Dombai, jurbu3xonepeşi t’akimişi kralonepeşi familiaşen manç’amure buz’oni skindinae. Pucis nungaps nati emuşen umosi mçxu ren. T’k’ebi muşi uça ren do m3ika rt’as nati ginz’e do nadiri toma gobğun. K’udeli muşişi 3’ungis pun3kulişi tomape t’k’ebişi tomapeşen umosi mçxu ren. Ekseri dombaişi t’ani jur met’re, mağalobati 1,5 met’re k’onari ren do ti muşi tudenk’ele genç’eri uğun. 3’k’ari do ç’anç’axis dolonciru dido k’ai a3’onen. Xura muşis naç’aberi t’alaxi p’arazitepeşen çumers. Dombaepe tak’ribi 22 3’ana skidunan.
T’rop’iuri do subt’rop’iuri t’aronişi muxurepes skidunan. Oxirale do mt’k’uri cinsi uğunan. Amerik’uri bizonişa “bufalo” vana Amerik’uri dombaiti itkven. Yulva Avrop’as, Anatolias do Oşkeyulvas oxirale ç’eşidepe, Afrik’as, omjore do omjoreyulva Asias mt’k’uri ç’eşidepe gont’aleri ren. Hindistanuri mt’k’uri dombaişi monk’anoba 1 t’onişen dido ren, tak’ribi 2 met’re mağaloba do kraşi ginz’enobati 1,5 met’re k’onari uğunan. Kimoli muşi, munç’qvi geocginaps k’onari gurami do menceloni ren. Dombaişi oç’opu cilo oç’opu k’onari oşkurnoni ren. Mt’k’uri dombaepe 10-20-oni cogepete ç’anç’axona do 3’k’arişi kinaris skidunan do seris ncupan. Kianas tahmini 78 milyoni oxirale dombai skidun do antepeşi tak’ribi 45 milyoni Hindistanis iskedinen.
Oxirale dombaepe, oğmale otiru, xor3i mja do t’k’ebi muşi şeni iskedinen. Kianaşi k’arta oxirale dombaepe, ç’anç’axonaşi dombai do ğalişi dombai cinsişen mulunan. Omjore Asias gont’aleri ç’anç’axonaşi dombai, dido menceloni ren. Mara mjoraş tude dido var dvadginen. Turkias, yulva Avrop’as do Oşkeyulvas, ğalişi dombai xomula oncvinalepes do beraği 3’k’arepes skidun. Dombaişi dido obonu do ç’anç’axişa geant’onu k’ap’et’i oqopinu şeni şart’i ren. Xor3i muşi dido nostoneri va ren. Mja muşi puci do mçxurişi mjaşen umosi yağoni ren. T’k’ebi muşi makoselobas ixmarinen. 10 tutas meqoneri mçinocobaş k’ule art motali dorinapan. Ekseri Mirk’ani-Pukrik’aşi tutapes dorinapan. Motali tak’ribi otxo 3’anas imorden.