Sejarah Dunio, sejarah universal, atawa namo laènnyo sejarah manusio iolah sejarah yang ngambarke umat manusio jaman bingèn yang ado di galo-galo daèrah di bumi dimulak'i sejak munculnyo homo sapièns ke jaman prasejarah sampé mak ini ari. Secaro dèfinisi sejarah dunio bèda dengen sejarah bumi yang kajiannyo nyeritoke sejarah gèologis bumi samo jaman sebelum munculnyo manusio. Sejarah umat manusio didului samo jaman prasejarah, iolah jaman belum dikenalnyo sistem aksara atawa tulisan dimulak'i dari jaman paleolitikum (jaman batu tuo). Abés tu masukla ke jaman Neolitikum (jaman batu mudo) terus bekembang ke Revolusi Petanian (antara 8000–5000 SM).
Lantak Revolusi Petanian ni la yang nyebabke umat manusio ngalami perobahan besak dalam sejarahnyo. Singgonyo sejak jaman itu wong-wong suda pacak mudidayake tumbuhan dan binatang. Lamo-lamo, yang awalnyo wong-wong beprinsip dengen gaya idup nomad (bepindah-pindah) beroba jadi gaya idup menetap sebagai petani, kedengen adonyo kemajuan teknologi pertanian.
Jaman bingèn wong-wong suda mulak'i bikin tempat tinggal di sekitar aléran sungi olè keno manusio butuh banyu untuk kelangsungan idupnyo. Penèmon adonyo peradaban di Lembah Mèsopotamia (dataran antara Sungi Tigris samo Èfrat) di Timur Tengah yang suda bejalan sejak 3000 taun sebelóm masèhi jadi salah satu buktinyo, samo beberapo penèmon laénnyo pecak di pénggér Sungi Nil, Mesir, di Lembah Sungi Indus, samo peradaban di Lembah Sungi Kuning.
Periodisasi edit
Sejarah umat manusio dibagi jadi duo bagian olè duo periode besak, yang pertamo periode prasejarah, diantaranyo Jaman Batu; Paléolitikum, Mèsolitikum, Neolitikum; samo Jaman Logam. Jaman prasejarah diciréni dengen penggunoan alat dari batu yang masih sederhano nian. Jaman prasejarah berakhér kiro-kiro 5.500 taun yang lalu ditandoi dengen adonyo penemon tulisan. Periode yang keduo iolah jaman sejarah abés ditemukenyo tulisan.
Ado empat bagian di periode ini; Jaman Kuno, mulak'i dari 3500 SM sampe kejadian jatóhnyo Kekaisaran Romawi Barat (476 M); Abad Pertengahan, berakhér sampe 1492 M pas awal mulo ekspedisi colombus ke Amerika; Jaman Modern, berakhér sampe adonyo Rèvolusi Prancis (1789 M) samo Rèvolusi Industri akhèr abad-18; yang terakhèr itu Jaman Kontemporer yang masih bejalan sampe mak ini ari.
Daftar pustaka edit
- Wheeler, Mortimer (1968). The Indus Civilizationurl[1]. CUP Archive. isbn = 9780521069588.
- Goudsblom, Johan. (2015). The Course of Human History:: Civilization and Social Process[2]. Routledge. isbn = 9781317457725
- Wilson, Sir Daniel. (1865) Prehistoric Man; Researches Into the Origin of Civilisation in the Old and the New World[3]. the University of Michigan. isbn = 9780608394596