ᩅᩁᨡᩬᨦᨯ᩠ᩅᨦᨲᩅᩢ᩠ᨶᨷᩕᩉ᩠ᨾᩣ᩠ᨱ ᪃ ᨶᩲ ᪄ (~᪇᪃%) ᨤᩨᩌᩱᨯᩕᩰᨩᩮ᩠ᨶ ᩓᩈ᩠ᩅ᩵ᩁᨴᩦ᩵ᩉᩖᩮᩬᩨᩋᩈ᩠ᩅ᩵ᩁᩉᩖᩣ᩠ᨿᨤᩨᩌᩦᩃ᩠ᨿᨾ (~᪂᪅%) ᨠᩢ᩠ᨷᨵᩤ᩠ᨲᩩᩋᩨ᩠᩵ᨶᪧ ᨴᩦ᩵ᩉ᩠ᨶᩢ᩠ᨠᨡᩧ᩠᩶ᨾᨳᩯ᩠ᨾ ᨩᩮᩬᩨ᩶ᩋᩅ᩵ᩤ ᩋᩬᨠᨪᩥᨩᩮ᩠ᨶ ᨤᩣᩁ᩼ᨷᩬᨶ ᨶᩦᩋᩬᨶ ᩓ ᩉᩖᩮᩢᨠ᪩
ᨯ᩠ᩅᨦᨲᩅᩢ᩠ᨶᨸᩮ᩠ᨶᨯᩣ᩠ᩅᨶᩲᩉ᩠ᨾ᩠ᩅᨯ G-type main-sequence star (G2V) ᨪᩮᩥ᩠᩵ᨦᩉᩖ᩶ᩣ᩠ᨦᨴᩮᩬᩨ᩵ᩋᨣᩴᩁᩬ᩶ᨦᩀ᩵ᩣ᩠ᨦᩃᩣᩴᩃᩬᨦᩅ᩵ᩤᨯᩣ᩠ᩅᨣᩕᩯᩡᩉᩖᩮᩬᩨᨦ ᨲᩮ᩠ᨾᩅ᩵ᩤᨴᩦ᩵ᨴᩯ᩶ᩓ᩠ᩅᨾᩢ᩠ᨶᨾᩦᩈᩦᨡᩣ᩠ᩅᨣᩴᨯᩣ᩠ᨿ᪩ ᨯ᩠ᩅᨦᨲᩅᩢ᩠ᨶᨠᩬᩴ᩵ᨠᩮᩥ᩠ᨭᨡᩧ᩠᩶ᨶᨾᩮᩬᩨ᩵ᩋ ᪄,᪆᪀᪀ ᩃ᩶ᩣ᩠ᨶᨸᩦᨠᩬ᩵ᩁ ᨿᩬ᩶ᩁᨠᩣ᩠ᩁᨿᩩᨷᨿᩬᨷᨲ᩠ᩅᩫᨿᩬ᩶ᩁᨤ᩠ᩅᩣ᩠ᨾᨶᩰᩫ᩠ᨾᨳ᩠ᩅ᩵ᨦᨡᩬᨦᩈᩈᩣ᩠ᩁᨻᩣ᩠ᨿᨶᩲᨷᩁᩥᩅᩮ᩠ᨱᨡᩬᨦᨺ᩶ᩣᨾᩰᩃᩮᨠᩩᩃ᩼ᨡ᩠ᨶ᩻ᩣ᩠ᨯᩉᩖ᩠ᩅᨦ᪩ ᩈᩈᩣ᩠ᩁᨠᩮᩬᩨᨷᨴᩢ᩠ᨦᩉ᩠ᨾᩫ᩠ᨯᨿᩩᨷᨿᩬᨷᩃᩫ᩠ᨦᩈᩪ᩵ᨧᩲᨠᩖᩣ᩠ᨦ ᩈ᩠ᩅ᩵ᩁᨴᩦ᩵ᩉᩖᩮᩬᩨᩋᨣᩴᨹᩯ᩵ᩋᩬᨠᨠᩖᩣ᩠ᨿᨸᩮ᩠ᨶᨠᩫ᩠ᨦᩅᩯ᩠ᨯᩓᨻᩣ᩠ᨿᩃᩪᩁᨣᩴᨠᩖᩣ᩠ᨿᨾᩣᨸᩮ᩠ᨶᩁᨷᩫ᩠ᨷᩈᩩᩁᩥᨿ᪩ ᩈᩈᩣ᩠ᩁᨴᩦ᩵ᨧᩲᨠᩖᩣ᩠ᨦᨧᩢᩁᩬ᩶ᩁᩓᩉ᩠ᨶᩯᩢᩁᨶᩢ᩠ᨠᨧᩫ᩠ᨶᨶᩲᨴᩦ᩵ᩈᩩᨯᨧᩢᨿ᩠ᨿᩮᩡᩉᩨ᩶ᨠᩮᩥ᩠ᨭᨷᨭᩥᨠᩥᩁᩥᨿᩣᨠᩣ᩠ᩁᩉᩖᩬᨾᨶᩥ᩠ᩅᨤᩖ᩠ᨿᩈ (nuclear fusion) ᨴᩦ᩵ᨠᩯ᩠ᨶᨠᩖᩣ᩠ᨦ᪩ ᨩᩩᩅᩥᨶᩣᨵᩦ ᨠᩯ᩠ᨶᨠᩖᩣ᩠ᨦᨡᩬᨦᨯ᩠ᩅᨦᨲᩅᩢ᩠ᨶᨧᩢᩉᩖᩬᨾᩌᩱᨯᩕᩰᨩᩮ᩠ᨶᨷᩕᩉ᩠ᨾᩣ᩠ᨱ ᪆ ᩈᩯ᩠ᨶᩃ᩶ᩣ᩠ᨶᨠᩥᩃᩰᨠᩕᩢ᩠ᨾᩉᩨ᩶ᨸᩮ᩠ᨶᩌᩦᩃ᩠ᨿᨾᩓᨸᩖ᩠ᨿ᩵ᩁᩈᩈᩣ᩠ᩁ ᪄ ᨻᩢ᩠ᨶᩃ᩶ᩣ᩠ᨶᨠᩥᩃᩰᨠᩕᩢ᩠ᨾᩉᩨ᩶ᨸᩮ᩠ᨶᨻᩃᩴᨦᩣ᩠ᨶ᪩