Niätä (Martes martes) on niätäeläimih kuuluja imettäjä. Niätyä tavatah läheš koko Europašša i ošašša Lähi-ityä, Kaukasuksella ta läntiseššä Siperijašša. Niätä eläy kaikenmoisissa mečissä. Šitä on mečäššetty šen turpien talviturkin takie ta šiitä on niise yritetty jaloštua tarhattuo kantua.
Niätä on šuuren kiššan kokoni. Šen vartalon pituhuš on 45–58 ta hännän 16-28 senttimetrie. Niätä painau 500–1 800 grammua. Koko vaihtelou muantiijollisešti, ta isäčyt ollah 12–30 prosenttie emäčyjä painavampie. Turkki on pruuni. Häntä on pitkä ta turpie, ja korvat šuuret. Niätä eläy ušeičči 8-10-vuotiehekši.
Niätä šyöy šekaruokua, ka šuošiu lihua kun šitä šuau. Niäjällä kelvatah mykrät ta muut jyršijät, linnut, skokunat, hyönteiset, marjat, fruktat ta mesi. Hiäššä niätä voi šyyvvä šienie ta huaškojaki. Päivölän pivoista ta oluven šynnistä kertojašša virreššä niätä tuou kontien šylkie Osmottarella, kun muut eläjät ollah tuotu omua ruokuah: repo kuušešta oravan ta orava käpysen.