Wp/lus/B.Thanmawia

Pu B.Thanmawia hi kum 1935 May ni 2 khan Khuanghlum khuaah a lo piang a, a pa chu Pu Awichhinga a ni a, a nu chu Zaiaii a ni. Pianpui mipa pakhat leh hmeichhia pathum a nei a, chungte chu :- B.Lalchhingi, B.Darchhungi, B.Darkhuma leh B.Lalthanpuii te an ni.

Nupui neih

Kum 1966 khan Zothansangi d/o Z.Chana, Kulikawn nen Chanmari Presby Kohhranah an innei a, fa pali an nei a, hlim taka an awmlaiin kum 1977 khan a nupui hian a boral san ta mai a. [NB: ‘Hraite khawnge I chun ve kha’ tih hla hi a duhna chhan hi ka ngaihbel vang emaw ni (?) a fate tan a sa thin niin ka hria] Nakin hnuah chuan Darthanpuii, Ramhlun Veng nen innei in fa pahnih an nei leh a ni. A fate hi an upat dan indawtin Zoherliana, Zoramthangi, Lalrorela, Lalhmangaihzuali, Lalrimtuii leh Vanlalchami te an ni.

Zirna lam

Zirna lamah chuan Khuanghlumah Primary School a kal a. Serkawnah Middle School a zir thung. Pawl sarih leh pawl riat hi Lunglei High Schoolah kalin pawl kua leh pawl sawm hi Mizo High School, Aizawlah a zir a ni. Tichuan, Shillong leh Guwahati-ah College kalin Shillong atangin B.A a zir chhuak a ni.

Hna

Kum 1960-ah Staff Artist, A.I.R Guwahati-ah zawmin 1966-ah Transmission Executive-ah a kaisang a, kum 1975-ah Programme Executive-ah a kai leh a, kum 1978-ah Asst. Station Director-ah a kaisang leh a, kum 1983 khan Station Director-ah a kaisang a ni. Kum 1995 khan Selection Grade-ah hlan kai a niin India ram hmun hrang hrang Shillong, Kohima, Aizawl, Bagalpur, New Delhi leh Guwahati-ah te a awm kual hnuin North East-a hotu ber nihna Dy Director General hna chelh a Guwahati-a a awm laiin ni 31.5.1996 khan pensionin a chhuahsan ta a ni.

Tuina dang

Sawrkar hna a thawh hma atang tawhin zai leh rimawi lam a ngaina em em a ni. Radio Artist hmasa pawl anih mai bakah Mizote tana sul sutu hmasa a ni. Radio programme pawimawh tak tak ‘Kut hnathawktute tan’ tih te, ‘In damtlang em?’ tih te, ‘Keimahni’ tih leh ‘Tha dun’ tih te hi a duan chhuah a ni. Sawi tawh ang khan ‘Lengzem’ leh ‘Lenglawng’ hla tih phuahtu a ni bawk.

Hun hnuhnung

Kum 1975 vel atang khan zunthlum natna hi a nei tan a, mahse buaipui em em a ngai lo. A pension hnu khan a zunthlum hian a mit a khawih tan ta a, a kal lamah kai zelin nitin dialysis vawi 3 a enkawl hial a lo ngai ta a. Dialysis pawh hi 26 December atang khan chhunzawm theih a nit a lova, ni 28.12.2003 dar 8:30 PM khan chatuan ram min pan san ta a ni.