Wp/lzz/lat/Cemal Gursel

< Wp‎ | lzz‎ | lat
Wp > lzz > lat > Cemal Gursel

Cemal Gursel 1895-s Erzurumis dibadu. Geç’k’apuroni n3’opula Ordus ik’itxu. Ok’ule Erzincanişi Malimuri Oşkendurn3’opulas ik’itxu. Ok’ule Mp’olişa idu. Kulelişi Malimuri Lises ik’itxu. Çodinari k’lasis ik’itxupt’uşi, Maartani Kianuri Ok’ok’idinu kogyoç’k’u. N3’opula naşkvu. Armiaşa ak’atu. Maotxani k’orp’usişa matopeşi ofi3eri iqu. 1915-şen 1917-şakis Çanakkaleşi ok’ok’idinupeşa ak’atu. 1 St’aroşina 1917-s, 41. Diviziaşi humbaraş bat’ariaşa o3xunuten Filist’inişi front’işa mendiçkvinu. Filist’ini do Suriaşi front’epeşi ok’ok’idinupes 41. P’olk’işi 5. Ti-moşletineri bat’ariaşi metauri oqopinot ixandu. Gazzeşi front’is, Englizepek eç’opes eya esiri oqopinot 19 St’aroşina 1919-s. Jur 3’anaşi morgvalis esiri iqu Egvipt’is. 6 Gimua 1920-s oxoişkvinu. Mp’olişa guiktu. Maartani leit’enant’i iqu. Erzurumişi K’ongresis na naqonu ndğalepes Anatoliaşa idu. Yulvaluri front’is na ixvenu mteli ok’ok’idinupeşa ak’atu. 1 St’aroşina 1922-s k’ap’it’ani iqu. Didi nank’ap’aşa ak’atu ok’ok’idinuten. Ok’ok’idinuşi medalioni do Ti-moşletinobaşi medalioni niçinu emus.

1929-s Ok’ok’idinuşi Ak’ademia oçodinu. 1958-s Dixaluri armiaşi sardali iqu. 2 Pukrik’a 1960 tariğis, Dudoçvaluşi Naziri Ethem Menderesi moik’itxu. Am mok’itxaşi oras guris na uğut’u simadape emus u3’u. Ok’uleti Dudnaziri Adnan Menderesiş P’rezident’i oqopinuşa mxuci na meçapt’u ar kart’ali ç’aru 3 Pukrik’a 1960-s. Dulya na izmont’u steri var iqu. Tek’avudi iqopinu. Eti İzmirişa idu. 27 Pukrik’a 1960-s, p’olk’ovnik’i do tudeni rut’beloni ofi3erepeşk’elen ar malimuri darbe ixor3inu. Darbe na qu Na3ionaluri Artobaşi K’omit’et’işi davetiten am k’omit’et’işi dudmaxvance iqu. Darbe k’ala mek’iroba var uğut’u do mxuciti var meçeret’u mara darbeşi go3’oncğonerot ignapinu mtel kianas.

1961 3’anaş dudk’anonişi oxazirus didi roli aqu emus. Dudk’anoni şeni referandumi i3’opxinu do k’abuli ixvenu. 10 Gimua 1961-s na ixvenu 3xunaş k’ule na i3’opxinu Turkiaş Na3iaşi Didi Meclisişk’elen i3xunu maotxani P’rezident’i. Oxen3aluri Goşogoraşi Bibliotek’a do Turkiaşi İlmiuri T’ek’nik’uri İnst’it’ut’i k’idu. İptineri svaloni do seriuli omrala na noğirapt’u “Gektala” (“Devrim”) coxoni avt’o-manganaşi p’roget’i kogyoç’kapu. “Aga” z’egneloni maartani do teği malime na rt’u Cemal Gurselik masumani P’ezident’i Celal Bayari do mcveşi Generaluri Şt’abişi dudmaxvance Ruştu Erdelhunişi molaxunuş cezape oxarsuvu. Adnan Menderesi, Fatin Ruştu Zorlu do Hasan Polatkanişi go3’ok’idupe meğu şeni, şurdoguriten ixandu. Zabunoba muşik dulya oxvenuşa gza na var meçapt’u şeni, misia muşi diçodu. Cemal Gurseli 16 St’aroşina 1966-s doğuru. Fransuli nena uçkit’u.

Am ok’ok’idinupeşa ak’atu: Çanakkaleşi zoğaluri ok’ok’idinupe: Ari Burnu - Seddulbahir - 1. Kirte - 2. Kirte - 3. Kirte - 1. Kerevizdere - Ziğindere - 2. Kerevizdere - Anafartalar - Conkbayiri; Sina do Filistini: 1. Suveyşi - 2. Suveyşi - Romani - Magdhaba - Ramallah - 1. Gazze - 2. Gazze - 3. Gazze - Bir - Seba - Kudus - Megiddo; Berz’enişi Front’i: 1. İnonu - 2. İnonu - Kutahya - Eskişehiri - Sakarya - Didi Nank’apa.