Brincis dido k’ai soti unon, mjoroni, mgvaneri soti unon. 3’k’arişi brinci çkva ren, xomula brinci çkva ren.
Xomula brinci aşo iqven: İrişen 3’oxle Mariaşinas nap’iri dop’3’ardupt. O3’ardu aya tkvala ren, tipepe na moxtu, mutxani ocu moxtu, aya ocuşi ç’k’emepe va doskidas, ç’k’emi mumert’aşa aya kagamavimert gale, dop’3’ardupt. Xete dop’3’k’ipt, lazut’i xaçkeri t’ui, mutxani xaçkeri t’ui, emuş doloxe dop’3’k’ipt do kodovobğapt gale, 3’anaşe brinci na pxaçkaminonan şeni. Mevulut do İgrik’as brinci oxaçkus kogevoç’k’apt. Brincisti oçkinu, maçkinale unon, brinci mebğu k’arta k’oçis va nabğen. Mteli ar k’arali nobğasunon, ena istolas. Ok’ule dopxaçkupt aya soti, k’ai gamixaçken torxi, bergiten. Bu3xite dopatxupt, dobu3xupt do k’ai dopağupt aya brinciş nap’iri. Eya soti, nak na pxaçkupt soti, emus nap’iri u3’umernan. Ok’ule mevulut do ar k’ati dik’inen aya brinci. Ar k’atişk’ule govaktet do jur k’atiti dop’k’inupt. P’at’i tipepe p’3’k’ipt do mepxupt gale, brincis bela var aqvas yado. Jur k’ati na dop’k’inatşk’ule çkva mevaşkumert. Mariaşina na mek’ilasşk’ule ordoxolo ti dikips brincik, kamuinç’en. Xangamite dop’ç’k’irupt do xeşi dovikipt. Aya xeşepe movimert do oxoris makudules kogevobğapt ç’eris, daçxiri na migzunan sotis xomasunon. K’ai na doxomaşk’ule gevimert oxorşkagurişa do gale ğocişa, xocis mevuk’irupt tok’i do ar k’oçik xoci oktaps edo aya brinci ikirçolen. K’ai dopkirçolatşk’ule çertiği dopşatxupt do xaros kodovobğapt (çertiği, brincişi uxone dane, pxa muşite arto m3’u muşite). Muk’o na minonan, yebzdipt, mendavimert onçamureşa, onçamures dolovobğapt do domçxvarupt, dovikipt brinci.
Onçamure, didi kva xoneri ren, kva eşat’oxneri ren, k’ai didi kva do ek dilibğen. Onçamures ondi uğun, mangana, xe gek’limuşiti uğun. Manganas rk’inaşi nali muiç’k’aden. Mangana gez’in çat’alepes do mangana ikten. Mangana oktu şeni k’ai gureli t’aginon, akolendo k’uçxe gedgaginon ar semtişen do mangana e3’izdasunon; ok’ule k’uçxe niğaginon, geut’alaginon majura k’uçxe do manganak zori geças. Tudenti çkva eluxen k’oçi, namutxanik na nubğasunon brinci, uktasunon do k’artayis geçasunon, k’artak’ele giçasunon. K’ai yulun-geulun do dinçxvaren. Ok’ule doşatxi do brinci diqven.
3’k’arişi brinciti aşo iqven: 3’oxle nak’adi dikipan, nak’adi eya tkvala ren, e3’azdimeri soti mağala dikipan ar semtis, 3’k’ari xazi kogeudumernan do nak’adi u3’umernan emus. Xolo arçkva nak’adi ikipan, jur-sum nak’aditi, dido nak’adepe ikipan, mundes na aya dixas 3’k’ari geoxunan, ek dolodgitasunon do ntalasunonan. Amulunan do aya nak’adiş doloxe dontalupan k’aixeşa, xetenti k’uçxetenti. Ok’ule 3’k’ari kageun3’irupan, çertiği konobğapan. Ek obu3xu do çkva mutu oxvenu var unon, xvala ontalute brinci yulun. Egere mjoroni t’aroni diqu, k’uraği diqu na, em vaxtis nulunan do 3’k’ari kogeuxunapan muşi xargite. K’arta nak’adis xargi uğun çkva. Aya 3’k’ari hepei vaxtis gexuneri iqven, ok’inuş vaxtişakis. Ok’inus nulunan do 3’k’ariş doloxe dok’inupan bataği (brinciş 3’k’ariş qona). Ok’ule tekrar dok’inanşk’ule hepei vaxtis na 3’k’ari gexet’as, brinci na artuk nit’aşk’ule, 3’k’ari kageun3’k’ipan. Ar kinarişen kanaşkumernan 3’k’ari do 3’k’ari kageskirun, kageoskirinapan. 3’k’ari na kagen3’iranşk’ule brinci diqven edo amus u3’umernan 3’k’ariş brinci. Ayati diç’k’iren xangamite, xeşi diqven, zvini dikipan. Brinci na doxomaşk’ule 3xenite amuluxtepan do doktapan. Çertiği doşatxupan, kezdipan, mendimernan xaroşa.
Eya sotepes, naya sotis na dido brinci iqven sotis, xvala onçamurete var iqven, ak dingi uğunan. 3’k’ari moqoneri ren. Eşote xveneri ren dingi, 3’k’ari na geabas, mangana yisels do geçaps. 3’k’ariş gebuş soti uğun do ena omonk’anas, e3’izden, tekrar geli3’inen, geçaps. Edo goğu-moğu var unon emus, muşebura dingik normaşa koniqonops, donçxvarups.