K’oxi (K’ifozi), şkaşqvilişi k’ap’ulaş k’elen dido mondrik’u ren. K’oxi, bilasa badi do xçinepes dido ağodenan. Ham şekiliş ğuloba bazi var iz’iren mara şiddetoni iqvaşi zabunis var dvadginen do k’ap’ulaşi qvilepe kogaminç’en. Oğodapeşi otxoşen sumi berobaşi oras oxoi3’onen mara sebebi muşi var içkinen. Qvilişi çixot’k’aş notesire gagaçişiş oziyanus arçkva dido var moixvadinen. Bereşi nuzulik, k’ifosk’olyozişa (gagaçişi ok’oxinu do ok’ondrik’u) nusebebups. Bereşi nuzulik, ubaşi ar k’eleni adalepes notesiraps do ar k’eleni adalepes var amordinenan mara majurape imordanşi gagaçi komondruk’un. Badi do xçinepes şkaşqvilişi mondrik’obas ost’eop’orozik nusebebups. Gagaçişi qvilepe imç’ipanen do çodinas xuraşi monk’anoba var e3’vazden edo ya moindrik’enan yati ok’oizenan.
K’oxi, omordinuşi meselepe, gagaçişi arteriti steri dejenerat’iuri zabunobapeşi, orçak’uş nosebebe ot’axu do qvilişi ondğulu varna gagaçişi t’ravmate yeçkindun. Berepes, baliğepes do mordinerepes notesiraps. P’at’i dodgineri baliği k’ulanepes umosi didi post’uruli k’ifozişi risk’i uğunan. 10-15 3’aneri biç’epes umosi didi scheuermann k’ifozişi risk’i uğunan. Ost’eop’orozi oğoderi badi do xçinepes umosi didi k’ifozişa nosebebe gagaçişi ot’axuş risk’i uğunan. Bilasa baliğepes k’ap’ula mutepeşi morgvali uğunan varna mondrik’uşi on3’uranuş alet’epe oxmarinu dvaç’irnan şeni xuraşi p’at’i z’irapa aqvenan. K’ap’ulaşi k’oxi ora golaxtaşi umosi çkva iz’iren. Bazi oğodapes, gagaçişi mondrik’u, şiddetoni varna on3’ironi 3’k’unis nusebebups. Mara monk’a oğodapek, purpupe, xuçepe do majura hucrepe k’ala organepes notesiraps edo 3’k’uni do çkva meselepeşa gza meçaps. Antepeşa nadiren gagaçişi xuçepeş geobaz’guşen enoçkinde t’rik’işi osap’aru varna nuzuli naqonops.
Ekseri şkaşqvilis şekliuri ok’oxvobape unişane iqven. Ost’eop’orozik o3’k’unapaps do qvilepe perpo ot’axapaps. K’ifosk’olyozis, şkaşqvilişi anormali şekilik, şvanup’t’aşi k’aburgapeş jile-3’ale oxonk’anus do purpupeşi omçiranus mani iqven. Emuşeni zabunepek diaframişi oxonk’anute şvanupan. Vaxtite k’aburgas var oxvank’anen, oşvanu şeni umosi dido istik’en. Ciddi xalepes, zabunis k’ronik’i bronşit’is mengaperi purpuşi meselepe yeçkindun. Oşvanuşi meç’iroba, oxvalu do balğami iqven. Gurik, purpupeşa di3xiri oncğonu şeni umosi dido ixandeps do dvaç’k’inden. Emuşeni ubaşi do k’aburgapeşi elastik’obaş noqonu dido beciti ren. Onçviruk do onk’ap’inuk oşvanuşi adalepe oxandinaps şeni dido feidoni ren. Z’igarak, purpuşi meselepe monz’inaps; z’igaraş oşumu naşkvu unon. K’oxişi şvela, mondrik’uşi sebebişa do tesiri mutepeşişa mek’ireli ren. Şvelapes, fizik’uri t’erapişen omxvacuşi alet’epeşa, cerrahuri mudahaleşakis ç’eşidi uğun.