མར༌ཀུས༌སི༌ བྲིའ༌ ཛད༌ཁན༌ནི༌ གའ༌མོའེ༌ ནས༌ཚུལ༌།
ཡོ༌ཧཱ༌ནན༌ ཁྲུས༌སལ༌ཁན༌ནི༌ མི༌གུན༌ གྲལ༌གྲིག༌ ཅོའ༌ ཛདས༌། 1:1 ནེ༌ 8 edit
1 འི༌བོ༌ ནི༌ དཀོན༌མཆོག༌གི༌ སྲས༌ ཡེ༌ཤུ༌ མ༌ཤི༌ཀའེ༌ སྐོར༌ལ༌ གའ༌མོའེ༌ ནས༌ཚུལ༌བོ༌ ཨིན༌ནོག༌། འི༌བོའེ༌ གོ༌ཟུག༌ ནི༌, 2 ལུང༌སྟོན༌པ༌ ཡེ༌ཤ༌ཡཱའེ༌ སྤེ༌ཆའེ༌ ནང༌ང༌ བྲིའ༌ ཛད༌ཁན༌ ནང༌ཞིན༌ དཀོན༌མཆོག༌གི༌ མོལས༌, "སྟོས༌, ཁྱོ༌རང༌ངི༌ སང༌ སྔུན༌ལ༌ ངའེ༌ ང༌རང༌ངི༌ ལོན༌ཁྱེར༌ཁན༌བོ༌ ཀལ༌ཨིན༌། ཁོའེ༌ ཁྱོ༌རང༌ངི༌ ཕིའ༌ ལམ༌ གྲལ༌གྲིག༌ ཅོ༌ཨིན༌།a 3 ཁོའེ༌ རི༌སྟོང༌ངི༌ ནང༌ང༌ ཀུ༌ཅོ༌ ཏང༌ཨིན༌ མི༌གུན༌ལ༌ ཟེར༌ཨིན༌, གཙོ༌བོ༌ ཕེབ༌ཤེས༌ལ༌ གྲལ༌གྲིག༌ ཅོས༌, ཡང༌ ཁོང༌ངི༌ ཕེབས༌ལམ༌བོ༌ དྲང༌པོ༌ ཅོས༌'།b " 4 ཁྲུས༌སལ༌ཁན༌ ཡོ༌ཧཱ༌ནན༌ རི༌སྟོང༌ངི༌ ནང༌ང༌ སྐྱོད༌ཏེ༌ མི༌གུན༌ལ༌, ཤགས༌པ༌ ཐོབ༌ཅེས༌སི༌ ཕིའ༌ སྡིག༌པ༌ ཅོ༌ཁན༌གུན༌ནི༌ཀ༌ གྱོད༌པ༌ ཅོས༌ཏེ༌ ཁྲུས༌ལེན༌ཅེས༌ལ༌ ཆོས༌ཤདས༌། 5 ཡེ༌རུ༌ཤ༌ལེམ༌མི༌ གྱལ༌སའེ༌ མི༌གུན༌ ཐེས༌ཏེ༌ ཡ༌ཧུ༌དཱའེ༌ ཡུལ༌མི༌ གང༌པོ༌ བིངས༌ཏེ༌ ཡོ༌ཧཱ༌ནན༌ལ༌ སྟ༌ཅེས༌ དང༌ ཉན༌ན༌ལ༌ སོང༌། ཁོང༌གུན༌ནི༌ རང༌རང༌ངི༌ སྡིག༌པའེ༌ ལས༌གུན༌ མི༌གུན༌ནི༌ དུན༌ལ༌ ཤདས༌ པ༌སང༌ ཡོ༌ཧཱ༌ནན༌ནི༌ ཁོང༌གུན༌ལ༌ ཡོར༌དཱན༌ ལྩངས༌པོའེ༌ ནང༌ང༌ ཁྲུས༌སལ༌ལ༌ ཛདས༌། 6 ཡོ༌ཧཱ༌ནན༌ནི༌ རྔ༌བོང༌ངི༌ བལ༌ལ༌ ཐགས༌ཁན༌ནི༌ ཀོས༌ དང༌, སྐེད༌པ༌ ཀོའེ༌ སྐེ༌རག༌ ཅིང༌ངད༌པིན༌, ཡང༌ བུ༌ཙིག༌ དང༌ རི༌སྟོང༌ངི༌ རང༌རྩི༌ ཟའད༌པིན༌། 