Daniel Pipia (1896-1924)
Margali Baironi na ucoxoptʼes Daniel Pipia 1896 3ʼanaşi 1 Buloras Zugdidiş Mazraş oputʼe Obucis dibaderen Pʼavle Pipia do Ketevan Kʼvirkʼveliaş kʼeras. Çil do komocis Danielişakis jur biçʼi bere duğurelenan do Danieliş dobadinu entepeşeni dido oxeluşi rtʼeren. Mara Danielikti berobaşen zʼabuni iqu – marzʼgvani xe do kʼuçxes nuzuli geçameri rtʼeren. Babak dido tʼoxtʼorepeşa iqonu Danieli, mara emus mutuk var uşvelu. Jurdogverdi 3ʼaneri rtʼuşi baba duğurelen, 7 3ʼaneri rtʼuşi nana do kodoskidu aşo dalepeşi xes. Emuk jur kʼlasoni n3ʼopula Obucis doçodinu, do majurani n3ʼopulaşa idu, mara ogurapuşi para na var uğutʼu şeni ek var aguru. Okʼule emuk Kuteşişi Gimnazia doçodinu do Obucis mamgurapaleten oçalişus kogyoçʼkʼu. Am orapes okʼiçinu çkva didi kʼolxepe kʼala: Kʼalistʼratʼe Salia, Leo Kiaçeli, Egnatʼe Pipia do entepekʼala oputʼe muşişeni dido şeepe qu.
Danieli Kʼolxuri nenaten çʼaruptʼu. Emuk na çʼaru pʼaşura “Xomula Kʼoçi” qoropa do kʼoçinobaş heykʼeli ren. Çkva margaluri leksepeti dido mskva do maanoni renan. Danielik xolo1855-1856 3ʼanapes na iqu Margaluri Antʼifeodaluri Ti E3ʼozdaluşeni istʼoriuli pʼoema “Bulatia” çʼarelen. Daniel Pipiak Margalur- Kortuli Nenapunaşeniti matʼerialepe kʼorobelen do dido mskva ar xanda okʼodgineren, mara Pipias emuk var açodinu.
Daniel Pipia so3ialur-demokʼratʼiuli partʼiaş makʼaturi rtʼu do Okortue rusi bolşevikʼepek baxvaten keçʼopesşkʼule, emuk çkva pʼatʼriotʼepe kʼala dobadonaş moşletinuşeni osimadus kogyoçʼkʼu. 1924-s na ixaziretʼu antʼibolşevikʼuri ti e3ʼozdaluşi 3adalas amukti akʼatu – Zugdidiş Mazras madudale pʼropʼagandistʼI rtʼu. Mara am ti e3ʼozdalu var ixvenu, bolşevikʼepek mteli revolusionerepe oçʼopes do goxves – 28 3ʼaneri Daniel Pipiati entepeşi doloxe rtʼu. Kʼomunistʼuri orapes Danieliş coxoşi oşinu nkʼileri rtʼu. Emuş noçʼarepes çʼuptʼes. Mara çʼitʼa xolo kodoskidu do entepeşen jile na işinu steri: pʼoema “Bulatia”, pʼaşura “Xomula Kʼoçi” do mukʼotxani lersi ren.