Wp/mui/Atom

Atom itu iolah bagian paléng kecik dari sikok matèri yang secaro kimiawi pacak gabung samo benda laén dan sebagai bahan penyósón segalo zat padat, caer atawa gas. Namo atom diambek dari baso Yunani átomos (ἄτομος/ α-τεμνω) yang retinyo idak pacak dipisah atawa dibagi lagi. Mpuk la cak itu, laén samo definisi pertamonyo, sebenernyo atom kesósón lagi dari partikel-partikel subatom. Tiap-tiap atom punyo inti atom samo èlèktron (lebéh tepatnyo awan èlèktron) bemuatan nègatif yang ngelilinginyo. Di jeru inti atom tadi berisi proton yang bemuatan positif samo nèutron yang bemuatan nètral. Atom pacak jadi nètral kapan dio punyo jumlah èlèktron yang samo dengan jumlah proton di jeru inti atom, kalu idak, (jumlahnyo béda) dio punyo muatan positif apo dak nègatif yang belebéh, yang nentuke dio dinamoke dengen ion postif apo dak ion nègatif.

Atom dikelompokke berdasarke banyaknyo proton samo nèutron yang ado di jeru inti atom. Berapo banyaknyo proton (dilambangke dengen huruf Z) itu la yang nentuke unsur kimia atom kalo nyingok atóran sistem periodik Mendeleev, sedengke banyaknyo nèutron (jumlah neutron N-ke isotop kusus dari elemen tadi) nentuke isotop unsurnyo. Cuman atom hidrogen sikok-sikoknyo atom stabil yang dak berisi neutron di intinyo. Beberapo atom yang bekómpól dari jenis dan jumlah yang berbeda aman salèng berikatan lewat ikatan antar atom pacak ngebentuk jadi sikok molekul.

Sejarah konsep atom

Istilah atom sebagé bagian tekecik dari matèri pertamo kali dirumuske olè filsuf India kuno samo Yunani kuno. Baru pas abad ke-17 samo ke-18, wong dari ahli kimia nyetujui gagasan tadi lewat eksperimen mereka yang nunjukke aman beberapo zat idak pacak diuraike lagi jadi elemen penyósónnyo. Tapi di ahér abad ke-19 samo awal abad ke-20, temuan baru dari ilmuwan nerangke aman di jeru atom masih ado lagi partikel subatom samo struktur kompositnyo. Konsep mak ini jadi bahasan di Kongres Kimiawan Internasional di Karlsruhe (Jerman) taun 1860. Definisi atom dikonsep ulang, jadinyo atom iolah partikel palèng kecik dari sikol unsur kimia yang jadi bagian dari zat sederhano dan kompleks.

Partikel subatom

Èlèktron iolah partikel palèng hampang bemuatan nègatif yang nyósón atom dengen massa 9,11 x 10 −³¹kg, ókórannyo terlalu kecik aman nak diókór dengen metode modèrn. Uji cubo nentuke momen magnètik èlèktron nunjukke kalu ókóran èlèktron idak nyampe 10 −¹⁸m. Proton berisi muatan positif dan 1836 kali lebéh berat dari èlèktron (1,6726 x 10 −²⁷kg). Neutron idak punyo muatan lèstrèk dan 1839 kali lebih berat dari èlèktron (1,6749x10 −²⁷kg).

Proton samo nèutron bukanla partikel èlèmènter, tapi iolah bagéan dati keadaan terikat quark u samo d, sikok partikel dasar yang dikumpulke jadi model standar fisika partikel, dengen muatan lèstrèk maséng-maséng sebesak +2/3 samo −1/3. Sikok proton berisi duo u quark samo sikok d quark, sedengke nèutron berisi duo d quark samo sikok u quark, stabil dengen muatan keduonyo. Quark diiket olé gaya nuklir kuat, yang diperantarai olè gluon - pecak gaya èlèktromagnètik yang digawakke olè foton.