Wp/lus/Zirsangzela Hnamte

Zirsangzela Hnamte (1952-2002) hi kum 1952, pawltlâk thla ni 1-ah Sialsuk khuaah a piang a, a pa chu Kawlkhuma a ni a, a nu chu Pi Tlangruati a ni. Unau pariat zing a upa ber a ni.

Zirsangzela Hnamte
A thlalâk
Zirsangzëla Hnamte thlalâk
A chanchin tlangpui
Hming	Zirsangzela Hnamte
Pian kum	Kum 1950, pawltlâk thla ni 1, zirtàwpní
A pa	Kawlkhuma
A nu	Tlangruati
Thih kum	Kum 2002, khuangchawi thla ni 15, thawhlehní
Sülhnu lam
Kutchhûak	Ainawni, Sekibuhchhuak, Phurh zawh loh zùn ladt.
Chawimawina	Mizo Hla Kungpui Mual-ah sengluh a ni; Hetah hian a lawmman dawnte en la
Hriat hlawhna ṭhenkhatte
Hla phuah thiam, Mizote zinga ngaihsàn hlawh berte zinga mi a ni.

A naupan lai

Zirsangzela hi a naupan tet aṭanga ze danglam tak nei, ngawchawi leh zakzum tak a ni. Mi pawi sawi hlau tak, duhtui tak lawi si a ni. Ṭhenrual leh puipunna a awm aia mahni a awm veng veng ngaina mi a ni a. A mizia hi sawi fiah thiam a har a,mize danglam tak a ni tih hi mite sawifiahna a ni fo.

A zirna

Zirna lamah Govt.P/S Sialsuk atrang in class III a zova,Middle School chu a pa thawhna Govt.M/S Bualpui(Ng) leh Thiltlang ah chunzawm in,high school chu Rabindranath Tagore International H/S Delhi-ah a zawm a, HSLC Durtlang High school tang a pass chhuak in Shankardev College,Shillong atangin BA a zir chhuak a ni.

B.A. a passed hnu-ah All India Radio-ah Programme Executive hna a thawk a, a hnu-ah Aizawl Station AIR-ah, Assistant Station Director hna a thawk leh a ni. Hla 70 vel a phuah a, hla phuah thiam ber lawmman pawh ţum engemawzat a lo dawng tawh a ni.

Thu leh hla lama a ke pen ţan

Ze danglam tak pu a, mahni maia hun tam tak a hman lai hian thu leh hla lamah mahni tui tuiin a tui em em thung a. Kum 17 mi a nih atanga hla phuah tanin, a hun tawp thleng hian hla 70 zet a phuah a ni. Heng a hla phuahte hian a hun lai chuan Zoram dung leh vang a deng chhuak tih theih a ni a. A hla thenkhatte phei chu, "'Hnam Rotling' a ni," tih te pawh a hlawh ve hial a ni. A hlaphuah Zonunmawi chu Post Graduate zir atan thur chhuah a ni a, Sekhibuhchhuak chu H/S zirlai atan; Darthlalang chu Middle School zirlaiah telh an ni nghe nghe a ni.

A lawmman dawn ṭhenkhatte

Heti taka thu leh hla a tuipui avang hian chawimawina chi hrang hrang a dawng hlawm a.Chungte chu:

1. Best Composer of Mizo Songs -
   • (a) 1977:Shillong, Ṭhalfavang Kut
   • (aw) 1980:Mizoram Beat and Music contest Organised by IPR &T Govt. of Mizoram .
   • (b) 1981,1982,1983:Ainawn Weekly Magazine, Pick Your Pop Opinion Poll.
   • (ch) 1984, 1986,1990:Lelte Weekly Magazine, Five Tops of MIzoram poll.
2. 2nd Prize in Mizo Songs Composer-
   • (a) 1992: Lelte Weekly Magazine,Five Tops of Mizoram Poll.
3. Composer of song of the Year-
   • (a) 1989: Mizo Zaimi Inzawmkhawm Award.
   • (aw) 1986: Lelte Weekly Magazine, Five Tops of Mizoram Poll.
4. Third position In Singing-
   • (a) 1977: Shillong Thalfavang Kut.
   • (aw) 1980: Mizoram Beat & Music Contest, Organised by IPR&T Govt. of Mizoram Poll.
   • (b) 1986: Lelte Weekly Magazine, Five Tops Of Mizoram Poll.

