Wp/lkt/Wačhípi

< Wp‎ | lkt
Wp > lkt > Wačhípi

Lakȟóta oyáte kiŋ wačhípi kiŋ theȟílapi. Blokétu čháŋna tȟaŋkál yuhápi na waníyetu čháŋna owáyawa él thimá yuhápi. Takómni Lakȟóta oyáte kiŋ wačhípi na lowáŋpi kte. Tóna makȟásitomniyaŋ wačhí ománipi na wačhí akíčhiyapi ópȟapi.

Wičháša kiŋ épi na kȟoškálaka épi na hokšíla kiŋ épi kȟó léčhel wačhípi: Eháŋk'ehaŋ Wačhí Wičháša, Oštéšteya Wačhípi, Pȟeží Mignáka Wačhípi, Šió Wačhípi.

Wíŋyaŋ kiŋ épi na wikȟóškalaka épi na wiŋčhíŋčala kiŋ épi kȟó léčhel wačhípi: Eháŋk'ehaŋ wačhí wíŋyaŋ, Šiná uŋ wačhípi, Snasná wačhípi.

Tuwé k'éyaš léčel wačhípi okíhipi: Naslólhaŋ/Kahómni wačhípi, Maštíŋčala wačhípi, naíŋš Čhaŋgléška wačhípi.

Okȟá wičháša kiŋ čháŋčheǧa ohómni yaŋkápi. Hél šna wítayela čhaŋkábupi na olówaŋ yuphíya ahíyayapi.

Lakȟóta Oyáte kiŋ wačhípi ektá oíyokiphi yuhápi s'a. Tóna wačhí ópȟapi naháŋ húŋȟ lowáŋpi yuŋkȟáŋ uŋmá kiŋ hená awáŋyaŋke héčhapi. Wačhípi-ta wóyute iyópȟeyapi. Naháŋ nakúŋ hayápi na wakšúpi na wanáp'iŋ na owíŋla na napsíyoȟli lená iyópȟeyapi. Wačhípi él šna oyáte tȟéča kiŋ hóčhoka ohómniyaŋ waŋkíčhiyaŋg mánipi. Hokšíčala kiŋ wačhí oyáte kiŋ épi na okȟá wičháša kiŋ awíčhables yaŋkápi čha íŋš eyá tȟokátakiya wačhípi na lowáŋpi kte.