Līepõ (leţkīelkõks Liepāja, saksākīelkõks Libau) um ikš jālgab Vežgõr- Leţmōl. Līepõ um jeij-brī sadām Vāldamiersõ.
Līepõ um tuoi setku Rīgõ tagān Leţmo jālgabõd siegās industriāliz aŗīņţimiz pūolstõ. Metallurgij um jūodiji industrij, tuoizt ātõ kuoigīd eitimi, metāld, tūoitõg ja kalā ja tsukkõr protseššõmi. Līepõ pūojtiztõ Līvõmō Ordo pūolst āigasts 1263 jālgab vȯļ Līvõmō Konfederātsij ummi ja obbõm Kurāmō ärtsog-vald käds. Āigasts 1795 ta ei Krīevõmōlõ. Līepõ vȯļ Krīevõmōl tǟdzi sadām ja sǟld lekštõ jellõm īžkist Amērik sōņõ. Pierrõ Ežmizt Mōīlmasuodā vȯļ Līepõ Leţmō vȯddõltõb vōļikš ku bolševīkõd vägūd sadīztõ Rīgõ pǟlõ āigasts 1918. Līepõ kāndīz sūŗt kaj Tūoiz Mōīlmasuodā pǟl, kus sakslizt okupīeriztõ tǟnda āigastis 1941-1945. Nõvkub āigal vȯļ sǟl sūr suodāväg bās. Jālgabõ vaņtlõmiz-vǟrt kūožõd ātõ Pētõr Sūr kuodā ja 18 āigastsadā Kuolm-īdlimi pivākuodā.