MADC Golden Jubilee Closing function apalâ kawpa ta ahmâpa a châ edit
Târi: 29 Pachawh, 2023, Pachynoh (dawh 12:00zd) pa ta MADC Golden Jubilee (1972-2022) closing function cha MADC Complex tlyhmia liata apalâ kawpa ta ahmâpa a châ. Chief Guest châta Puhpa M. Laikaw, Hon’ble CEM, MADC hruapa châ ta, Satlia MC. Beihromo, AAO, MADC nata Laihsa Dr. HC. Joane Mary, VO, MADC zy ta Comperes châpa ta pahnie kawpa ta programme ama chhihtha.
Daihti thaona liata ECM KTP Branch: New Colony zy ta Opening song châta Hallelujah Chorus paryh ei ta, Rev. Phosa Chozah, Moderator, ECM Assembly ta devotion a hmâh. Puhpa N. Viakhu, Chairman, MADC ta welcome speech reina hnei ta, Marapazy Autonomy eima hmô thei nawpa ta a rai a bâhpa miah hrolâhpa Puhpa A. Pawchi, College Vaih ta biereina chyupa hnei ta, CEM hmiatua chaipa Puhpa Zakhu Hlychho (L) lahpinô Pihnô Suipari ta biereina chyupa daihti a hmâh hra. Mara Artistes Puhpa John Beizachhi Phuto, Laihsa Jessica B. Khuhly, Laihsa Chhingpuii Azyu zy ta mo pakha hlasana hnei ei ta, MTP Branch: Meisatlâh zy ta Sawlakia lâh ei ta, MTP Branch: New Siaha zy ta Awhkhypa lâ ama pamosa hra. ECM KTP Branch: Siaha Vaihpi zy ta closing song ama sa no ta Puhpa S. Lalremthanga, EM i/c Edu. ta MADC Golden Jubilee Flag tawpa la pathlahna hnei ta, Puhpa K. Chhihrau, Executive Secretary ta vote of thanks a reih. Atanoh liata MADC Golden Jubilee athei thlâh nawpa châta taopa Souvenir (Magazine) tho 344 tlai ta taopa cha Souvenir Board vyuhpa ta Satlia MC. Beilonga, Creative Director ta tenchical report pie ta, Puhpa M. Laikaw, Hon’ble CEM ta Souvenir a palâhâh pâ hra. PL Regional Council daihti no ta Autonomous noeihpa hnei awpa khona vâta Sawhkhâ rai hria ngâhaipa taihta abâhpa 16 zy hry liata miah hrolâh y chhôhpa Puhpa A. Pawchi nata he nahzy a vaw buakhei tuhpa Puhpa Nohra Nôhro lahpinô Pihnô Sialei Chhachhai zy hnoh ta palyupalihna hlâpa ama châ. Daihti khaw nawpa ta Rev. Chhuakhu Khithie, Executive Secretary (i/c Education), ECM Assembly ta byhnâ awna hneipa ta closing programme he pachhâsapa a châ. He khai tawhta he programme a vaw hlaopazy châta taopa zâpati cha CEM Bungalow liata aly kawpa ta dôh chyupa a châ. Atanoh programme liata NGO HQ leaders, Church Leaders, Prominent Citizens, Ex-MDCs, MJA, Siaha nata Government Official zy hleikhô ta hruaeihpazy ta ahlao ei ta, programme he NSV Local TV nata Internet Website (Youtube) liata NSV Official Channel Live Streaming piepapuapa a châ. Chief Guest zachhihpa Puhpa M. Laikaw, CEM, MADC ta atanoh liata a biereipa cha anoeihta Press Release (No.70/2023) liata papuapa a châ hra.[1]
- ↑ Information & Publicity Department, Mara Autonomous District Council, Siaha