Wp/lzz/lat/Eremi

< Wp‎ | lzz‎ | lat
Wp > lzz > lat > Eremi

Eremi, eremgilepeşi (Cervidae) familias manç’amure tipimç’k’omu buz’oni skidinapeşi oşkari coxo ren. Eremepe Antarktik’a do Avust’raliaşen met’a gont’aleri renan. Eremepe tundraşen t’ropik’uri mç’imaşi mt’k’apeşakis çkvaneri biyomepes skidunan. Eremepe mt’k’apes skidunantina dido ç’eşidepe muşi mt’k’alepuna do 3xik’epuna k’ala k’irepuna do savanepeşi oşkes mçire mintik’apes skidunan. Edoxolo arxvala germapes, oncvinaleps, ç’anç’axepunapes do şu savanepes varna şirimonapete gok’ireli ğalepes maskide eremişi ç’eşidepeti koren. Kianas eremişi 50 k’onari ç’eşidi skidun. Eremgilepes jur didi grup’i uğunan: Muntiacinae do Cervinae tudeni familiapeşi mcveşi kiana grup’i k’ala Hydropotinae do Capreolinae tudeni familiapeşi ağani kiana grup’i.

Eremepeşi krape majura jur bu3xoni skidinapeşen çkvaneri ren do k’arta 3’anas moirdaşi qviloni nikten edo arxvala kimoli eremepes aqven. Ağanmorde eremişi maartani kra dobadinuşen yeçkindineri jur ç’it’a gamaqlant’aşen irden. Ağani yextimeri krape p’eci k’adifeşi t’abak’aş doloxe irden do am t’abak’a qvili ik’ap’et’anaşakis art-jur tuta matven. Uk’ule k’adife t’abak’a ibri3’en, ipaşen do kraşen gostun. Omzik’uşi oras kimolepek ilxişi doloxeni 3’unape ocezbu şeni artikarti k’ala krapete ik’abğenan. Artikartiş gomorgvas iktenan, t’rik’i mutepeşi mendrik’upan, dudi mutepeşi gendrik’upan do artikartis nat’k’va3enan.

3’una eremik ar faras art varna jur motali dorinaps, sum motali m3ika dvarinen. Mçinocobaşi ora vit tuta k’onari uğun. Motalepe didote kurkepe muşişi jin xçe lekepete dibadenan do irdaşi am lekepe gundununan. Eremişi motalik dobaduşa meqoneri eçi deik’eş doloxe maartani k’uçxepe ot’k’oçaps. Nana muşik çkar şura var duskidaşakis motali muşi loqups do pağups edo motali muşi var az’iran yado şinaxups. Motali eremi art dolonişakis tipepeşi doloxe şinaxeri dodgitaş k’ule nana muşi k’ala gvalen k’onari imencelen. Nana do motali muşi tak’ribi art 3’ana artot skidunan. Kimoli motalik arçkva nana muşi var z’irops mara 3’una motalik uk’ule muşi motalepe k’ala nana muşis elak’aten do ç’it’a ilxi 3’opxups.

Eremepes ekseri okti dixapeşa moxva ginz’e do menceloni k’uçxepe, zirmiç’i do ç’it’a xura uğunan. Eremepes dido k’ai ançvirenan. Tudeni çengeşi k’ibirepeş jin gverdi tuta steri minepe uğunan do dido çkvaneri lilvepe alağunenan. Eremepeşi k’uç’is otxo odap’ina uğun. K’arta eremişi tolepeş 3’oxle bezip’inape iqven. Am bezip’inapes mintik’a mutepeşi otespituşa nargeri menceloni şuroni fenomeni uğun. Eremepeşi dido ç’eşidi kimolepek işumanşi varna napatkalanşi am bezepe mçire gon3’k’ipan. Eremepeşi k’artayis safraşi kese var uğun. Eremepek oç’k’omale 3xunupan. But’k’apete iskedinenan. Dido oç’k’omale dvaç’irnan. Ordo inç’amuren k’imp’irepe, taze but’k’ape, taze çimenepe, çiçku do mç’ipe qape, xila, k’avi do likenepe k’ai a3’onenan.