Wp/mjx/Nathaniel Robinson Murmu

Nathaniel Robinson Murmu ( 3 SEPTEMBER 1926-25 OCTOBER 1989)

JO̠NO̠M:Santali Pạrsi dulạṛiạ, o̠no̠liạ, somaj susạriạ ar mit́ gạkhuṛ rajnitibid Boṅgatalae̠n Nathaniel Robinson Murmu do̠ 1926 salreaḱ 3 Se̠pṭe̠mbo̠r hilo̠ḱ Cornelius Murmu ar Naso So̠re̠n tạkinaḱ ho̠bo̠rre̠ noa dhạrti puri do̠e le̠be̠t́leda. Uniaḱ bukạ topa ṭhạ̃i do̠ tahẽ̠kana Pạchim Baṅgla reaḱ Pạchim Dinạjpur jilạ reaḱ Narayanpur Mission.

O̠LO̠Ḱ PAṚHAOḰ: Nathaniel Robinson Murmuwaḱ o̠lo̠ḱ paṛhaoḱ do̠ jo̠no̠m jaega reaḱ Narayanpur Mission Schoolre̠ e̠ho̠ṕle̠ntaea. Ona tayo̠m Bạlurghaṭ High School , Dinạjpur High School ar Raja Manindra Narayan High School, Cooch-Beharre̠ High School reaḱ paṛhao do̠ purạule̠ntaea. Uni do̠ Narayanpur Missionrege mit́ mahaso̠e lekate̠ kạmi jio̠n do̠e e̠ho̠ṕleda.

SOMAJ SUSẠR AR RAJẠRI KẠMIKO: Nathaniel Robinson Murmu do̠ 1946 re̠ Bạlurghaṭe̠ hẽ̠ćena ar Revolutionary Socialist Party sãoe̠ joṛaoena ar aćaḱ gujuḱ hạbić onare̠n rạsiạ lekateye̠ kạmi keda. Uni do̠ aćaḱ pạṭhuạ jionre̠ pạṭhuạkoaḱ laṛaonare̠n mit́ gạkhuṛ ạḱyuriạe tahẽ̠kana. Uni do̠ Caso̠ḱ ho̠ṛkore̠n ạḱyurićhõ̠e tahẽ̠kana.Uni do̠ Bharo̠t diso̠m reaḱ phurgạl lạṛhại reaḱ The Bhaga Movement, Food Movement ar Peasant Movement re̠ se̠le̠t́lena ar laṛaona kore̠n ạḱyurić lekate̠ pe̠ dhao je̠he̠lre̠ y bhorao ocolena. Mano̠tan Nathaniel Robinson Murmu do̠ 1962,1967,1969 ar 1977re̠ Pạchim Dinạjpur siṭ kho̠n MLA lekate̠y bachao bahal ocolena.MLA tahẽ̠n o̠kte̠re̠ unido̠ Pạchim Baṅgla Sarkaraḱ aema Commission re̠n rạsiạ hõ̠e tahekana je̠leka Pạchim Baṅgla Sarkaraḱ Minority Commission, Calcutta University Senate, U.N. Dhebor Commission, Board of Directors, North Bengal State Transport Corporation. Mano̠tan Nathaniel Robinson Murmu do̠ Viswa Bharati University re̠n Santali Examiner ar Cultural and Research Institute, Pạchim Baṅgla Sarkare̠n Santali Biḍạure̠n Examiner ar Question Setter lekate̠ kạmikeda

SÃOHE̠T́ HARABURUERE̠ E̠NE̠M: Mano̠tan Nathaniel Robinson Murmu do̠ Santali Pạrsi dulạṛiạ ar gạkhuṛ o̠no̠liạ hõ̠e tahekana. Uni do̠ aćaḱ goṭa jio̠n Santali Pạrsi haraburue ar go̠ pạrsite̠ o̠lo̠ḱ paṛhaoḱ reaḱ kạmi kạsnire̠ ạḍi lạgiạ paṛaoe̠ tahekana. Uni do̠ 1959 re̠ All India Santali Linguistic Committee bandhaokate̠ Roman haro̠p te̠ Mạhạnạkiạ Sãohe̠t́ Sakam( Magazine) ‘AṚAṄ’ chapa so̠do̠re̠ e̠ho̠ṕleda. 1954-55 re̠ Bạlurghaṭre̠ mit́ Jug Arshal Chapa So̠no̠do̠r Kompanihõ̠e bandhaoleda ar ‘ Jug Arshal’ magazine Roman haro̠p te̠ chapa so̠do̠re̠ e̠ho̠ṕkeda. Mano̠tan Murmu do̠ Higher Secondary Santali Syllabus Committee re̠n rạsiạ lekate̠ Higher Secondary level re̠ Santalite̠ o̠lo̠ḱ paṛhaoḱ lạgit́ Dr. D S. Ganguly waḱ go̠ḱṛo̠te̠ Roman haro̠p te̠ puthi sapṛaoleda.

Mano̠tan Nathaniel Robinson Murmuwaḱ o̠laḱ puthiko do̠ hoyena 1. O̠jo̠y Gaḍa Ḍhipre̠ 2. Ạnạṛi Ho̠ṛ 3. Kạki Go̠ 4. Bursi Se̠ṅge̠l 5. Santali Pạrsi reaḱ tayom daram 6. Martha Mary eman. Noako chaḍakate̠ uniaḱ aema o̠no̠lko, kạhni, õ̠nõ̠ṛhẽ̠, sereń emanko magazinekore̠ chapa so̠do̠rakana.

EMANTEAḰ KẠMIKO:Mano̠tan Nathaniel Robinson Murmuwaḱ ạkyurtege 30June,1955 re̠ Santal Hulreaḱ Sae serma purạu re̠ Pạhil dhao Ranajo̠ṭ Mãhã(Santal National Integration Day) se̠ Sidạ Kạnhu Hul Mãhã Pạchim Dinạjpur jilạ reaḱ Beltara atore̠ manaolena. Uniaḱ ạkyurtege Santali pạrsi ar Sãohe̠t́re̠n bhurkạḱ ipil Rev. P.O.Boddingaḱ Janam Mãhã 2aḱ Nobe̠mbo̠r do̠ manaoe̠ e̠ho̠ṕleda.

SIROPA: Mano̠tan Nathaniel Robinson Murmu do̠ Santal se̠ ạdibạsikoaḱ ho̠k ạidạri ar uthnạu lạgit́ kạmi reaḱ sonman lekate̠1989 re̠ Pạchim Baṅgla Sarkar kho̠n Sarhao Sakam ar 5000/- ṭakae e̠m ocolena.

Mao̠tan Nathaniel Murmu do̠ mit́ gạkhuṛ phuṭbo̠l khilo̠diạ hõ̠e tahekana.

GUJUḰ: Mano̠tan Nathaniel Robinson Murmu d o̠ 1989 sal reaḱ 25 October hilo̠ḱ P.G. Hospital re̠ noa dhuṛi dhạrti do̠e bạgiada.

Go̠ḱṛo̠ hataoe̠n puthiko: Ezicheal Hembromaḱ Brief History of Santali Literature and Writers ar Assam Santali Sahitya Sabha reaḱ 23 aḱ Bạchri Helmel reaḱ Dinisạ Puthi ‘ Toa Dare’.