Bronşit’i, bakt’eri do virusi varna otaxrişoni k’oma, gazi varna tozepeşi sebebiten, bronşiş muk’ozapes na iz’iren oiltihabu ren. Bronşit’i, generalurot xuraşi nodgitinuş reflek’siş sebebiten na yeçkindun zabunobapeşi grup’as işinen. Nodgitinuş sist’emak, infek’sionis mani oğodinu şeni bronşepes di3xiriş goxtimu monz’inaşi, bronşi ibaren do oşvanus niç’irinen. Edo xolo am xalis, bronşişi epit’uri hucrepesti na var axandinen şeni havaten na işvanen zararoni mutxanepe direkt’ot purpuşa nunç’işun. Aşoten normaluri orapes st’erili bronşepes iltihabi yeçkindinuş xali iqven. Am xalikti balğami oqopinus gza meçaps.
Bronşit’is, ak’ut’uri bronşit’i do k’ronik’uri bronşit’i yado jur ç’eşidi uğun. Ak’ut’uri bronşit’i; generalurot grip’i, elemit’a, k’ok’i3’a varna tifo steri zabunobapeş oras iz’iren. Ak’ut’uri bronşit’oni zabunepes, pusoni do qini t’aronepes dido naç’irenan. Zabonobaşi geç’k’alas; ubaş ç’vini, 3’k’unoni oxvalu, m3ika men3axoni balğami, ok’ule gingiloni do ceraxat’oni balğami k’ala m3ika t’u3anoba do uxaloba iz’iren. Zabunobas oşvelu dvaç’irs. K’ronik’uri bronşit’is; havaşgzape na oyağups bezepe irden, doloxen k’eleni bundğape na var irgen xalis nikten. Am zabunobasti oşvelu dvaç’irs.
Z’igara uoşumu do na işven svas udodginu uk’ors. Gale sp’ort’i oxvenuk oşvanuş sist’ema ok’ap’et’anaps. Limcis, cumu k’ateri t’u3a 3’k’ariten k’uçxe obonuk xura oraxat’apaps. Bronşit’ik, 3’k’ariş xacet’i monz’inapaps. Ar ndğas 2-3 lit’re, odaş t’u3anobas mzgudaş çai do 1/4 nispet’is xiliş 3’k’ari k’ateri 3’k’ari oşvu unon. Papat’ya, kekik’i do adaşçaiş buxari k’ala na ixvenen k’omaş oşvanuk, 3’k’uni om3ikanaps do zabunobaş geç’k’alaşi oxvalu oçodinaps. 1 lit’re k’onari 3’k’ari xarxalaşakis it’ibinen, 2-3 k’izi mzguda nik’limen do 10 deik’e k’onari demi aqvas yado içven. Emuşk’ule xolo xarxalaşakis it’ibinen. Çaiş angi do ti didi ar peşkiriten goitvinen, tolepe oidvinen, k’oma p’icişen do çxindişen tamo tamo do 10 deik’e k’onari işvanen. Gale gamaxtimu şeni irişen m3ika ar saat’i k’onari oçvu dvaç’irs. Varna qini havak bronşepeşa şok’i oğodaps. Artneri reçeta, 3-4 k’izi m3ika zeri rezene k’alati ixvenen. 3’oxlenurot berepes do mordinerepes topuri k’ala nostoni meçameri du3xuş çai do asp’irini oşvuten oncires upi geçamu dvaç’irnan. Du3xu do asp’irini artot işvinaşi ant’ibiot’ik’aş m3ika tesiri meçaps. Upi geçamukti, xuraşi zehironi maddepeş gale ot’k’oçinus nuşvels.