Inkeri ili Inkerinmua on aloveh Venäjällä Pietarin linnan ympärillä. Nykyjäh še kuuluu Leningradin aloveheh. Noin 15 000 nelijökilometrin luajuni aloveh rajautuu pohjoisešša Rajajokeh, länneššä Narvanjokeh ta Laukaanjokeh a ijäššä Luatokkah ta Lavajokeh.
Inkeri on šuanun nimen ruoččilaiselta prinčessa Ingegerdiltä, kumpani mäni vuotena 1019 Novgorodin halliččijalla Jaroslav I Viisahalla. Eymundin sagašša kerrotah, jotta Ingegerd šai Jaroslavilta lahjakši Luatokanlinnan ta šiih liittyjät muah. Šiitä šuaten alovehta on kučuttu nimellä Inkeri (Inkerinmua ili Ingegerdin muat).
Inkeri oli itämerenšuomelaisih kanšoih kuulujien vat't'alaisien ta inkerikkojen istorijallini kotimua. Niise itäslavilaista väkie tuli alovehella jo enšimmäisen vuosituhannen lopulla. Inkeri kuulu Ruočilla vuuven 1617 Stolbovan rauhašta aina šuureh Pohjan šotah (Ruočin Inkeri). Tuolluan alovehella muutti äijän šuomelaisie, kumpasten peräntiet (perilliset) tunnetah inkerinšuomelaisina ili inkeriläisinä. Oša Länši-Inkerie liitettih Tarton rauhan jälkeh Viroh, ta še tunnetah nimellä Viron Inkeri. Nykyjäh šekin kuuluu Venäjäh.