Wp/niu/Takai

< Wp‎ | niu
Wp > niu > Takai

Ko e Takai ko e puhala fakafiafia ke fakamanatu aki e magaaho he tau kua hoko ki ai mo e fakafeleveia e tau foou kua hoko ki ai, ko e fakaotiaga he faahi tapu Tapu Liogi Hololoa. Ko e Aho Faiumu he ha faahi tapu Tapu Liogi Hololoa ko e aho takai pauaki a ia he tau. Ko e takai ka fakamanaia e koe haau a motoka, pasikala afi, pasikala taholi pihia mo e tagata foki, mo e fakaholo viko ai he motu mo e fakatagiatagi ai e tau pu motoka, ta e tau kofe mo e lologo mo e kalaga. Ko lautolu ne kitekite mai ke he tau takai ka tauhea atu ai pehe, "Takai popo, takai popo", ko lautolu he tau motoka ka gana atu e tau lole mo e falu a mena kai kia lautolu ne kitekite mai. Fa mahani foki e tau takai ke viko he falu male he falu a maaga kae mitaki ke iloa tuai ha ko e falu maaga tapu tapu ina ai maeke he ha peleoafi ke fakaholo viko i luga he male. Ko e vaha nei kua to lahi e fulufuluola e tau takai ha ko e loga e tau koloa mo fakamanaia aki e tau takai. Ko e vaha nei kua to lahi foki e lavelave e tau momoui ti ko e falu magafaoa poke maaga kua fakahoko ha lautolu a takai he falu aho kehe. Haha i ai foki he tau katoa e falu fakafiafiaaga ne kua fakaoti ai foki aki e takai viko he motu. Ko e takai o hui foki ko e o viko o hui he motu fuafua ke he 12 e tula to tu e takai. Ko e tau fuata mai he maaga ko Tamakautoga ne talahaua lahi ke he takai o hui, ko e mafiti he ha lautolu a takai ko e kamata ni he afiafi ti hoko ai la aho ia.