Kota Mangkasara iyami anrongbori niaka ri Sulawesi Itimborok. Kota Mangkasara nipaentengi Karaeng Mangkasara Gowa nikanayya I Kare Mangnguntungi Daeng Matanre taung 1510 Masihi. Kota Mangkasara kammayyang anne jaimi nibattui na nipammatangi tau battu pantara. Baji Tau Bugisi, Mandara, Toraja, singkamma tompa siapa jaina tau Maraeng tanirapika nipau tassekre-sekre.
Bija(suku) Mangkasara siagang kakaraengan Mangkasara Gowa Tallo, riolo iyami kakaraengan lompo niaka ri butta Sulawesi. Paklilikanna kalau sanggenna sipue kalimantan, wara sanggenna Philipina timborang, rai sanggenna Maluku, Timboro sanggenna Maregge (Australia) Warakkang. Bija Mangkasara siagang anrongborikna nikana kota Mangkasara sukku na sangkarupai kabiasang na kanre-kanreanna. Giogaukna nia nikana tari Pakarena, tari Mappaddendang, tari Salonreng, tari Pepe-Pepeka ri Makkah, tari Ganrangbulo, tari Kondo Buleng siagang jaijipi maraenganna. Kare-karenna nia nikana Paraga, Pamanca Kanrejawa, Lanja, siagang sanna injapa jaina maraenganna. Kanre-kanreanna nia nikana Toppa Lada, Coto, Konro, Pallubasa, Sop Saudara na sanna injapa jaina maraenganna. Care-care kalompoanna riolo nikana Baju Bodo, Baju Labbu, Baju Kantiu, Lipa Sabbe na saluara Barocci.
Pakrangka ulunna Bija Mangkasara nikana Passapu na Songko. Passapu na Songko sangkarupa tongi. Nia nikana Passapu Patonro, Patinra na Padompe. Songkoka kamma todong jai sangkarupanna. Nia nikana Songko Guru, Songko tubone, siagang jai injipi maraenganna. Riolo wattunna tenapa nigesaraki papparekang biseanga ri Tallo, anjoengmi anjo nipare sangkarupanna biseang Mangkasara. Nia nikana biseang Paddewakkang, Palari sombala Pinisi, Lembo sombala Pinisi. Kamma-kamma anne kasuarrangi nikana biseang Pinisi. Labuang Paotere iyami labuang kaminang toa niaka ri kota Mangkasara, siagang Labuang Mangkasara. Labuang Mangkasara lebbaki tappinra arenna nikana labuang Sultan Hasanuddin nampa nipinra pole jari labuang Soekarno-Hatta. Tolok-Tolokna Bija Mangkasara niaka ri kota Mangkasara langkamaraeng nikana Karaeng Matinya Sultan Abdullah Awalul Islam, Karaeng Pattingalloang Sultan Mahmud, Karaeng Karunrung Sultan Hamid, I Daeng Pattekne Karaeng Loe Ri Sero, Syehk Yusuf Al'Makassary, Abdullah Daeng Sirua, siagang jai inji maraenganna tanirapika nipau tassekre-sekre.
Potokkana Tallasa Bija Mangkasara iyami nikana Siri Na Pacce, Sipakatau Sipakalabbiri Sipakainga. Pakurru Sumangakna nikana Kualleangi Tallanga Natoalia, Tamasaileya Punna Teai Labuang, Ejapi Na Doang, Sekre Kana Na Panggaukang, Tala Gesaraki Mangkasara Nibambangi Mataallo, Teai Mangkasara Punna Bokona Loko. siagang jai injapi Pakurru Sumangakna. Bija Mangkasara riolo niaka ri kota Mangkasara pabboya-boyang katallassangna sangka rupa tongi minang samaraka iyami Padolangang, Pagalung Pajama Bara, Pabalu-balu na Padedde.
Kota Mangkasara riolo sanggenna kammayyang anne tuli majjari pocci pammarentanga ri liukang Sulawesi. Persiden uru-uruna Indonesia nikanayya pak Soekarno, nakanangi tau kaminang baraniya niaka ri Indonesia iyamintu tau Mangkasara. Lanri batena kere-kere mae abbundu siagang Balanda. Nakana tau toayya ri kota Mangkasara riolo, niarengi tau Mangkasara lanri tassungkei nawa-nawanna, akkasaraki rigaukna na attanjengi rikontutojengna. Salamakki nipara Salama.
Anne tulisanga parallu nipakmemung, na nicinik ulang.