Wp/lkt/Čhaŋpȟá

Čhaŋpȟá eyápi kiŋ hé hú héčha na Khéya Wíta sitómniyaŋ ičháǧe.

Oówaŋwaŋg tókča kiŋ

Čhaŋpȟá hú kiŋ sihá-iyútȟapi yámni etáŋhaŋ wikčémna núŋpa heháŋyaŋ háŋskeya ičháǧa okíhi. Waȟpé kiŋ mimáhaŋskaska na škiškíte.

Čhaŋpȟá kiŋ lená naháŋȟči sutȟúŋ šni

Čhaŋpȟáhu hú kiŋ waȟčá skaská šmeméya aíčhaǧe. Wétu oíhaŋke čháŋšna hú kiŋ lená sihá-iyútȟapi okhíse waŋží etáŋhaŋ sihá-iyutȟápi waŋží heháŋyaŋ háŋskeya ičháǧa okíhi. Kimímila kiŋ waȟčá kiŋ lená líla waštélakapi.

Waskúyeča kiŋ napȟáhuŋka-iyútȟapi okhíse waŋží glakíŋyaŋ híŋskokeča. Tȟokáheya kpasyá šašá na pȟapȟá éyaš blokétu ičhúŋhaŋ-šna sutȟúŋ áya čha sabsápiŋ na skuskúya.

Tókhel wóilagyapi

Yútapi

Waskúyeča čhoníčha kiŋ špáŋšniyaŋ yulphíča tkȟá sú kiŋ yulphíča šni. Hunúŋpa kiŋ épi na ziŋtkála kiŋ épi na tȟáȟča kiŋ íŋš-eyá čhaŋȟpá-waskúyeča yútapi.

Nakúŋ čhaŋpȟá yužápi čháŋšna líla oyúl wašté. Hé wóžapi eyápi.

Hó nakúŋ čhaŋpȟá kaškípi na yumímiyela pusyápi čhaŋké waníyetu ahí kiŋháŋ naháŋȟčiŋ yulphíča.

Wiwáŋyaŋg wačhípi-ta

Wiwáŋyaŋg wačhípi čháŋšna čhaŋpȟáhu čhaŋsákala yuptáya paȟtápi na čháŋ wakȟáŋ kiŋ okhížate kiŋ él yuglákiŋyaŋ iyákaškapi.

Hó nakúŋ čhaŋsákala eyá čhaŋpȟáhu čha taŋyáŋ kažípapi na uŋ čheȟpí paȟlókapi.

Uŋmá

Watóhaŋlšna wahíŋkpe čhaŋpȟá hú uŋ uŋkáǧapi.

Works Cited

• Flying By, Sr., W. D., & Bishop-Jones, L. S. (2003). Lakota Medicinal/Culturally Important Plants (Standing Rock Nation). Sitting Bull College.
• Red Shirt, D. (2016). George Sword’s warrior narratives: compositional processes in Lakota oral tradition. University of Nebraska Press.
• Taken Alive, D. (2017, October 12). Interview with Delores (L_VD_H_DTA_20171012_02) [Video]. Wóoyake Project. https://wooya.ke/eBO2
• Ullrich, J. (Ed.). (2023). New Lakota Dictionary App (3rd ed.). Lakota Language Consortium.