Lum um piškizt jeij-kristāld kub, kõvā mūoḑkõks jarā kilmõn vež, mis kristālisīerõb atmosfǟrs ja sadāb mōpīnda pǟlõ. Lum-vȱdõkst katābõd immõr 23% mōkierā pīndast kas mingizkõrd agā alz.
Lum sugūb atmosfǟrs temperatūrõks alā 0°c až vied-our sublimīerõb pȯrm-rȱškiz agā jubā vȯlmizõs jeij-kristāl pǟlõ ja kazātõb sǟl kūd-nūrkaliz mūoḑkõks kristāldi. Atmosfǟrs likkõs kazābõd jeij-kristāld jo sūrõks un sadābõd perīzõks mōpīnda pǟlõ. Kristāld võibõd ikš tuoizõks ītõ, tīedõs siedāviţõ lumkōpkidi. Lum-katõn um tǟdõlpandõb mȯjjimi iļ klīma ja stōdõd, lūoimõd un rištīngd jelāmi.
Lum-kat spiegiļtõb pǟvaļikīz svīpšimizt ja viedāb jarā lemḑõmt mō-pīndast, se tūob kīlmõ aigõ. Lum madāli lemḑõm-jūodimi kāitsõb piškiži stōdidi kīlmõ jedstõ tallõ bet obāztõn lum-kat jarā kaddimi kievād vīptõb stōdõd kazāmizt. Lūnda võib saddõ nemē lum-ūokt agā nemē lum ja vīmõ seg. Klīma pēţimizt pierrõ mǟrlimi lum-katkõks pǟvad lug sōb piškīmõks (sadā āigastõks immõr 5 pǟva).