Zağanozi, sifterigilepeşi (Accipitridae) familiaşen Buteo cinsiş mono3’ipxe maxare k’vinçepeşi oşkari coxo ren. Zağanozepe majura maxare k’vinçepeşen mçire msva do yanişa gontximeri morgvala k’udeli mutepeşite goşi3xunenan. Msva mutepeşi tamo gontximute putxunan do 3as go3’ak’ideri steri msva mutepeşi upatxineri ginz’e oras putxunan. 50-55 sant’imi t’anoni, k’aveşperoni bundğoni, mok’irk’e k’ik’iloni do menceloni ç’angoni maave k’vinçi ren. 50 k’onari ç’eşidi uğun. Zağanozepek ekseri bobolape do toli mutepeşis moxvaderepe ç’opupan do namtinoras k’vinçepes nat’k’va3enan. Obğepe muşi mç’ipe 3xik’epeşen ikipan do çiçku mutxape dolodumernan do capeşi vana anç’apeşi doloqlant’apes meşadumernan. K’undura do Mirk’aniş tutapeş oşkes imralenan. Xçela k’aveşperoni lekoni 3-4 markvali skupan. Monç’vaşi ora mutepeşi 28 dğa ren. Arxvala daduli muşi imonç’ven. Motalis artot o3’k’enan. 100 3’ana k’onari skidunan. Ç’eşidepe muşişi didopes jin k’ele xçe vana k’aveşperoni leke do ğareli msva uğunan. Mara artneri ç’eşidiş doloxe çkvaneri periti aqvenan.
Ok’ianusiaşen met’a k’arta k’itapes do k’un3’ulapes skidunan. Ekseri mt’k’alepunas do oncvinalepes skidunan. Dido mağala putxunan. Ginz’e saat’is 3as msva upatxineri aputxinen. Mçxu zağanozepek ekseri k’vinçi oğurinapan. Umosi ç’it’apek vasati buz’oni skidinape, maxosvalepe, mjvabupe, 3’i3’epe do bobolape ç’k’omupan. Avrop’as, oşke Asias do Afrik’as dido moixvadinen. Olande k’elenepek ihicretenan. Ohicretuşi oras 20-100 k’onari zağanozi artot putxun. Amerik’aşi k’itas mç’ita k’udeloni, mç’ita cinikoni dido zağanozi skidun. Zağanozepeşi k’uçxes, k’itepeşakis bundğa iqven. Tundrapeşi k’vinçepe renan. Zağanozepe k’un3xi ma3’k’omile renan do avepe muşi mağalaşen az’irenan. Zağanozepes k’oçiş tolişen ovro fara çkva k’ai az’irenan. Avi muşi oç’opu şeni manişa geputxunan. K’aixeşa gontximeri menceloni ç’angepete avi muşi ç’opupan. Zağanozepe irişen dido mtugi ç’opupan şeni dido nirgenan. M3kvit’urapeş motalepe ç’opupan do eputxunan. Oxorimç’k’inaşi maavobasti ixmarinenan.