Wp/lus/R.A.Lorrain

R.A Lorrain, mizovin Tlongi Pa tia kan hriat hi Mara rama thawk Zosap pakhat a ni.

Pian leh murna

R.A. Lorrain (Lakher Zosap), Mizovin ‘Tlongi Pa’ kan tih chu July 10, 1880-ah a piang a, a pa chu James Lorrain a ni a, London Post Master hna thawk thin a ni. Serkawn Zosap Pu Buanga (J.H.Lorrain) nau (chhul khat kual) a ni a, a lei a thial let tawp tawp thin avangin ‘Thialleta’ an ti bawk. R.A.Lorrain hi a tlangval lai chuan a sakhaw-mi vak lo a ni awm e. Lakher rama a lo chhuah hma hian Canada ramah te a awm a, America ramah ‘Texas Rangers’-ah te tangin Wild West lamah hnuhma a nei ve a sawi a ni thin. Mizoram a lo chhuahna chhan hi a u Pu Buanga vang (lehkha a thawn thin a) kan ti thei bawk ang chu. A rilru a lo puitlinin Pathian rawngbawlna lamah a rilru a pe ve ta a ni.

Mara ram thlen

Kum 1907 Sept ni 26-ah Lakher ram Serkawr a lo thleng. Mi taima tak leh chak tak, kut hnathawh hreh lo mi a ni a, silai leh ran vulh a ngaina hle. Chuktuah huan pawh a siam nghal a ni. A bungalow chu ama sak vek tih theih a ni a, tukverh leh kawngkhar siamah tih loh chuan mistiri a ruai lovin a sa peih vek a ni. In hnih lian tawk a sa zo va, huan zau tak a nei bawk a. A huanah hian thlai tam tak a chin bakah balhla, thingtheihmu, adt., a ching bawk a. Thingthehmu chu thlur neiin a ching a, a chung lamah a suihfintir a, nuam taka lawh theihin a siam a, arah chuan jam a siam thin. A huan pal chu kumzaparin thuah thumin a hung chhuak vek a, zawhte lo chu ran dang reng reng an lut thei lo. Ran vulh lamah sakawr te, bawng te, kel te leh ramsa, zawngte, vapual te a khawi a, ar tamtak a vulh bawk a ni.

Hna thawh tir

Mission hna a thawh tan tirh chuan chawmtu mumal nei lovin, amahin a han bei phawt a, a inenkawl chawp a ni. A sikul naupangte leh a hote nen, Tlabung (Demagri) mel 112 laia hla atang chuan rawsawt an zuk phur thin. An sikul headmaster Khidia (Saimova pa) phei chuan mawn (kg 40 vel) khat a phur thin an ti. Heng hun lai hian Serkawr ram lamah chi she a harsa hle a, chuvangin thingtlang lama mite chuan a hnen atang hian chi seh an lei thin a ni. A chanchin hi ziakin Sap ramah a thawn thin a, a chanchin an lo hriatin a thian thenkhatte chuan tanpuina an thawn hlawm thin a, chu chu a tan chuan hlu tak a ni. A ranvulhte hi a sikul naupangte’n an enkawl pui thin.

Nupui fanau

Fanu mal a nei a, a hming chu Louise Marguerite Tlosai Lorrain a ni a (Tlosai hi Lakher Lal tihna a ni awm e). Tlawntlai tha tak mai, pian thiam leh nalh tak, nula hmel tha tak a ni. Ram danga lehkha zira kal chhuak chuang lovin, a nu hnen atangin a zir mai thin a ni. Kum 1928-ah anmahni tanpui turin sap tlangval pakhat Albert Bruce Foxall a lo chhuak a, an tangkaipui em em a ni. Tlosai nen chuan an lo in ngaizawnga, an innei ta a ni. Makpa chhungkhungin a awm a, a hming pawh A.B.Lorrain Foxall tih a lo ni ta a.

Thih

Kum 4.2.1944-ah R.A. Lorrain hi a thi ta a, a ma huan, Serkawrah chuan an phum a, A thih hnu hian Foxall hian a hna hi a chhunzawm ta zel a ni. Tlosai leh Foxall te hian fanu mal chauh an nei leh a, a hmingah chuan Violet Foxall an sa a. Violet-i hian lakher tlangval L.Mark chu pasalah a nei a, fa pawh pathum (?) emaw an nei a ni. Pu R.A. Lorrain-a nupui (Tlongi nu) hi a thih hian an pa thlanah, a kiangah an phum ve an ti a. Tin, Tlongsai hian natna khirhtak a nei a, Ludhyana Christian Medical College an pan a, kum 1960-ah Ludhyana-ah chuan a thi a, chutah chuan an phum nghal a ni. A.B.Lorrain Foxall hi kum 1977-ah a thi a, Tlosai nu leh pa thlan kiangah an phum a, Mizorama Zosap awm rei ber a ni.