A hnathawh dang ṭhenkhatte

Kum 1980 a Mizo Zaimi Inzawmkhawm(All Mizo Singers Association) din a nih khan a dintute zingah a khaipa ber a ni a. General Secretary hna a zawnin kum 8 chhung a chelh nghe nghe a ni.

All India Radio-ah hla 40 zet khungin, "B" High Grade Music Artist a ni mek a. Doordarshan Kendra AIzawl-ah pawh hla 4(pali) a khung bawk a ni.

A dam loh leh a thih thu

A nat dàn tlangpui

Kum 2001, khuangchawi thla-ah khawsik leh chaw helha insawisel ṭanin sahmulphah thla-ah Doctor panpui a ni a. Biopsy te laa en a nih hnuah chaw kawng cancer a ni tih hmuhchhuah a ni a. Kum 2001 Sahmulphah thla ni 30-ah CMC, Vellore panpui nghal a ni.

Vellore ah hian uluk taka en a nih hnuah a cancer hian zung a lo kaih thui tawh avangin enkawlna dawng ta lovin Chemo an pek hnu-ah in lama inenkawl turin December ni 23, 2001-ah Aizawl an lo thleng chho leh ta a ni. In lama enkawl a nih chhung hian na tak tuar lovin, ei leh inah pawh harsatna lutuk nei lovin a awm a. Vellore Doctor-te'n kal leh hun tura an ruat sak February, 2002-ah Vellore panpui leh a ni. Treatment an lo pek hnu-ah rei pawh awmpui lovin in lama inenkawl turin an lo haw leh mai a. Hetianga in lama enkawl a nih chhung hian a natna hian a pawt hniam hret hret zel a. Thil nem leh tui ril bak a eiin a in hleithei ta meuh lo a ni.

A boral

Hetianga hun engemaw chen a awm hnu hian September 12, 2002 khan Suangpuilawna Pu Parmawia rawngbawlna panpui a ni a,Suangpuilawn ram chin an thlena, tlai tin dar 3:00 vela a khawsik ziah thin, a khawsik awm ta lo chu mak a tih thu a sawi chhuak a. A tuka Pu Parmawia'n a han en chuan, "In rawn tlai deuh mang e aw," a ti a. Amaherawhchu ngun taka a en hnu-ah, "Pathian i ring em mai a, i dam ang," a ti a. Tawngtaina hmanga a khawih hnuah, "Tunah chuan i dam tawh e, Chaw rum pawh i duh duh i ei thei tawh ang," a ti a. A sawi ang ngei chuan an thlen inah midang rualin zanriah a kil a. A chaw bar hmasak ber a han lem tur chu a tim hle a, rei lo deuh chu a lem mai ngam lo va. Ama sawi dan takin, "Hetih lai hian ka rinna 5% in a tlahniam a ni," a ti. A han lem ta chu engmah na a lo awm ta lo va, tui ti tak leh puar takin a ei ta a ni. Haw kawngah pawh Hotel chaw puar takin a ei a, in lamah pawh chaw hi a ei zui peih a. Ni thum hnu lam atangin chaw chak lohnain a bawh tan a. Tuisik bak engmah a ei tak loh avangin a ni telin a hniam zel a. October 15,2002 zing dar 2 vel atanga chau zualin chawhma dar 10:30 ah chatuana chawl turin min peih lohsan ta a ni.

A natna a tawrh dàn

A natna chungchangah a phunnawi ngai lova, vuithu emaw, a rilru nat thu emaw a sawi ngai hek lo. A tuarchhelna hian a nunna pawh a pawtsei ni hialin a lang a ni. Ropui em em sawi hmaih hauh loh tur chu Zirsangzela hian a damloh chhung zawng hian mimal, chhungkua leh Kohhranho tawngtaisakna a dawng nasa em em a, he'ng avangte hian Pathianah thlamuanna nghet tak neiin a hun hnuhnung lamah phei chuan Pathian a kawm reng a, a chauh zual hnu, a tawng peih meuh tawh loh hnuah Lal Isua'n a awmpui em? A thla a muang em? Lal Isua'n a chelh tlat em? tia a nupui Lalhungchhungi zawhna te chu, "Aw," tiin a chhang zel a ni. A la tawng peih laia a unaupa hnena a thusawi, " Kei chu ka piangthar tawh a, thih hi ka hreh lo," a tih te hian thla a ti muang em em a ni.

