Wp/krl/Ofra Haza

Peruštieto

Šyntymäpaivä	19.11.1957
Šyntymäpaikka	Tel'-Aviv, Israeli
Kuolentapaivä	23.02.2000
Kuolentapaikka	Ramat-Gan, Israeli
Aktiiviset vuuvvet	1969 - 2000
Mua	Israeli
Ammatti	laulaja, näyttelijä
Laulajan iäni	mecco-soprano
Taitolajit	muajilman musiikki, pop, etnini musiikki

Bat – Ševa Ofra Haza – Aškenazi (hepriekši ‏עָפְרָה חָזָה‎, 19. pimiekuuta 1957 – 23. tuiskukuuta 2000) oli israelilaini laulaja ta näyttelijä.

Šyntyperä ta lapšus
Ofra Haza šynty Jemenin juutalaisien lapšikkahašša pereheššä. Hänella oli kuuši čikkuo ta kakši veikkuo. Hänen muamo, Šošana Haza, oli kotiemäntä, a tuattoh, Jefet Haza, ruato Tel’-Avivin kaupunkinhallitukšešša.
Ofran vanhemmat šiirryttih elämäh Israelih Jemenistä vuotena 1944. Hazan pereh eli köyhäššä Hatikva –linnannelliköššä, Tel’-Avivin laijašša.
Ofra opaštu “Uziel” –koulušša. Opaštajat tunnuššettih hänen laulajan lahjat. Koulušša oli pieni kuoro, kumpasešša Ofra oli solistina.
Kakšitoistavuotisena Ofra liitty taiteilijaryhmäh “Hatikva”. Niin alko hänen luova taival.
Taiteilijaryhmän johtaja, Bezalel Aloni, jäleštäh tuli Ofran tuottajakši ta viisahakši opaštajakši.
Yhekšäntoistavuotisena Ofra tuli kuulusakši pop-tähekši, a lehtimiehet šanottih häntä “Itämäisekši Madonnakši”. Armeijašša oloajan jälkeh Ofra Hazan sooloura alko.

Ura
Enšimmäiset al’pomit kuin “Al Ahavot Shelanu” (“ Meijän Rakkahuošta”, 1980), “Bo Nedaber” (“Paiska”, 1981) ta “Pituyim” (“Kiušaukšet”, 1982) tuotih Ofralla šuuren mainehen ta vuotena 1983 hiän tuli Israelin etuštajakši Eurovisijon laulukilpailušša Šakšašša. Haza esitti laulun “Hai” (“Olen elošša”) ta piäsi toisella paikalla. Kilpailun jälkeh Ofra tuli kanšallisekši tähekši, a hänen al’pomi “Hai” tuli platinakši.
Vuotena 1985 Ofra Haza nauhotti kuulusan al’pomin “Shirei Teiman” (“Jemenin laulut”). Šiinä oli perentehellini musiikki ta uškolliset laulut (Rabbi Šalom Šabazin runot, XVII-vuosišata) nykyaikasešša tavašša. Ofra šai alkuperäsen kanšainvälisen hyväkšynnän. Jäleštäh, vuotena 1988 Ofran laulu “Im Nin Alu” (“Još Ovet Ollah Kiinipannut”) šai enšimmäiset paikat Europašša.
Myöhemmin laulaja läksi ruatamah Amerikkah. Joka vuosi hiän kävi kotimuašša. 3. tuiskukuuta 1987 Ofra joutu lento-onnettomukšeh Israelilais-Jortanijalaisella rajalla, ka hiän ta Bezalel Aloni jiätih eloh.
Šiitä ilmeššyttih šemmoset kanšainväliset al’pomit kuin “Shaday” ta “Desert Wind” (“Erämuan tuuli”). “Shaday” tuli vuuvven al’pomikši New Yorkissä, a “Im Nin Alu” šai enšimmäisen paikan musiikkifestivalissa Tokiošša.
Vuotena 1992 Hazan al’pomi “Kirya” šai Grammy-palkinnon.
Vuotena 1994 laulaja myöšty Israelih ijäkši.
Ofra ruato šemmosien näyttelijien yheššä kuin Glykeria, Yehudit Ravitz, Paula Abdul, Whitney Houston, Iggy Pop, Buddha Bar, Sisters of Mercy, Ishtar, Khaled ta Michael Jackson. Hazan iäni kuuluu animatijoelokuvašša “Jegiptin Prinssi”, kumpasešša Ofra iänitti Johavedan ta esitti laulun “Vapauta meitä”.

