Wp/kus/Samanpiid malima

Samanpiid malima anɛ yʋʋm-yʋʋm tigir kanɛ ka Kusasis banɛ bɛ Kusaug Traditional Area bɛ Upper East Region sʋ’ʋlim, Ghana la maan. Malʋŋ la maanɛ ye ba pʋ’ʋs Wina’am nɛ on sʋŋ ka zʋʋd maal sɛɛʋng la.

Samanpiid malima

festival

Country	Ghana
Location	Bawku

Samanpiid anɛ malʋŋ kanɛ ka kʋsaas maan yʋʋm wʋsa. Samanpiid anɛ malʋŋ kanɛ ka kʋsaas dͻlisidi pʋ’ʋsid kpi’imnam, tɛŋgbana nɛ badanam nɛ ban sʋŋi ba ka ba ku’a ka zʋʋd maal la.

Samanpiid malʋŋ ɛɛnti bɛnɛ na’asaanwadis piinɛ ayi la naarin. Amaa yɛlsieba yɛla tͻn’ͻn kɛ ka ba tͻlisi li bɛɛ lɛbisi li nya’aŋ.

Samanpiid saŋa ya’a ɛɛnti paae, kʋsaa buudi n bɛ zin’isi’a wʋsa ɛɛnti lɛbnɛ yin, n la’as nɛ ba taaba banɛ ka o nyɛ ka li yuug.

Pin’ilʋg

Samampiid malʋŋ la da pin’ilnɛ yʋʋm tusir, kɔbiswai nɛ pisnii nɛ ayɔpɔi la ni (1987). Samampiid malʋŋ kanɛ da paas pisi nɛ ayuobʋ la (26th Anniversary) Ghana zuraan kʋdʋg Jerry John Rawlings da an onɛ ka ba kaanbi buol ye o kena pian’a tisi ba.

Zin’ibanɛ maani di.

Kʋsaug mͻr distiriknam ayuobʋ banɛ nidib wʋsa ɛɛnti la’asi maal samanpiid malʋŋ la. Distrit ban anɛ Bawku municipal, Binduri district, Pusiga district, Garu district, Tempane district nɛ Bawku West district.

Banɛ gͻsid samanpiid yɛla la na zin’ini gban’ae dabisir la ka Na’ab tik nu’ug. Ka ba kɛ ka labaar paae Na’abibis la wʋsa ye sͻ’ wʋsa muk ka yɛl o nidib ka ba ti’eb ka yina nwɛnɛ ban ɛɛnti pʋn yit si’em la ka ba maal malima. Ka yʋ’ʋn tʋm o tiraan ka o yii pɛs gbada banɛ bɛ wʋsa, ka suor niŋ nyain tisi ba ka ba nyaŋi maal malʋŋ la ka dauŋ da bɛɛ.

Ban maan malʋŋ la si'em

Nwɛnɛ ban ɛɛnti pʋn maan si’em la, pʋ’ab daa kʋan’ daam, yi bɛʋgʋn bi’is ka dabisir la mɛŋ nyaan paae.

Samanpiid daar daa sɔ' wʋsa na la'as Na’atita’agandabirin yin bɛʋgʋn ye ba dͻl o keŋ Daduri sakur biis ninwisigir paalʋ la ni (zin’ikanɛ ka sͻ’ wʋsa na la’as la). Ba ya'a paae ka Na’ab yina ka o pʋ’akpɛɛm dͻl o nɛ nwam nɛ kuom nɛ zͻm. Ka ti wʋm ka sͻ’ yɛl ye “ya vʋʋn ka Na’ab ye tis Ba’anam ku'om”. Ka sͻ’ wʋsa niŋ baanlim. Ka labadi’esidib zͻͻ li’el o, ka Na’ab sɛbin ka banɛ kpɛlim la wʋsa zin’in teŋin nɛ banaya. Ka o  kaanbi buol Ba’anam la tisi ba ku'om nɛ zͻm nɛ nͻrazin’a, ka ye ba gaadim tuon ka maal malʋŋ la tis o, ka di naae nɛ laafi ka puan' kae ka zug kae. O ya'a naae ka duoe, ka sɔ' wʋsa mɛ duoe yurrr nɛ bananya.