Wp/max/Balengko

Balengko tù barmaeng basambunyi-basambunyi. Biasa barmaeng deng dua, tiga, atáu lebé.

Lukisan di abad ke-19. Depe isi lukisan tù ana kacíl tiga barmaeng balengko di hutáng (Friedrich Eduard Meyerheim)
Yang barmaeng	laki-laki kà parampuang dua-dua
Umur	kacíl-basár bole barmaeng
Barmaeng sampe	magríb (dari sore; mu tidor (dari abis isyá); lalá
Cara barmaeng	bahitung_sampe 3, 10; atau bataria Suda ka balóng?

Asal

permainan ini só ada dari dulu-dulù. cumán depe asal-usul bolom jelás. bisa jadí memang depe asal dari maluku utara.

walaupun só ada dari dulu-dulù, tetáp masih banya orang-orang Maluku Utara yang taŭ barmaéng. sampe skarang jugá masi ada yang barmaeng balengko.

Barmaeng

Kase taŭ batas sampe mana (tapi tarà harus)

Biasa dong barmaeng pake batas, là jang ada yang basambunyi talalu dekat atáu talalu jao. Karna banya yang barmaeng di kompleks, dong biasa kase batas di tiang atáu ruma. Biasa dong kase batas lima-anam ruma dari tampa balengko (là jang ada yang basambunyi talalu jao). Trus, dong mè kase batas là jang ada yang basambunyi talalu dekat, biasa barang satu ruma bagitu. Tapi ada yang barmaeng tarà pake batas. Jadi dong bole basambunyi sampe unjung là susa dapa cari, tapi dong akang susa balengko kalau tarà pande cari jalan sampe balengko tarà dapa taŭ.

Cari taŭ sapa yang perjadi deng kase taŭ batas balengko barapa

Biasa tù tong pimpa dulu baru barmaeng, yang kala nanti perjadi. Atáu tong pake cabulót (samua taru dong pe jari di satu orang pe tangan) mè bisa, yang tangan tarà capát kaluar dia yang perjadi. Barù abis itu dong kase taŭ batas balengko barapa. Biasa tù batas balengko tù stenga kali yang basambunyi. Jadi misal barmaeng tuju orang, batas balengko tiga orang. Barmaeng lapan orang, batas balengko ampa orang. Barmaeng sambilan orang, batas balengko ampa orang. Bagitu tarús.

Pas perjadi barekeng deng laeng basambunyi

Abis itu, yang perjadi pí di pohong, dinding, tiang, ka apa ka yang bisa biking jadi tampa balengko. Baru dia tutu dia pe mata, tarà bole balúr atáu balia pas laeng ada basambunyi. Dia bole barekeng satu sampe tiga (1-3), satu sampe spulu (1-10), atáu bataria “Suda ka balóng?” Atáu yang perjadi bole bataria bagini, “Satu cari tampa, dua basambunyi, suda?”. Yang ada basambunyi kalò balóng siap bole bataria “Balóng!”, kalau misal suda dorang bataria “Suda!”. Atáu dorang bole tarà bataria apa-apa kalau su abis basambunyi. Ha kalau samua su basambunyi, yang perjadi su bole cari.

Perjadi su pí cari

Perjadi mulai cari tampa-tampa yang dia curiga ada orang di situ. Kalò misál dia dapa lia yang basambunyi, dia bataria orang itu pe nama barù bale lari di tampa balengko, sontong pa dia, barù bataria “Balengko!”. Misál yang perjadi sontong tampa balengko kamuka (tapi abis dapa lia yang basambunyi deng su bataria dia itu pe nama), itu tù yang basambunyi su mati. Misal yang basambunyi mati kamuka, itu tù dia mati pertama. Kalau dia su bataria orang itu pe nama, tapi orang itu yang sontong tampa balengko (deng bataria “Balengko!”) kamuka, itu tù yang basambunyi dia balengko. Yang perjadi tarús cari sampe samua su dapa (yang basambunyi bole mati samua atau ada barapa yang balengko), baru dong samua ambe nomor. Tapi, ada dia pe aturan lagì.

Top deng barenti

Kalau misal yang balengko adà parlú satu barang, adà maso buang aer, atau adà dapa suru, dia bole top. Dia bole top lagì kalò misal ada yang kase taŭ dia pe tampa basambunyi. Kalau dia ada top, berarti dia tara bole dapa kase mati atau balengko, tapi dia masi barmaeng. Abis itu dia bole barmaeng lagi, tarà parlú jadi perjadi. Kalau misal yang top tù yang perjadi, laeng tarà bole balengko sampe dia bale. Kalau dia su bale, lanjut barmaeng lagi deng yang basambunyi su bole balengko. Kalau misal dia su tarà bisa barmaeng karna mu pigi, dapa suru biking kui, atau dapa suru tidor, dia bole bataria barenti. Dia su tarà barmaeng, deng balengko lanjut tarús. Kalau misal dia su barenti barang satu jam kòng mu iko barmaeng lagi, dia musti jadi perjadi karna su orang baru, bukang orang yang tadi barmaeng.

