Kaisar-i-Hind hi Queen Victoria hunlai a Civilian chawimawina sang ber a ni a. Kum 1900 atangin 1947 thlengin British Khua leh tui hnathawk tha chungchuangte chawimawinan an pek thin a ni. Hemi inkar kum chhung hian vawi 142 chawimawina hlan a ni. Kaisar-i-Hind medal hi chi thumah then a ni a, Gold, Silver leh Bronze te a then a ni. Kaisar-i-Hind chungchang hrechiang duh tan Click theih. Kan Zosapte zingah khan mi 5-in an dawng bawk niin an sawi.
Mizo zingah hian Kaisar-i-Hind dawngtu pahnih an awm a, chungte chu Khamliana Lungleng Lal (Silver Medal 12th Dec 1911) leh Dr. Thantluanga (1943) te an ni. Khamliana chanchin hi chu Lal fing leh fel, taima, Mizo Lal te zingah pawh hausaber kha a ni a. A thlahte hian an chawimawi thiam bawk a, a chanchin leh a sulhnu hmuh tur a la awm nen sawi tam lo ila. Dr. Thantluanga hi thangtharte hian a chanchin hi kan hre vak tawh lo niin a lang a. Mizo History-ah a hming a dai tawh ngai lovang tih bak hi chu engvanga a medal (Bronze) hi dawng nge tih kan chhui vak lo niin a lang.
WWII laiin Japan ral lo lian chuan British Sawrkar rin phak bakin hma a rawn sawn chak ta si a. Japan dan an lo tumna Singapore phei chu reilote chhungin an la ta mai si a. Burma ram atangin kum 1942 a British Army lo hnungtawlh thla chu Fur-in a nang nen sang tam tak an thi a, damlo tam tak insaseng hlei thei lo an awm bawk a. Heng ho hi huaisen leh chhel taka an lo enkawl avangin Dr.Thantluanga hian a beisei phak miah loh Medal chu kum 1943 khan British Sawrkar chuan a pe a ni.
He medal hi a chhuanawm teh reng nen hian a thlahte hian a chanchin hi sawi zau leh hriatrengna tur lehkhabu emaw an ziak hriat a ni lova, Mizo hnam tan a chhuanawm teh lul nen….!!! A fate hi Mizoram Sawrkar hnathawkin Officer lian tak tak te pawh an awm a, an inngaihtlawm vang nge ka hre lo, a chanchin hian sawi a hlawh zui lem lo. Thangtharte tan a chanchin hi “Thu ngaihnawm” a tling a ni.
Hei, a sulhnu ka nei thei hlauh mai a, a chhungten an phal chuan Nampong ‘Hell Gate” atanga Sipai raltlan an lo buaipui nasat zia rawn post ka tum ang. A medal dawn a ziah dan hi kan rawn zep tel zauh e. A chanchin hria chuan i thawh khawm teh ang u, Aizawl Thakthing Veng an nih kha!
“Inspector General-in ka chawlh phalna chu a tuk maiah a rawn thawn a, ka haw thei ta. Chutichuan Zoramah ka hna chu ka chhunzawm a, Vanlaiphai-ah ka awm a, ka nupui neih ni takin Helio message kaltlangin Bawrhsap hnen ata thu a lo thleng a. Bawrhsap chuan, “Kum 1943 New Year Honour List-ah Kaisar-I-Hind an pe che,” tih a lo ziak a. Ka pa Sainghinga’n Gazette-ah ‘Dr Thantluanga, Esquire’ tiin an chhuah che min ti bawk a.” tiin.