7 ཡོ༌ཧཱ༌ནན༌ནི༌ ཁྱབ༌གྲགས༌ ཅོས༌, "ངའེ༌ སྟིང༌ནེ༌ སྐྱོད༌ཅེས༌ཅན༌བོ༌, ངའེ༌ སང༌ མང༌ང༌ ཝང༌ཅན༌, ཡང༌ ཞབ༌ཤི༌ ཙོགས༌ལ༌ ངའ༌ སྒུས༌ཏེ༌ ཁོང༌ངི༌ ཞབ༌ལྡམས༌ ཀྲོལ༌ཅེས༌སི༌ འོས༌པ༌ མེད༌། 8 ངའེ༌ ཁྱོ༌ཞ༌གུན༌ལ༌ ཆུ༌ ཉམ༌པོ༌ ཁྲུས༌ ཏང༌ངད༌, ཨིན༌ནའང༌ ཁོང༌ངི༌, ཁྱོ༌ཞ༌གུན༌ལ༌ དམ༌པའེ༌ ཐུག༌ཉིད༌ ཉམ༌པོ༌ ཁྲུས༌སལ༌ཨིན༌།"
ཡེ༌ཤུའ༌ ཁྲུས༌སལས༌། 1:9 ནེ༌ 11 edit
9 ཞག༌ཤིག༌ ཡེ༌ཤུ༌ གཱ༌ལིལ༌ལིའི༌ ཡུལ༌ཇོངས༌སི༌ ན༌ཙ༌རེད༌ གྲོང༌ཁྱེར༌ནེ༌ སྐྱོདས༌, ཡང༌ ཡོ༌ཧཱ༌ནན༌ནི༌ ཁོང༌ང༌ ཡོར༌དཱན༌ནི༌ ལྩངས༌པོའེ༌ ནང༌ང༌ ཁྲུས༌སལ༌ལ༌ ཛདས༌། 10 ཡེ༌ཤུ༌ ཆུའི༌ ནང༌ནེ༌ ཕིང༌ང༌ཅིག༌, ཁོང༌ངི༌ ནམ༌ཁའ༌ བེ༌ཏེ༌ དམ༌པའེ༌ ཐུག༌ཉིད༌ ཁོང༌ངི༌ཀ༌ ཕུར༌གོན༌ཞིག༌གི༌ ཚུལ༌ལ༌ བབས༌ཨིན༌ ཟིགས༌། 11 ཡང༌ ནམ༌ཁའ༌ནེ༌ སུང༌སྐད༌ཤིག༌གི༌ མོལས༌, "ཁྱོ༌རང༌ ངའེ༌ བུ༌ཚ༌ ཅེས༌པ༌བོ༌ ཨིན༌, ཁྱོ༌རང༌ ཉམ༌པོ༌ ངའ༌ མ༌སྲན༌ཏྲེ༌ ཐད༌པོ༌ ཨིན༌།
ཤེ༌ཏན༌ནི༌ ཡེ༌ཤུ༌ སྡིག༌པའེ༌ ནང༌ང༌ གྱེལ༌ཅུག༌ཅེས༌སི༌ རྩོན༌གྲུས༌། 1:12 ནེ༌ 15 edit
12 ཏེན༌ན༌མལ༌ལ༌ དཀོན༌མཆོག༌གི༌ ཐུག༌ཉིད༌དི༌ གཙོ༌བོ༌ ཡེ༌ཤུ༌ རི༌སྟོང༌ངི༌ ནང༌ང༌ ཁྱེར༌ར༌ ཛདས༌། 13 ཀ༌རུ༌ ཤེ༌ཏན༌ནི༌, ཞག༌ 40 ཡེ༌ཤུ༌ སྡིག༌པའེ༌ ནང༌ང༌ གྱེལ༌ཅུག༌ཅེས༌སི༌ རྩོན༌གྲུས༌ ཅོས༌། ཏེ༌ཏུས༌ ཁོང༌ རིའི༌ སེམས༌ཅན༌གུན༌ནི༌ ཕྲོའ༌ ཡོད༌ ཟ༌ནེ༌, དཀོན༌མཆོག༌གི༌ ཕོ༌ཉ༌གུན༌ནི༌ ཁོང༌ང༌ སྟ༌སྟོག༌ ཅོའ༌ ཛདས༌། 14 ཡོ༌ཧཱ༌ནན༌ ཟུམས༌ཏེ༌ ཙོན༌ཁང༌ངི༌ ནང༌ང༌ ཀགས༌ཏེ༌ སྟིང༌ནེ༌ ཡེ༌ཤུ༌ གཱ༌ལིལ༌ལིའི༌ ཡུལ༌ཇོངས༌སི༌ ནང༌ང༌ སྐྱོད༌ད༌ ཛད༌ཏེ༌ དཀོན༌མཆོག༌གི༌ གའ༌མོའེ༌ ནས༌ཚུལ༌བོ༌ ཤད༌ད༌ ཛདས༌། 15 ཡེ༌ཤུའི༌ མོལས༌, "ཞལ༌ཆད༌ ཛད༌ཁན༌ནི༌ ཏུས༌པོ༌ ལེབས༌ཏེ༌ ཨིན༌ནོག༌། དཀོན༌མཆོག༌གི༌ གྱལ༌སྲིད༌ ཉེ༌མོ༌ ཨིན༌ནོག༌། ཏེ༌བོའེ༌ཕིའ༌ གྱོད༌པ༌ ཅོས༌ཏེ༌ རང༌རང༌ངི༌ སྡིག༌པ༌གུན༌ ཕངས༌ཏེ༌ གའ༌མོའེ༌ ནས༌ཚུལ༌ལི༌ ནང༌ང༌ ཏད༌པ༌ ཅོས༌།"
གོ༌མའེ༌ ལོབ༌ཕྲུགས༌གུན༌། 1:16 ནེ༌ 20 edit
16 གཙོ༌བོ༌ ཡེ༌ཤུ༌ གཱ༌ལིལ༌ལིའི༌ ཚོའེ༌ ཐའ༌མ༌ནེ༌ ཞབ༌གྲུལ༌ ཛད༌ཨིན༌ ཡོད༌ཏུས༌, ཁོང༌ངི༌ ཤི༌མོན༌ དང༌ ཁྱོའེ༌ ནོ༌ ཨེན༌གྲིརིའུ༌ ཚོའེ༌ ནང༌ང༌ ཉ༌དོལ༌ ཕང༌ཨིན༌ ཟིགས༌, ཅིའ༌ཟེར༌ན༌ ཁོང༌གུན༌ ཉ༌ ཟུམ༌ཁན༌ ཨིན༌པིན༌། 17 ཡེ༌ཤུའི༌ ཁོང༌གུན༌ལ༌ མོལས༌, "ངའེ༌ གྱབ༌ནེ༌ ཡོངས༌ཏེ༌ ངའེ༌ ལོབ༌ཕྲུགས༌ གྱུར༌, ཏ༌ནེ༌ཕར༌ལ༌ ངའེ༌ ཁྱོ༌ཞ༌གུན༌ལ༌ ཉའེ༌ ཚབས༌ལ༌ མི༌གུན༌ ཟུམ༌ཅེས༌ ལབ༌ཨིན༌།" 18 ཏེན༌ན༌མལ༌ལ༌ ཉ༌དོལ༌ སྤངས༌ཏེ༌ ཁོང༌གུན༌ ཡེ༌ཤུའི༌ གྱབ༌ནེ༌ བྲངས༌། 19 ཏེ༌ཀ༌ནེ༌ ཙ༌པིག༌ ཐག༌རིང༌ང༌ སྐྱོད༌ད༌ཅིག༌, ཡེ༌ཤུའི༌ ཟེ༌བེད༌དིའི༌ བུ༌ཚ༌ ཡ༌ཀོབ༌ དང༌ ཡོ༌ཧཱ༌ནན༌ ཟིགས༌། ཁོང༌གུན༌ནི༌ གྲུ༌ཟིང༌ངི༌ ནང༌ང༌ ཁོ༌རང༌གུན༌ནི༌ ཉ༌དོལ༌ གྲལ༌གྲིག༌ ཅོའད༌པིན༌། 20 ཏེན༌ན༌མལ༌ལ༌ ཡེ༌ཤུའི༌ ཁོང༌གུན༌ལ༌ བོད༌ད༌ ཛདས༌, ཡང༌ ཁོང༌གུན༌ ཁོ༌རང༌གུན༌ནི༌ ཨ༌བ༌ ཟེ༌བེད༌དི༌ ལ༌པ༌གུན༌ ཉམ༌པོ༌ གྲུ༌ཟིང༌ངི༌ ནང༌ང༌ བོར༌ཏེ༌ ཡེ༌ཤུའི༌ གྱབ༌ནེ༌ བྲངས༌།