Ambe nomor

Biasa tong bole ambe nomor kalò:

• samua su dapa
• yang balengko tarà lewat batas (kalò lewat batas yang perjadi dia perjadi ulang)

Tapi di tampa laeng ada yang tetáp pake ambe nomor, biar yang tarà balengko cuma satu.

• ada yang balengko (kalò tarà ada yang balengko, yang mati pertama dia perjadi)

Tapi di tampa laeng ada yang tetáp pake ambe nomor, biar tarà ada yang balengko.

Ambe nomor tù tong bilang nomor barapa, baru hitung dari perjadi pe balakang sampe paling balakang. Kalau pas dia bilang satu nomor kòng dapa yang tarà balengko, yang tarà balengko dia perjadi. Tapi kalau pas dia bilang satu nomor kòng dapa yang balengko, yang perjadi dia perjadi ulang.

Abis itu, dia ulang lagi. Bagitu tarús sampe samua su lalá barù barenti.

Trivia

• Biasa kalò basambunyi tù satu orang satu tampa. Tapi ada yang barapa orang satu tampa.

Ini memang biking perjadi susa kase mati dorang, tapi kalau dong samua dapa taŭ di tampa yang dong susa kaluar, dong samua yang di situ akang mati.

• Yang perjadi jaga suka balúr pas laeng ada pí basambunyi, jadì dia capát dapa taŭ dong basambunyi di mana.
• Ada yang basambunyi jao-jao, tapi kage bagini lama-lama dia pe basambunyi su dekat deng tampa balengko.

Dorang biasa lari badekat sampe di dekat-dekat tampa balengko, tapi dong balong kaluar. Karna dong taŭ yang perjadi biasa cari sampe jao-jao, tapi kalò tara dapa dia akang bale ulang. Jadi dong yang basambunyi kalò mu lari di dekat-dekat tampa balengko musti capát deng jang sampe dapa taŭ, tapi musti babadiam. Karna kalò sampe yang perjadi lia, yang basambunyi bisa capát mati.

• Yang basambunyi kadang baku tukar baju deng dia pe tamáng, là yang perjadi sala orang.

Kalò sampe yang perjadi sala bilang nama (taŭ orang tapi sala bilang), yang dapa bilang sama bilang “Angus!”, abis itu dia basambunyi lagi. Nanti yang perjadi tutu mata lagi baru cari dia lagi.

Istilah yang biasa dong jaga pake

• balengko

perjadi: kase mati yang basambunyi

basambunyi: balengko, tarà dapa taŭ

• angus

perjadi sala bilang nama

ada yang kase taŭ pa perjadi yang basambunyi pe tampa basambunyi, kòng perjadi dapa taŭ

• top

adà parlú, adà maso buang aer, atau adà dapa suru

ada orang kase taŭ dia pe tampa basambunyi

• balúr:

perjadi balúr orang lari di dong pe tampa basambunyi pas dia ada barekeng

Tarà bole balúr pas ada barekeng, karna itu ruci. Kalò misal yang basambunyi taŭ dia balúr, dia suru samua cari tampa laeng atau suru satu orang tutu dia pe mata.

• yang basambunyi balúr iko dinding atau iko lobang kacil, lur yang perjadi dia kasana di dorang ka tarada

Kalò yang perjadi dia kasana, dong langsung cari tampa laeng atau basambunyi di tampa-tampa yang perjadi susa dapa lia. Kalò dia tarà kasana, dong di tampa itu suda. Kalò dia pi tampa laeng, dong bisa kaluar lari babadiam di dekat-dekat tampa balengko, atau kalò bole sampe balengko.

kaluar-jang dulu: biasa yang basambunyi tinggal satu orang, kòng yang laeng bataria bagitu)

rica-tomat (rica tù jang dulu kaluar, tomat tù kaluar sudà)

Trick

Trik yang dong jaga pake di sini tarada yang dong bilang ruci.

• dua orang basambunyi di satu tampa barù baku tukar baju, biking perjadi sala bilang nama
• banya orang basambunyi di satu tampa, la kase susa perjadi

Ruci

Di balengko, dia pe ruci tù banya skali.

• perjadi balia orang lari cari tampa basambunyi
• orang yang su dapa (balengko atau mati) pele yang perjadi yang mu kase mati yang ada lari mu balengko, là yang lari tù balengko kamuka