Kabupatén Pesisir Barat yakdolah salah sai kabupatén di Propinsi Lampung, Indonesia sai ibu kotani yakdolah Krui. Kabupaten sinji tisahko budasaghko Undang-Undang Nomor 22 Tahun 2012 tettang Pembentukan Kabupaten Pesisir Barat Provinsi Lampung pada tanggal 25 Oktober 2012 lajuni tiresmiko pada tanggal 22 April 2013. Sehinggani, kabupatén sinji ngenjadi kabupatén paling ngugha di Propinsi Lampung.
Taman Nasional Bukit Barisan Selatan ngedok di kabupatén sinji. Sedangko di wilayah baghatni wat lawok jama pantai sai helau ghik masih sikop gegoh Pantai Batu Tihang. Pepigha pantai gegoh Tanjung Setia ngedok umbak sai langgagh lajuni ngenjadi jengan lumba selancar internasional tahunan gegoh Krui Pro sai diadako World Surf League.
Ekonomi
editSektor midang ngeghupako potensi andalan Kabupatén Pesisir Barat, inggal tahun ghatusan najin ghibuwan turis ghatong mit Krui, guwai memidoghan, buselancar, ghik ngenikmati kehelauwan pantaini. Selain pantai, Krui ngedok ghuwa pulau eksotis yakdolah Pulau Pisang ghik Pulau Betuah, sai alami ghik kehelauwanni mak kalah jama pulau-pulau baghih, sangun kidang potensini mangkung dimanpaatko.
Akses perhubungan jak ghik mit Krui, dacok nyighang daghak, lawok, ghik langit. Di Krui ngedok Bandar Udara Muhammad Taufiq Kiemas, Pelabuhan Kuala Stabas, ghik Jalan nasional Lintas barat sai nyighang seunyinni wilayah Krui sai wat di garis pantai sekejung 200 kilometer lebih. Potensi hasil bumini ngeghupako gitoh damagh kualitas helau ghik ngedok haghga jual langgagh, gegoh damar mata kucing sai ngeghupako gitoh damar paling helau di duniya ghik ghadu diakui internasional. Mangkung munih hasil bumi sai baghihni gegoh cangkih, kupi, lada, ghik coklat. Kabupatén Pesisir Barat munih ngeghupako wilayah peghtanian ghususni di Kecamatan Pesisir Selatan sai ngedok ghibuwan héktar sabah ghik sistim sighing penguwayan.