Awm lo ata dintu, enkawla kaihruaitu, Chungnungbera kan Pathian hnenah Ropuina leh chawimawina awm zel rawh se.

A kalsan tâk a chhúngte

• A nu leh pa : Kawlkhuma leh Tlangruati, Mission Veng

• A nupui : Lalhungchhungi Pachuau.

• A Fate :
  • Catherine Zoremsiami Hnamte
  • Osmond Lalmuanpuia Hnamte
  • Zonunmawii
  • Stephen Marcus Rualzakhuma Hnamte

• A tupa : Elijah Lalmuankima

• A Unaute :
  • Zolawra Hnamte
  • Lalbiakdika Hnamte (F)
  • Lalbiakfeli
  • Lalsangbera Hnamte
  • Lalmuankima
  • Lalfakawmi
  • Vanlalhluti

A hla phuahte

1. Lo Kir rawh (1969)
2. Tawn leh ni tur (1969)
3. Dam ni her ve ang maw suihlunglen hi (1969)
4. Nunhlui liam hnu (1969)
5. Kar hla di (1970)
6. Remna lo leng rawh se (1971)
7. Din thar leh ang (1973)
8. Tni her thuai se (1973)
9. Sem zel nang e hmangaihna (1973)
10. Tawn har di (1973)
11. Run zau (1973)
12. Di len mawii (1974)
13. Kam khat a tawk (1974)
14. Lunglen tuar zir (1974)
15. Phurh zawh loh zun (1974)
16. Ka ring lo che (1974)
17. Hmangaihna rinawm (1974)
18. Lawm thu (1974)
19. Ainawni (1975)
20. Dawn lo (1975)
21. Thai Mami (1975)
22. Di Hlui (1975)
23. Phengphe Nunnem (1976)
24. Lenrual An Kim Ta Lo (1976)
25. Mary Jones School (197*)
26. Pawm Leh Nang Che (1977)
27. Autograph (1977)
28. Ka To Ber (1977)
29. Thal Favang Kut (1977)
30. Thuchah Hnuhnung (1977)
31. Kawmthlang-Nu Chan (1978)
32. Piancham Lawm Hla (1978)
33. Bang Ziakin A (1978)
34. I Tan Ka Nung Tawh ang (1978)
35. Hlim Zan (1978)
36. A Pawi Ber Mai (1978)
37. Darthlalang (1978)
38. I Chul Tur Hi (1979)
39. Sulhnu Leh Lunglen (1978)
40. Thahmingliani (197*)
41. Zeenat Aman (1978)
42. Luah Loh Run (1979)
43. Thlafam Vangkhua I Kaipui Le (197*)
44. A Nem Zel Ngai e (1979)
45. Zo Nun Mawi (1979)
46. A Hril Ve Tur (1979)
47. Run Hmun Len I Rel Ang (1979)
48. A Pawi Mange Ka Thian (1980)
49. I Mawi Ber Mai (1980)
50. Thlafam Min Chansan Le (1980)
51. Engvang Nge Ni ? (1980)
52. Ka Ngai Ber Che (1980)
53. Perkhuang Zai Tin Thiam (1980)
54. Lawm Zel Tang E (1980)
55. Zoremsiami (1980)
56. Hnem Dun Ang Aw (1980)
57. Sekibuhchhuak (1981)
58. Chun leh Zua Ngaih (1981)
59. I harh ang U (1982)
60. A Rem Lul Lo (1982)
61. Kumtluang Par (1987)
62. Pathian I Ni Si A (1995)
63. Kan Ngai Em Che
64. Ka Hmang Ral Leh Thin
65. Tah A Tul Leh Thin
66. Biakloh Di Zun
67. Hangaihna Tluantling
68. Cho Loh Di (1982)
69. I Harh Ang U (1999)

Thulâkna

1. Class-IX Mizo (MBSE) Second Impression : 2002
2. Pi Lalhungchhungi
3. Zirsangzela hla te : 2002