Huapa (Populus tremula) on pajukašvien heimoh kuuluja lehtipuu, kumpasen puuaineh on pehmietä ta halieta.
Huapa on 15-30 metrin korkusekši kašvaja näpiekašvuni puu, tuntureilla tuhjo; šen lehet värätäh pieneššäki tuulešša. Uhtuošša on ušottu, jotta Iisussan risti oli huavašta, ta šentäh huapa kun kaikičči, vaikka kuin olkah tyyni ili tuuli, häneššä lehet liikutah, värätäh. Kašvin romotuš (šyyškarva) vaihtelou rušapašta helien keltaseh.
Huapasilla halkoloilla on ennein lämmitetty kylyjä ta riihijä. Niistä ei tullun muštua šavuo ta nokie. Huapua käytetäh ušeičči niise kylyn lautehissa. Šuomešša huavan vankoista runkoista on ammuin luajittu huapijoita ili kaverrettuja venehie.
Huapa on avuanlaji, koška šiih liittyy äijä muita lajeja. Huapa teköy äijän juurivešoja ta poloniu ušeičči enšimmäisenä mečäštä pal'l'aštunuon alovehen. Huavan juuristo šuattau olla tuhanšie vuošie vanha, hot yksittäini puu eläy harvoin yli šatua vuotta. Kun vanhat runkot kuollah, juuristosta noušou eših uušie.