Tambere (suomeksi da vienankarjalaksi Tampere, ruočiksi Tammerfors) on Suomen linna da Pirkanmuan muakundakessus, kumbane on Näzijärven da Pyhäjärven rannoilla. Tamberen linnassa eläy lässä 259 000 ristikanzua da luajemmin kogo alovehella lässä 440 000 ristikanzua. Vastah Tamberen linna-alovehen kundayhtymän ruadamizalovehella eläy lässä 421 000 ristikanzua. Tambere on sen eläjäluvulda Suomen kolmanneksi suurin kunda da sen lähikundien kera toizeksi suurin linna-aloveh.
Tambere on sen eläjäluvulda Pohjaismualoin suurin syväinmualinna. Tamberen susiedakunnat ollah Kangasala, Lembiälä, Nogia, Orivezi, Ruovezi da Ylöjärvi.
Tamberen kessusta-alovehen keskioza on järvi- da harjualovehella Näzijärven da Pyhäjärven välizellä kannaksella, kumbazen läbi virduau Tammerkoski Näzijärvestä Pyhäjärveh. Tammerkossen pudovuskorgehus on 18 medrie. Sen rannoilla nägyjät ruskiekirpiččäzet fuabrikkarakennukset kerrotah Tamberen tevollizushistoriesta. Tambere ongi historiellizesti Suomen enzimäne da suurin tevollizuslinna. Tammerkossen koskimaizema on nimetty yheksi Suomen kanzallismaizemista.
Kustaa III perusti Tamberen vuodena 1779, ga linna algo kazvua vasta 1800-luvun puolivälin jälgeh, konza siidä tuli tärgie tevollizuskessus. Enimyölleh tekstiilatevollizus oli luaja. Myöhembäh tevolliszustuotanduo on muuttan iäreh linnasta, da Tamberen talohus on kessittyn palveluloih da korgien teknolougien yrityksih.
Tambere on i kulttuura- da sporttalinna. Sielä ruatah Suomen vanhimbih teatroih kuulujat Tamberen Teatra da Tamberen Ruadorahvahan Teatra. Muzeikessus Vapriikassa on äijä muzeida da ozutteluo, ga matkualullizesti tärgein kohta on yhelläh Särgänniemen kizapuisto. Popul’arnoissa kulttuurassa Tambere tunnetah kaikkie enimmällä Manserock-nimen suanuosta muuzikkaluavusta. Alanomazena syömizenä pietäh mustuamakkarua. Tamberella kizuau uzeida sportan piäsarjajoukkovehie, da linnua pietäh tuagieh suomelazen jiäkiekon “kätkyönä”. Linnan omat SM-liigajoukkovehet ollah muan mänestyneimbih kuulujat Ilves da Tappara.
Lähe: Tampere. Suomenkieline Wikipedia. https://fi.wikipedia.org/w/index.php?title=Tampere&_welcomesurveytoken=b02behj40jeg4fb9ekot4r3rgjjvg9rq&source=welcomesurvey-originalcontext (kačottu da kiännetty 22.10.2024)
Tiemasta muijalla
edit