Pereh
15. heinäkuuta 1997 Ofra Haza mäni miehellä. Elokaš israelilaini yrittäjä Doron Aškenazi tuli hänen miehekši. Hänellä oli epyältävä maineh. Doronilla oli lapšet entiseštä yhtehmänöšta. Ofralla ei ollun lašta.

Kuoloma
Vuotena 2000 Ofra Hazan tervehyš pahentu vuottamatta. 23. tuiskukuuta 2000 nelläkymmentäkakšivuotini laulaja kuoli keuhkokuumieh. Tauvin šyynä oli immuunikato (AIDS). Nyt še on kaikkien tiijettävä fakti.
Ofra Haza oli uškovaini ihmini, a hänen elämäntapa oli puhaš ta terveh, šentäh hänen tauti tuli šuurekši ihmehekši Israelissä.
Kun uutiset Ofran kuolomašta ilmeššyttih, Israelin ratijoašemat ruvettih lähettämäh hänen lauluja. Piäministeri Ehud Barak šano Ofrua Israelin kulttuurin lähettilähäkši.
Ofran kuoloman jälkeh lehtimiehet kirjutettih, jotta Doron Aškenazi oli tartuttan vaimoh. Bezalel Aloni oli šamua mieltä ta kirjutti šiitä kirjaššah. Doron Aškenazi ajatteli, jotta Ofra oli šuanun tauvin turkkilaisešša šairalašša verenšiirron aikana. Ofra Hazan mieš kuoli 7. šulakuuta 2001 huumehien yliannokšeh.
Laulajan hauta on Jarkon –kalmismualla Petah Tikvašša, Tel’-Avivin lähellä.
“Manginat Halev” (“Šytämen šävel”) on Ofra Hazan parahien laulujen kokomuš, kumpani ilmešty hänen muissokši.

Perintö
Vuotena 2007 Bezalel Aloni julkaisi kirjan “Michtavim L’Ofra” (“Kirjaset Ofralla”).
22. kevätkuuta 2007 puiston oša Hatikvašša oli nimitetty “Gan Ofra” (“Ofra Puisto”). Še puisto on Boaz kavulla, missä Ofra Haza kašvo.

Sooloal’pomit

1980 - Al Ahavot Shelanu (Meijän Rakkahuošta)
1981 - Bo Nedaber (Paiska)
1982 - Pituyim (Kiušaukšet)
1982 - Li-yeladim (Laulut lapšilla varoin)
1983 - Hai (Olen elošša)
1983 - Greatest Hits
1983 - Shirei Moledet A (a.k.a. Shirei Moledet 1) (Kotimuan Laulut A)
1984 - Bayt Ham (Lämmin Koti)
1984 - Shirei Teyman (a.k.a. Yemenite Songs or Fifty Gates of Wisdom)
1985 - Adamah (Mua)
1985 - Shirei Moledet B (a.k.a. Shirei Moledet 2) (Kotimuan Laulut B)
1986 - Yamim Nishbarim (Broken Days)
1987 - Album HaZahav (Kulta Al’pomi)
1987 - Shirei Moledet C (a.k.a. Shirei Moledet 3) (Kotimuan Laulut C)
1988 - Shaday
1989 - Desert Wind (Erämuan tuuli)
1992 - Kirya
1993 - Oriental Nights (Itämaiset Yöt)
1994 - Kol Haneshama (Miun šielu)
1995 - Star Gala
1997 - Ofra Haza
1998 - Ofra Haza At Montreux Jazz Festival
2000 - Manginat Halev vol. 1 (Šytämen šävel 1)
2004 - Manginat Halev vol. 2 (Šytämen šävel 2)
2007 - The Remixes
2008 - Forever Ofra Haza – Her Greatest Songs Remixed
2014 - TBA

Iänitrekit

1988 - Colors
1990 - Dick Tracy
1990 - Wild Orchid
1994 - La Reine Margot (Queen Margot)
1998 - The Prince of Egypt
1998 - The Governess
1999 - The King And I
2000 - American Psycho: Music from the Controversial Motion Picture

Filmit

1979 - Schlager (Muotišävel)
1979 - Naarat haparvarim (Esikaupunkin Tyttö)
1998 - Tzedek muchlat (Primal Justice, Alkuperäni Oikeuš)

Materialit