Wp/lus/Hrawva

Rolala Khiangte (1893-1956) hi kum 1893-ah a piang a. Kum 1924-ah B.A pass hmasa ber pahnih awmah khan pakhat a ni. Kum 1926-ah Govt Boy's M.E School zirtirtu a ni tan a, kum 1927-1945 thleng he school-ah hian Headmaster a ni. Headmaster a nih lai hian thla khatah cheng 52 a hlawh a, a tam tham em vangin an chhung hian an ei seng ngai lo. Kum 1942 atangin 1954 thleng Aizawl (Aijal tih thin) lal a ni a, kum 1956, ṭau thla ni 28-ah a thi a, Aizawl Venghlui thlanmualah phûm a ni. Hrawva hian hla 15 a phuah a, hla thu mawi tak leh awmze nei taka hla phuah thiam a ni. Fapa 6 leh fanu 7 a nei a. Naupan laiin 2 an thi a, a dang zawng 11 chu puitlin thleng an dam. Pu Hrawva hian Calcutta atangin BA a pass a, khawvel thil zawng zawng hre vek turah an ngai thin a. A pass tirh hian BA pass lawm nan tlang zawlah mei an det an ti.

Hrawva
A thlalâk
[[File: |px|]]
A chanchin tlangpui
Hming	Hrawva
Pian kum	Kum 1893
Thih kum	Kum 1956, Ṭau thla ni 28
Sülhnu lam
Kutchhûak	Mi Ropui
Hriat hlawhna ṭhenkhatte
Mizo B.A. pas hmasa, hla phuah thiam

Hetia BA a pass hnu hian Tv. Hrawva chuan nupui atan Lalluii Chhakchhuak, Pu Tiltea fanu, Melthum nula hmeltha chu a va rim thin a. Eng emaw chen a rim hnu chuan inneih an rel thlu ta a. Inneih ni te an ruat fel hnu chuan an inneihni hma kar khat vel lekah monu pa Pu Tlanchhawna chu a boral ta thut a. Hei vang hian inneihni thla khat laiin an sawn hla a. Inneihni ruat a lo thlen leh chuan a hma kar khat vel bawkah monu tur nu chu a boral leh ta a. tichuan laina leh thian tha reng reng chuan an inneih hi a rem lo, a tluang lo ang tiin inneih thulh hlen turin an rawn sup sup a. Hetih lai hian Tv. Hrawva hi a pian thar tawh avangin a ni chuan, " A pa a chan a, a nu a chan leh tawh bawk a, hetih taka khawngaihthlak nula hi keiin ka neih loh leh zel chuan a khawngaithlak zual lutuk ang, chuvangin ka nei ngei tur a ni," tiin a tang ve ta tlat a. Tichuan hlim takin 1926 khan an lo innei thei ta a ni.

Pu Hrawva hi miropui tak a nih zia chu mak tak a ni. Lal a nih lai khan naupang kutdawh pakhat Lal ina kut a rawn dawh thin a, Pu Hrawva chuan cheng khat hi a lo pe thin a. A lo kal ta fo va, Pu Hrawva chuan a lo kal apiangin cheng khat a lo pe ta ziah a. hetih lai hian cheng khat hi hlu tak a ni. Chutia Pu Hrawva thiltih dan chu a fapa Lalvûta chuan a ngaithiam ta lo va, "Ka pa, he naupang kut dawh hi pawisa pe tawh suh," a ti a. Pu Hrawva chuan, "Engvangin maw?' a ti a. Lalvûta chuan," I pawisa pek hian meizial te a lei a, thil ho mai mai a lei thin a, a tha lo," a ti a. Pu Hrawva chuan, " Kut a dawh duhna rilru hrim hrim hi pek tlak a ni," a ti ta daih mai a!

Sailo Lal hmun tam takah an awm a, Khiangte Lal Aizawla a lo awm tlat hi mak tak a ni a. Pu Hrawva hi Lal a ni mai a ni lo va, kristian hmasa leh lehkhathiam hmasa a ni a, a ropuiin a ngaihsan awm em em. Thu leh hla thiam Pu Hrawva hian Kriatian Hlabu ah a kut chhuak hla 6 lai min hnut chhiah a. Tin fapa chhuanawm tak Zofa ten kan hriat lar, thu leh hla thiam, Mizo zinga Indian Foreign Service hna thawk hmasa ber Pu KC Lalvunga (Zikpuii Pa) a nei a. Pu Vunga hian thu leh hla thiam leh lehkha thiam lamah a pa a chhûn fuh hle. An pafa hian Zoafte tan zir tham leh hlawkpui tham thu leh hla tam tak min hnut chhiah a. Pu Vunga phei hi chu, "Mizo Writer of the Century" ah an thlang hial reng a ni.

A hla phuahte

1. Mi Ropui
2. Rairahtea
3. Baichi tlangpui

A Kutchhuak Ropui

MI ROPUI

Pianna thu lam ka chhui lo,

Hming pawh hriat a ngai chuang lo;

Thinlung lam a dik phawt chuan,

Mi ropuiah ka ngai ţhin.

Hausakna ka ngaithla lo,

Rethei tê pawh ni mah se,

Mihring thinlung dik tak chu,

A neih chuan a tâwk a ni.

Khawi aţanga lo chhuak nge?

Khawii hmuna seilian nge?

Tui pawh a thianghlim phawt chuan,

A chhuahna hriat a ngai lo.

Lalin nge ni hnam tlâwm in?

A chênna hriat a ngai lo;

Hei erawh min chhâng teh,

Mi rinawm a ni em le?

Lehkhabu rawnte

1. Class-V Mizo (MBSE) Third Impression : 2006